AFUƐ 2023, Zanvie i le 18 m’ɔ ti Mlan cɛn’n, be boli jasin kun jw.org su. Be seli kɛ aniaan bian Geji Fligɛli nin Jefre Windɛɛ be o Zoova i Lalofuɛ’m be Anuannzɛ’n i Ɲrun Dinfuɛ’m be nun wie siɛn’n. Aniaan nɲɔn sɔ’m be boli Zoova i sulɛ bo w’a cɛ kpa.

Etazinin lɔ lika nga be flɛ i kɛ Pɛninsilivanin’n, i wia atɔliɛ lɔ yɛ aniaan bian Fligɛli ɲinnin-ɔn. I si nin i nin be ti Zoova i Lalofuɛ. I nun m’ɔ te yo gbanflɛn kan’n, i awlofuɛ’m be tu ko trannin klɔ kaan kun mɔ be mian jasin bofuɛ’m be wun lɔ’n su. Kɛ ɔ yoli sɔ’n, w’a cɛman yɛ be yoli i batɛmun-ɔn. Be yoli i batɛmun afuɛ 1988, Novanblu i le 20 su.

Aniaan bian Fligɛli i si nin i nin be wlɛli i fanngan titi kɛ ɔ fɛ i wun wla blɛ kwlaa nun Ɲanmiɛn junman dilɛ’n nun. Asa’n akpasua sunianfuɛ mun nin Betɛlifuɛ wie’m be ko sikeli be awlo lɔ kpɛ sunman. Aniaan bian Fligɛli wunnin kɛ aniaan sɔ’m be di aklunjɔɛ dan. Kɛ be yoli i batɛmun’n, w’a cɛman yɛ ɔ kacili titi atin bofuɛ-ɔ. Ɔ yoli sɔ afuɛ 1989, Sɛptanblu i le 1. I nun m’ɔ le afuɛ 12, ɔ sunnzunnin kɛ ɔ́ dí junman Betɛli. Ɔ maan kɛ ɔ yoli atin bofuɛ m’ɔ dili afuɛ nɲɔn’n, ɔ kacili Betɛlifuɛ sakpa. Ɔ boli Betɛli lɔ junman dilɛ’n i bo Bluklinin lɔ afuɛ 1991 nun.

Kɛ ɔ juli Betɛli lɔ’n, ɔ dili junman kan be yi fluwa mun lɔ’n afuɛ mɔcuɛ. I sin’n, ɔ ko dili junman biolo ng’ɔ nian jasin fɛ’n bolɛ junman’n su’n nun. Blɛ sɔ’n nun’n, ɔ suannin asɔnun kun m’ɔ yo aɲia mun Risi aniɛn’n nun’n i bo. Afuɛ 2006 nun’n, ɔ jali aniaan bla kun mɔ be flɛ i kɛ Nadia’n. Ɔ maan aniaan bla’n ko dili junman Betɛli lɔ wie. Be nɲɔn’n be suannin asɔnun kun m’ɔ yo aɲia mun Pɔɔtigɛ aniɛn’n nun’n i bo. I sin’n, be ko suannin asɔnun kun m’ɔ yo aɲia mun Ɛsipaɲɔlu aniɛn’n nun’n i bo afuɛ blu tra su. Kɛ ɔ dili junman biolo ng’ɔ nian jasin fɛ’n bolɛ junman’n su’n i nun lele’n, i sin’n ɔ dili junman Komite ng’ɔ nian like klelɛ junman’n  su’n i nun. I sin ekun’n, ɔ dili junman Komite ng’ɔ nian jasin fɛ bolɛ junman’n su’n nun. Afuɛ 2022, Marsi nun’n, be sieli i Anuannzɛ’n i ɲrun dinfuɛ’m be Komite ng’ɔ nian jasin fɛ bolɛ junman’n su’n i ukafuɛ.

Aniaan bian Windɛɛ liɛ’n, be wuli i Mirieta. Etazinin lɔ lika nga be flɛ i kɛ Kalifɔɔnin’n i klɔ kun-ɔn. I si nin i nin be ti Zoova i Lalofuɛ. Yɛ be yoli i batɛmun afuɛ 1986, Marsi i le 29 nun. Anglo ng’ɔ suli i su’n nun’n, ɔ yoli cɛn kunngun atin bofuɛ. I sɔ yolɛ’n yoli i fɛ dan ti’n, w’a kunndɛman kɛ ɔ́ jrɛ́n i. Kɛ ɔ dili cɛn kunngun atin bolɛ junman’n lele’n, afuɛ 1986, Ɔktɔblu i le 1 ɔ kacili titi atin bofuɛ.

I nun mɔ Windɛɛ te yo gbanflɛn kan’n, ɔ ko niannin i niaan bian nɲɔn mɔ be di junman Betɛli lɔ’n be osu. Kɛ ɔ yoli sɔ’n, ɔ seli i wun kɛ sɛ ɔ yo kaklaka’n, ɔ́ dí junman Betɛli lɔ wie. Afuɛ 1990, Mɛ anglo’n nun’n, be flɛli i kɛ ɔ ko di junman Wɔlkili lɔ Betɛli’n nun.

Kɛ ɔ juli lɔ’n, ɔ dili junman biolo fanunfanun nun. I wie yɛle biolo ng’ɔ nian lika yɛinyɛin yolɛ’n su’n, nin biolo ng’ɔ nian Betɛli’n i fie’n su’n, ɔ nin biolo ng’ɔ nian Betɛlifuɛ’m be lika’n. Afuɛ 1997 nun’n, ɔ jali aniaan bla kun mɔ be flɛ i kɛ Anzela’n. Kɛ ɔ fɛ i lɛ’n be nɲɔn’n be di junman Betɛli lɔ. Afuɛ 2014 nun’n, be fa be ɔli Wɔɔwiki. Lɔ’n, aniaan bian Windɛɛ ukali aniaan nga be kplannin anuannzɛ’n i bo bia’n. Afuɛ 2016 nun’n, be fɛ i ɔli Anuannzɛ’n i Suklu ng’ɔ o Patɛɛsɔnun lɔ’n nun naan ɔ di junman kan be yi flimun nin video mun lɔ’n. Kɛ afuɛ nnan sinnin’n, be sali be sin Wɔɔwiki. Kpɛkun ɔ dili junman Komite ng’ɔ nian Betɛlifuɛ’m be su’n nun. Afuɛ 2022, Marsi nun’n, be sieli i Anuannzɛ’n i ɲrun dinfuɛ’m be Komite ng’ɔ nian Betɛlifuɛ’m be su’n i ukafuɛ.

É srɛ́ Zoova kɛ ɔ yra sran sɔ m’ɔ fa “mannin” e’n be su, naan be di Ɲanmiɛn Sielɛ’n i junman’n juejue su titi.—Efɛ. 4:8.