Kaʼiʼ qachʼalal ri kʼa xeʼok chpan ri Molaj Ukʼwäy Bʼey
RI MIÉRCOLES 18 de enero rchë 2023, xyaʼöx jun rutzjol chpan jw.org: ri qachʼalal Gage Fleegle chqä Jeffrey Winder xeʼok chpan ri Molaj Ukʼwäy Bʼey kichë ri Testigos de Jehová. Che kaʼiʼ ryeʼ kan kʼïy chik junaʼ kiyaʼon pä ruqʼij Dios.
Gage Fleegle chqä ya Nadia, ri rixjayil
Ri qachʼalal Fleegle xkʼïy pä pa oeste che rä Pensilvania (Estados Unidos). Ryä xtamaj chrij Jehová kikʼë ruteʼ rutataʼ. Taq kʼa kʼajol na, ryeʼ xebʼä chpan jun koʼöl tinamït ri akuchï nkʼatzin wä más toʼïk rchë ntzjöx le Biblia. Jbʼaʼ chrij riʼ, pa 20 de noviembre rchë 1988, xqasäx pa yaʼ.
Ri ruteʼ rutataʼ ronojel mul nkiʼij wä che rä chë tksaj rukʼaslemal rchë nuʼän rusamaj Jehová. Ryeʼ yekiskʼij wä ri betelitas chkachoch chqä ri ukʼwäy taq bʼey rchë circuito, ke riʼ xqʼalajin chwäch ryä chë re qachʼalal reʼ kan kiʼ kikʼuʼx. Ri 1 de septiembre rchë 1989, taq kʼa riʼ jbʼaʼ qasan pa yaʼ, xok precursor regular. Y kaʼiʼ junaʼ chrij riʼ xkowin xuʼän ri xyaʼ chwäch taq 12 wä rujunaʼ: xok pa Betel. Ryä xchäp rusamaj chpan ri Betel ri kʼo Brooklyn pa octubre rchë 1991.
Chriʼ xsamäj wä 8 junaʼ rchë nuyaʼ rij qapublicaciones, y chrij riʼ xkiqʼaxaj chpan ri Departamento rchë Servicio. Chpan ri tiempo riʼ, ryä xtoʼon jun kayoxiʼ junaʼ chpan jun congregación ri yetzjon ri chʼaʼäl ruso. Ryä xkʼleʼ rkʼë ya Nadia pa 2006, y kan chpan ri junaʼ riʼ kʼa komä, ryeʼ junan ye kʼo pa Betel. Che kaʼiʼ xetoʼon chpan ri congregaciones ri yetzjon portugués, y xetoʼon 10 junaʼ chpan ri congregaciones ri yetzjon kaxlän. Taq rukʼwan chik kʼïy junaʼ chpan ri Departamento rchë Servicio, ri qachʼalal Fleegle xqʼaxäx chpan ri Oficina rchë ri Comité rchë Enseñanza y chrij riʼ chpan ri Oficina rchë ri Comité rchë Servicio. Pa marzo rchë 2022 xok jun chkë ri ntoʼö ri Comité rchë Servicio rchë ri Molaj Ukʼwäy Bʼey.
Jeffrey Winder chqä ya Angela, ri rixjayil
Ri qachʼalal Winder xkʼïy pä chpan ri tinamït Murrieta (California). Ryä xtamaj chrij Jehová kikʼë ruteʼ rutataʼ ri ye Testigos, y xqasäx pa yaʼ ri 29 de marzo rchë 1986. Jun ikʼ chrij riʼ xchäp ri precursorado auxiliar, y rma kan kowan xqä chwäch, ma xyaʼ ta qa. Jojun ikʼ chrij riʼ, pa 1 de octubre rchë 1986, xok precursor regular.
Taq kʼa kʼajol na, ri qachʼalal Winder xerubʼechʼaʼej kaʼiʼ runmal ri ye kʼo wä pa Betel. Ya riʼ xbʼanö che rä ryä rchë xyaʼ chwäch nunujsaj rusolicitud taq xtapon rujunaʼ ri xtkowin xtuʼän riʼ. Pa mayo rchë 1990 xskʼïx pa Betel ri kʼo Wallkill.
Chriʼ kan jalajöj rusamaj xyaʼöx. Ryä xsamäj chpan ri Departamento rchë Limpieza, chpan ri Departamento rchë Hacienda y chpan ri Oficina rchë Betel. Pa 1997 xkʼleʼ rkʼë ya Angela, y kan chpan ri junaʼ riʼ kʼa komä, ryeʼ junan ye kʼo pa Betel. Pa 2014 ryeʼ xeqʼaxäx Warwick, ri akuchï ri qachʼalal Winder xtoʼon rchë xyak ri central mundial. Chpan ri junaʼ 2016 xeqʼax Patterson, chpan ri Centro Educativo rchë ri Watchtower. Chriʼ xsamäj wä chpan ri Servicios rchë Audio y Video. Kajiʼ junaʼ chrij riʼ xetzolin Warwick, y ri qachʼalal Winder xqʼaxäx chpan ri Oficina rchë ri Comité rchë Personal. Pa marzo rchë 2022 xok jun chkë ri ntoʼö ri Comité rchë Personal rchë ri Molaj Ukʼwäy Bʼey.
Re kaʼiʼ qachʼalal reʼ kan ye jun spanïk ri ruyaʼon pä Jehová chqë (Efes. 4:8). Röj nqaʼij che rä Jehová chë tyaʼ utzil pa kiwiʼ rma ri samaj najin nkiʼän rchë nkitoʼ Ruqʼatbʼäl Tzij.
