2023 MIHECA saka 1 folad 18 romiˈad pitoloan, jw.org wangcan iraay ko cecay mikiriwiˈay a salasil, salikaka ci Kayci Folike aci Cifeli Winter, mapanilnilay malo Malohemay Malitengay i Congpo no Misawacayay Tamdaw ni Yihofa. Madimadiay midoko ci Yihofaan cangra to halafinayto a mihecaan.

Salikaka ci Folike itiniay i Padaka kaˈetip no Pinsifaniya a lomahad, o wama wina ningra o midokoay ci Yihofaan. Moetep ira ko pina ko mihecaan ningra i, malinahay ko paro no lomaˈ tayra i cisaaliay to mitosilay a inaka mimingay a niyaroˈ. Ikor i, itini 1988 miheca saka 11 folad 20 romiˈad, micadaay cingra to paputisem.

O wama wina no salikaka ci Folike marariday pakalalok cingranan miemin to toki matayal saki Yihofa, miceriday cangra mitahidang to kasakilac kantok ato i Pitilay matayal a salikaka tayra i lomaˈ palafang. Mahapinangay no salikaka ci Folike tada lipahakay ko mieminay to toki matayal saki Yihofa a tamdaw. Micadato to paputisem caho ka halafin, itiniay cingra i 1989 miheca saka 9 folad 1 romiˈad satapang malo miceriday misakafahay. Ikor no tosa miheca, malaˈosiayto ko mipatirengan ningra a patosokan i 12 ko mihecaan, matayal i Pitil. 1991 miheca saka 10 folad, misatapangayto cingra itini i Prokelin a Pitil matayal.

Salikaka ci Folike faloay miheca matayal to Misolimetay to mitepangan cudad i Pitil, ikor mapanilnilay tayra i Mitosilay Kasakapot. Itira tora tatokian, mirienangay cingra to sano Rowasiyaay ko sowal a kasakopang. Isaka 2006 miheca, mararamoday aci Natiyaan, ikor malacafay cangra matayal i Pitil, hanaca itini kasakopang midamaay tono Putawyaay ko sowal a mitosilay tayal, ikor tayniay i sano Sipanyaay ko sowal a kasakopang to 10 a mihecaan. Matayal i Mitosilay Kasakapot to pina mihecaan ikor, salikaka ci Folike mapanilnilay tayni i Pasifanaˈay Kasakapot malo Iing, ikor patikolay tayni i Mitosilay  Kasakapot malo Iing. Isaka 2022 miheca saka 3 folad, mapanilnilay cingra malo midamaay i Mitosilay Kasakapot a Iing no Malohemay Malitengay i Congpo.

Salikaka ci Winter itiniay i Padaka Kalefoniya a Murieta a lomahad, o wama wina pasifanaˈay cingranan to kimad no Fangcalay Cudad. Salikaka ci Winter itiniay i 1986 miheca saka 3 folad 29 romiˈad micada to paputisem, ikor to saka 4 folad misatapangay malo dama a misakafahay. Maolahay cingra misakafah, mansa ikor no pina a folad malo dama misakafahay i, itini 1986 miheca saka 10 folad 1 romiˈad misatapangayto a malo miceriday a misakafahay.

Moetep ira ko pina ko mihecaan no salikaka ci Winter i, milisoˈay to matayalay i Pitil a tatosa kaka ningra, itira tora pilisoˈ cangranan iraayto ko harateng a sakatayalaw i Pitil. 1990 miheca saka 5 folad, matahidangayto cingra tayra i Wakil a Pitil matayal.

Salikaka ci Winter itiniay i masasiromaay a kasakapot matayal, itiniay i Micingkiyatay a Kasakapot, Nociw a Kasakapot ato itini i Katayalan no Pitil. Isaka 1997 miheca, mararamoday aci Ancila, ikor malacafay cangra matayal i Pitil. Isaka 2014 miheca, malinahay tayra i Worwik, salikaka ci Winter mipadangay a patireng to Congpo. Isaka 2016 miheca, malinahay tayra i Patterson Picudadan no Mikecolay, itiraay i no Ika a Kapot a matayal. Ikor no sepat miheca, patikolay tayra i Worwik, mapanilnilay cingra matayal i Midimokosay to Matayalay i Pitil a Tamdaw. Isaka 2022 miheca saka 3 folad, mapanilnilay cingra malo dama i Midimokosay to Matayalay i Pitil a Tamdaw no Iing no Malohemay Malitengay i Congpo.

Onini a tatosa faˈinayan salikaka sahtoay o sapafeli ni Yihofa a ‘sapakaolah,’ misaˈicelay cangra matayal tono Hongti Kitakit a demak. Patadoen ita cangra a mitolon, nanay palemeden ni Yihofa cangra.​​—⁠Ifiso 4:⁠8.