LUAGU-ǗRÜWA 18 lidan eneru, irumu 2023, aba lichugún aban awisahani espechaliti luéigiñe jw.org: luagu iridúaaña lan bián íbirigu keisi lílana Sétanu le Arihibei lau Hawadigimari Gefentiña luagu Heowá, o Musu Úaraguati, Gage Fleegle luma Jeffrey Winder. Biángubei íbirigu ha barühaña saragu irumu eseriwida lun Heowá lau úaraguni.

Lóubawagu Pensilvania (Meriga) laweirida íbiri Fleegle. Lagübürigu arufudahabalin inarüni lun. Dan le meha nibureingili aba háguyun lagübürigu lidoun aban liraüraü aüdü le ñein lubéi lemegeirúa ídemuei lun lapurichihóun. Murusun dan lárigiñe, aba labadiseirun, weyu 20 lidan unsu-hati, irumu 1988.

Súnwandan meha hínchahani lagübürigu lun leseriwidun lun Heowá lidan dan dayarüti. Súnwandan meha hagunbirahaniña lagübürigu óunigirutiña sirkuitu hama betelitagu hábiñoun, ani ítara liña líchugun nibureinti le fe gunda hamá íbirigu ha. Gumeseti eseriwida kei prekursoru 1 lidan nefu-hati, irumu 1989, murusun dan lárigiñe labadiseirun. Ani bián irumu lárigiñe, aba lagunfulirun le layumahabei ladügün danme meha le duusu lubéi irumu lau: leseriwidun Betelirugu. Gumeseti eseriwida tidan Beteli to Brooklynboun lidan diisi-hati, irumu 1991.

Nadagimeinti widü irumu ñein lubéi lafidihoua tidáü líburu ani lárigiñe aba lichugún eseriwida lidan Departamentu lánina Eseriwiduni. Lidan dan ligía seriwiti lidan damuriguaü le ñein lubéi layanuhóua rusu. Lidan irumu 2006, aba lamarieidun tuma íbiri Nadia, ani lúmagiñe dan ligía heseriwiduña úara Betelirugu. Biángubei hagía seriwitiña lidan damuriguaü portugési ani seriwitiña giñe lóugiñe diisi irumu lidan damuriguaü chumagü. Lárigiñe saragu irumu lau íbiri Fleegle eseriwida lidan Departamentu lánina Eseriwiduni, aba lichugúniwa eseriwida tidan Áfisi lani Sétanu le Arihibei lau Arufudahani ani lárigiñe, tidan Áfisi to ñein lubéi Sétanu le Arihibei lau Eseriwiduni. Lidan ǘrüwa-hati, irumu 2022, aba liridún kei ídehati lidan Sétanu lánina Eseriwiduni lani Musu Úaraguati.

 Ánheinti íbiri Winder, Murrieta (Kalifornia) laweirida. Kei gefentiña lubéi luagu Heowá lagübürigu aba harufudahani inarüni lun, ani badiseiti 29 lidan ǘrüwa-hati, irumu 1986. Aban hati lárigiñe aba lagumeserun eseriwida kei prekursoru ídehati, wéiriti línsiñe eseriwiduni le lun darí lun mabuseerun lan lígiruni. Fiu hati lárigiñe, 1 lidan diisi-hati, irumu 1986, aba lagumeserun eseriwida sunsuinagubei kei prekursoru.

Dan meha le nibureingili íbiri Winder aba lidin abisidahaña bián líbugañanu Betelirugu, ha meha eseriwidubaña ñein dan ligía. Adügati katei ligía lun labusenrun labuinchagüdün gárada danme gúnfuli laali irumudiri lun leseriwidun Betelirugu. Lidan seingü-hati, irumu 1990 aba lagunbirahóun lun leseriwidun tidan Beteli to Wallkillboun.

Gíbeti ámuñegueinarügü dasi le íchugubei lun ñein, kéiburi, nadagimeinti lidan burí Departamentu lánina Arumadahani, Departamentu lánina Hagüriahóun Animaalu luma tidan Áfisi to tani Beteli. Lidan irumu 1997 aba lamarieidun tuma Angela, ani lúmagiñe dan ligía heseriwiduña úara Betelirugu. Lidan irumu 2014 aba lóunahoun íbiri Winder eseriwida Warwick, le ñein lubéi lídehan lidan tábunawagun Áfisi hani gefentiña luagu Heowá to arihiboun lau apurichihani lidan sun Ubóu. Lidan irumu 2016 aba láguyun Patterson, le ñein tubéi tani Watchtower Leskuela (Newayóru), ñein nadagimeinti lidan Sétanu le Arihibei lau Gürawárua tan Agumeiraguagüdüni luma Bidéu. Gádürü irumu lárigiñe aba hagiribudun Warwick, aba lichugún íbiri Winder lun leseriwidun tidan Áfisi to ñein lubéi Sétanu le Arihibei hau Eseriwidutiña Betelirugu. Ani lidan ǘrüwa-hati, irumu 2022, aba liridún kei ídehati lidan Sétanu le Arihibei hau Eseriwidutiña Betelirugu Ha íderagubalin Musu Úaraguati.

Aban idewesei wügüriña ha woun lúmagiñeti Heowá (Efe. 4:8). Furíeitiwa lun labiniruniña Heowá luagu óunwenbu wadagimanu le hadügübei luagu Larúeihan.