PAHN Wenzdeh, Janiweri 18, 2023, wi mi poas wahn speshal anonksment pahn jw.org weh seh dat Brada Gage Fleegle ahn Brada Jeffrey Winder mi geh apointid fi serv az membaz a di Govanin Badi a Jehoava Witnisiz. Di too a dehnya faytful bradaz di serv Jehoava fi wahn lang taim.

Brada Fleegle payrents mi rayz ahn eena di chroot da Pennsylvania, U.S.A. Wen hihn da-mi wahn teenayja, ih famili mi moov da wahn smaal tong fi help preech di gud nyooz. Soon afta dat, hihn mi geh baptaiz pahn Novemba 20, 1988.

Brada Fleegle payrents doz aalwayz inkorij ahn fi serv Jehoava ful taim. Lata taim dehn yoostu hoas serkit oavaseeya ahn Betelaits da dehn hows. Sayka dis, Brada Fleegle kuda mi si how hapi dehndeh bradaz ahn sistaz mi feel eena Jehoava servis. Soh hihn mi staat regyula painyaa pahn Septemba 1, 1989—noh tu lang afta ih mi geh baptaiz. Too yaaz layta, ih mi reech wahn goal weh hihn mi set fan ih mi 12 yaaz oal—ih mi staat serv da Betel da Brooklyn eena Aktoaba 1991.

Brada Fleegle mi serv eena di Bindery da Betel fi ayt yaaz, ahn den afta dat dehn mi asain ahn tu di Servis Dipaatment. Rong da saym taim, ih mi serv eena wahn Russian langwij kangrigayshan fi wahn fyoo yaaz. Eena 2006, ih geh marid tu wahn sista weh naym Nadia, ahn shee staat serv da Betel lang wid ahn. Dehn mi serv tugeda eena di Portuguese teritori. Den fi oava ten yaaz, dehn mi serv eena di Spanish teritori. Brada Fleegle mi serv fi wahn lang taim eena di Servis Dipaatment, ahn den ih mi geh asain fi serv eena di Teechin Komiti Aafis ahn laytaraan eena di Servis Komiti Aafis. Eena Maach 2022, ih mi geh apointid fi  serv az wahn helpa tu di Govanin Badi Servis Komiti.

Brada Winder mi groa op da Murrieta, California, U.S.A. Ih payrents mi rayz ahn eena di chroot, an ih mi geh baptaiz pahn Maach 29, 1986. Ih mi staat agzilari painyaa di mont afta dat. Ih mi laik it soh moch dat ih kantinyu agzilari painyaa fi wahn wail. Den ih mi staat regyula painyaa pahn Aktoaba 1, 1986.

Wen Brada Winder da-mi wahn teenayja, hihn mi vizit ih too oalda breda weh mi-di serv da Betel rong dehn taim. Dat mi mek hihn waahn goh serv da Betel wen ih mi oal inof. Eena May 1990, ih mi geh fi gaahn serv da Betel da Wallkill.

Brada Winder mi en op di werk eena lata difrent dipaatment da Betel. Ih mi serv eena di Kleenin Dipaatment, di Faam Dipaatment, di Betel Aafis, an adaz. Hihn an ih waif, Angela, mi geh marid eena 1997, ahn fahn sins den dehn di serv da Betel tugeda. Dehn mi geh chransfer tu Warwick eena 2014, ahn Brada Winder mi help owt wid di kanschrokshan fi di nyoo werl hedkwaataz. Dehn mi moov tu di Watchtower Educational Center da Patterson eena 2016, wehpaat Brada Winder mi werk eena di Aadyo/Veedyo Dipaatment. Foa yaaz layta, dehn mi moov bak da Warwick, ahn Brada Winder mi werk da di Persnel Komiti Aafis. Eena Maach 2022, ih mi geh apointid fi serv az wahn helpa tu di Govanin Badi Persnel Komiti.

Wi pray dat Jehoava wahn bles dehnya “bradaz weh da laik gifs” az dehn kantinyu fi werk haad fi di Kingdom.—Ifee. 4:8.