Nët Tak Minā Tö Tūfömngöre Yōm La-en
HANG ök ispēsöl niūs in vahë ik Wednesday, 18 Chönvörī, 2023, öi el ngam jw.org, vënyu nang ayī-ö tö nā Prötör Kēch Flīköl hēk Chīôfrī Vintör nö la-evṙen ngaich nö in ngam Yōm la-en më Vamënyen Yāvē. Tö marò-ôten nan nā prötör hēk tö chiplö nö i linökö lōn Yāvē.
Kēch Flīköl hēk tö ngam pīhö ò Natiā
Lā vest Pensilvēnia inruklö ang Prötör Flīköl i Amerika, nëtre tak nak yöng ò nö Vamënyen Yāvē. Ik sā ò nö ṙömöng ṙālö, ngaich in ök tö kun elpanam ngam mikūönö cha nö iyöng ngam tö lōnu tö ma-ahangkö ngam tölöök inhānga. Unôichrit e hēk anga-aṅ nö kē ngam vīnôkö ik 20 Nòvempör 1988.
Örheūheu minā yöng prötör Flīköl nö ṙūöhlö alaha ò nö keuheūttö ṙētakre nö löklōn Yāvē. Chöngṙen nan minā yöng ò nö hachūöklen yip sörkit ovörsīör hēk yip prötör sistör inrē aṅ el Pětēl nö i patīre. Meuk ngam ṙanamölōn më prötör sistör ang prötör Flīköl. Unôichrit ngam vinôköre hēk anga-aṅ nö ilöören nö Rultenre nö painīör ik 1 Septempör, 1989. Ilööṙen hēk anga-aṅ unôichrit ngam tö nët samyeūheu nö havëka nö la-evṙen el Pětēl i Pruklin ik Òktopör 1991. Ngam kuilōn ò nö la-evṙen el pětēl ik sā ò nö 12 samyeūheu töng ngaich angū-ö.
Hëvhöre Samyeūheu rò-ôten ang Prötör Flīköl nö la-evṙen nö el chūök mö print nö la-entö Paintrī. Unôichrit e hēk anga-aṅ nö tölöṙô nö la-evṙen nö el Sörvis Tīpatmen. Fömngöreṙen anga-aṅ nö samyeūheuv nö la-evṙen el ngam ṙamôtö elô Rūs māṅ. Hapīhö anga-aṅ nö in sistör Nadīa ik 2006. Holṙen re ngaich cha-a nö la-evṙen nö el pětēl. Holṙen re inrē cha-a nö la-evṙen el ngam māṅ ṙamôtö elô Portūkis hēk pōyen tö tö söm samyeūheu nö la-evṙen nö el ngam māṅ ṙamôtö elô Ispenis. Unôichrit Prötör Flīköl nö la-evṙen nö el ngam Sörvis Tīpatmen ngaich tölöṙô hēk anga-aṅ nö la-evṙen nö el ngam Tīching Kömitī unôichrit e hēk anga-aṅ nö el ngam Sörvis Tīpatmen. Vīlöng ngaich anga-anö hamòlṙen më Yōm La-en ik Māch 2022.
Chīôfrī Vintör tö ngam pihö ò, Ēnychöla
Tö haruklöng ön Prötör Vintör nö im panam Muriētā, Kelifornīa i Amerika. Löktö in nak yöngre anga-aṅ nö teungen töm kanô-en. Ik 29 Māch 1986 ngaich anga-aṅ nö vōkö. Ilööṙen anga-aṅ nö kētöre im tahëng chingëṅt nö òksölörī painīör. Ṙamlōn anga-aṅ nö la-evṙen töm la-enre lökten nö iṙūöhen. Unôichrit ò ngaich nö chumngëṅtu rò-ôten nö òksölöri painīör, kētöre ngaich anga-aṅ nö im rikulör painīör ik 1 Òktopör, 1986.
Ik sā Prötör Vintör nö römöng ṙālö, ngaich nët tak hē-e nak mëm ò töla-evṙen nö el pětēl. Hěng van anga-aṅ nö chuh el pětēl nö meuk kūö cha, ṙamölōn anga-aṅ nö meuk inlahen minā mëm re nö la-evṙen nö el pětēl lökten ngaich anga-aṅ nö afēkö inlahenre nö hòṅ la-evṙen inrē nö el pětēl. Havëtu ngaich anga-aṅ ik 1990 nö la-evṙen el pětēl i Vòlkil.
Ṙòlkangen minë tīpatmen chūök Prötö Vintör nö la-evṙen el Pětēl, Klīning Tīpatmen, Fām Tīpatmen, hēk el Pětēl Òfis inrē. Hapīhö ngaich anga-aṅ nö ik 1997 nö in sistör Ënychöla hēk holṙen ngaich cha-a nö la-evṙen nö el Pětēl. Söömi hēk cha-a nö chuh Vòrvik im völt hetkòtör ik 2014, in e ang Prötör Vintör nö holṙen yip ma-māna. Tīni hēk anga-aṅ ik 2016 nö chuh el ngam Vòchtavör Echukēsönölön Sentör i Petörsön nö el ngam Òtiō/Vitiō Sörvis, hēk cha-a nö havan unôichrit tö 4 samyeūheu nö havëka nö chuh Vòrvik. La-evṙen hēk anga-aṅ nö im Pörsönöl Kömitī Òfis. Vīlöng hēk ang Prötör Vintör ik Māch 2022 nö hamòlṙen yip Yōm La-en Pörsönöl Kömitī.
“Inlōntī nö i tarik” nan nā prötör nö lamöktö in Yāvē. Vë-elkui cha in tö Yāvē nö örheūheu nö kētö inkòlò minë la-en cha nö ṙūöhnyö ngam la-en inhangkö ngam pūlngö.—Efi. 4:8.