LIAMATATU 18 Janeiro, 2023, katwile umwe mutambi walipwila ha jw.org, ngwo, ndumbu Gage Fleegle ni Jeffrey Winder kaatongola hanga alinge chihanda mu Chizavu cha Tusongo cha Yela ja Yehova. Eswe aali, kakulingila Yehova ni ushishiko ha miaka yinji.

Ndumbu Fleegle kakolelele ku Oeste ya Pensilvânia, mu Estados Unidos; yisemi jenyi no kali Yela ja Yehova. Muze te uchili mukweze, asoko jenyi yalukila mu yimwe mbonge yikehe muze te munafupiwa ukwaso. Ha kupalika cha mashimbu akehe, yamupapachisa ha 20 ya Novembro, 1988.

Yisemi ja ndumbu Fleegle, kapwile ni kumukolweza mashimbu eswe hanga anjile mu mulimo wa shimbu lieswe. Ayo te kakutambula ku zuwo lio tulayi a mbonge ni Mambetelita, chino chakwashile ndumbu Fleegle kumona uwahililo uze apwile nawo mandumbu wano. Ha mashimbu akehe wika muze te hamupapachisa, iye yapwa pionelu wa shimbu lieswe—ha 1 Setembro, 1989. Ha kupalika cha miaka yaali, yamanununa yize atesele muze te ali ni miaka 12—yanjila mu mulimo wa Mbetele. Kaputukile kukalakala ku Mbetele ya ku Brooklyn ha Outubro 1991.

Ku Mbetele, ndumbu Fleegle yakalakala ha miaka nake ku makina akuchinga mafwo ni kwapwisa mikanda, hanyima yaya ni kukalakala ku chipatulo cha Serviço. Ha mashimbu jacho, yakwasa chikungulwila cha limu lia Rússia ha yimwe miaka. Ha 2006, yalimbata ni mukwo-pwo Nadia, yoze neye atayijile hanga akalakale ku Mbetele. Ayo eswe aali, te hanakalakala mu njiza ya limi lia putu ha miaka kuliana 10 ni mu limi lia espanhol. Hanyima lia kukalakala ha miaka yinji ku Serviço, ndumbu Fleegle yamutongola hanga akalakale mu chipatulo cha Komite ya Ensino, mba kulutwe yakalakala mu chipatulo cha Komite ya Serviço. Ha Março ya  2022, yamutongola ngwe Chikwashi wa mu Komite ya Serviço ya Chizavu cha Tusongo.

Ndumbu Winder, kakolelele mu Murrieta, California mu Estados Unidos ya América. Yisemi jenyi e amulongesele umwenemwene, mba yamupapachisa ha 29 Março, 1986. Ha kakweji yoze wahachileho, yaputuka kukalakala ngwe pionelu wa shimbu likehe. Iye kawahililile chinji ha kulinga chino, mba yazanga kununga mu mulimo wacho. Kulutwe lia kukalakala ngwe pionelu wa shimbu likehe ha amwe tukweji, yapwa pionelu wa shimbu lieswe ha 1 Outubro, 1986.

Muze te uchili mukweze, ndumbu Winder yaya ni kumeneka mandumbu aali tushinakaji waze te akukalakala ku Mbetele ha shimbu liacho. Kumeneka mandumbu jacho, yichimukwasa kuzanga kuya ku Mbetele muze te makola. Mba ha Maio ya 1990, yamusanyika ku Mbetele ya Wallkill.

Ku Mbetele, ndumbu Winder te kakukalakala ku yipatulo yinji, kuchingako chipatulo cha kukomba-komba, ku Fazenda ni ku Lar ya Mbetele. Ha mwaka 1997, yalimbata ni mukwo-pwo Angela, ayo eswe yanunga ni kukalakala ku Mbetele ndo musono. Ha 2014, yamutuma ku Mbetele ya Warwick, kuze ndumbu Winder akwashile kutunga chishina chinene. Ha 2016, yaatuma ku Mbetele ya Patterson, kuze ndumbu Winder akalakalile mu Chipatulo cha Audio/Video. Ha kupalika cha miaka yiwana, yafuna ku Warwick, mba ndumbu Winder yamutongola hanga akalakale mu Chipatulo cha Komite ya Pessoal. Ha Março 2022, yamutongola ngwe Chikwashi wa mu Komite ya Pessoal ya Chizavu cha Tusongo.

Tunanungu ni kulemba hanga Yehova awahise mandumbu wano anunge ni kukwasa milimo ya Wanangana.—Efwe. 4:8.