BAS wari Rabu, 18 Januari 2023, lit pengumumen si istimewa bas jw.org. I je ituriken kerna Turang Senina Gage Fleegle ras Jeffrey Winder enggo ilantik jadi anggota Badan Pinpinen Saksi-Saksi Jahwe. Duana turang senina e enggo ndekah ngelayani Jahwe alu setia.

Turang Senina Fleegle ipebelin bas Pennsylvania bagin barat, Amerika Serikat. Ia ipebelin orang tuana bas kebenaren. Sanga ia remaja, ia ras keluargana pindah ku sada kota si kitik si merluken terbuen perberita. La ndekah kenca si e, iperidiken ia bas tanggal 20 November 1988.

Lalap iahken orang tua Turang Senina Fleegle ia gelah ngelayani sepenuh waktu. Keluarga kalak e rusur ngundang pertua keliling ras anggota Betel ku rumahna janah banci idah Turang Senina Fleegle uga riahna ukur kalak e. La ndekah kenca iperidiken, mis ia merintis biasa bas tanggal 1 September 1989. Dua tahun kenca si e, banci ia ngelayani i Betel e me cita-cita si enggo banna sanga umurna 12 tahun. Mulai ia ngelayani bas Betel Brooklyn bulan Oktober 1991.

Bas Betel, Turang Senina Fleegle erdahin bas bagin penjilidan waluh tahun dekahna. Kenca si e, itugasken ia ku Departemen Dinas. Paksa si e, ngelayani ia bas runggun bahasa Rusia piga-piga tahun dekahna. Tahun 2006, erjabu ia ras Nadia, janah ras-ras kalak e ngelayani bas Betel. Kalak e pernah ngelayani bas runggun si nggunaken bahasa Portugis janah lebih sepuluh tahun bas runggun si nggunaken bahasa Spanyol. Kenca piga-piga tahun bas Departemen Dinas, Turang Senina Fleegle itugasken ku Kantor Panitia Pengajaren janah la ndekah kenca si e ku Kantor Panitia Dinas. Bas bulan Maret 2022, ilantik ia jadi sinampati Panitia Dinas arah Badan Pinpinen.

 Turang Senina Winder ipebelin i Murrieta, Kalifornia, Amerika Serikat. Ia ipebelin orang tuana bas kebenaren janah iperidiken tanggal 29 Maret 1986. Sebulan kenca si e, iputuskenna guna merintis ekstra. Meriah kel kapna merintis. Kenca piga-piga bulan, bas tanggal 1 Oktober 1986 jadi perintis biasa ia.

Sanga remaja, Turang Senina Winder ndahi dua abangna si ngelayani i Betel paksa si e. Si e erban merhat ia ngelayani i Betel adi enggo galang pagi ia. Bas bulan Mei 1990, iundang ia ku Betel Wallkill.

I Betel, Turang Senina Winder enggo erdahin bas erbage-bage departemen, termasuk Departemen Kebersihen, Departemen Pertanian, ras bas Kantor Betel. Erjabu ia ras Angela, tahun 1997, janah ras-ras kalak e ngelayani bas Betel. Tahun 2014, ipindahken kalak e ku Warwick. I je, Turang Senina Winder nampati bas bagin pembangunen fasilitas kantor pusat. Tahun 2016, pindah kalak e ku Pusat Pendidiken Menara Pengawal i Patterson, janah i je Turang Senina Winder erdahin bas Layanen Audio/Video. Empat tahun kenca si e, mulihken kalak e ku Warwick, janah Turang Senina Winder itugasken bas Kantor Panitia Personalia. Bas bulan Maret 2022, ilantik ia jadi sinampati Panitia Personalia arah Badan Pinpinen.

Ertoto kita gelah lalap ipasu-pasu Jahwe kalak e perban terus kerja keras ndukung kepentingen Kerajan.—Ep. 4:8.