2023, January 18, Nithum Ni ah jw.org ah a biapimi thawngthanhnak pakhat taar a rak si. Unaupa Gage Fleegle le Unaupa Jeffrey Winder cu Jehovah Tehte Hna i Uktu Bu chung tel in rian pek an si timi thawngthanhnak a si. An pahnih ning in zumhfek tein Jehovah rian an ṭuannak cu kum tampi a si cang.

Unaupa Fleegle cu U.S.A, chaklei Pennsylvania ah a ṭhangmi a si i a nu le a pa thawng in biatak a hngalmi a si. Kumhra fai a si lioah an chungkhar ning in thawngthanhtu a herh deuhnak hmun a simi khuate pakhat ah an rak i ṭhial. Mah hnu tlawmpal 1988, November 20 ah tipil a ing.

Unaupa Fleegle cu a nu le a pa nih caan tling rian ṭuan ding in tha an pek zungzal. Peng zohkhenhtu hna le Bethel ah rian a ṭuanmi hna kha an inn ah an sawm lengmang hna i Unaupa Fleegle nih unau pawl zeitluk in dah an i nuamh ti kha a hmuh. Tipil a in hnu tlawmpal 1989, September 1 in hmaanhmaan hmaikal a hun ṭuan. Kum hnih hnu ah kum 12 a rak si lio i a saduhthah bantuk in Bethel ah rian a hun ṭuan kho. 1991, October ah Brooklyn Bethel ah rian a hun ṭuan.

Kumriat chung cauk ṭhitnak ah rian a ṭuan i a hnu ah Rianṭuannak Department ah rian pek a si. Mah caan chung ah Russia holh a hmangmi Khrihfabu ah aa pum. 2006 ah Bethel ah rian a ṭuan vemi Nadia he an i um. An pahnih in Portugal holh a hmangmi lohmun ah rian an ṭuan i Spain holh a hmangmi lohmun ah kumhra leng an i tel. Rianṭuannak Department ah kum saupi a ṭuan hnu ah Unaupa Fleegle cu Cawnpiaknak Kawmiṭi le a hnu ah Rianṭuannak Kawmiṭi ah rian pek a si. 2022, March ah Uktu Bu i Rianṭuannak Kawmiṭi bawmtu in rian pek a si.

Unaupa Winder cu U.S.A, California, Murrieta ah a ṭhangmi a si. Biatak chung ah a ummi a nu  le a pa thawng in biatak a hngalmi a si i 1986, March 29 ah tipil a ing. A hmai thla ah manhcaan hmaikal rian ṭuan ding in biakhiahnak a tuah. Aa nuamh tuk caah peh chap a duh. Manhcaan hmaikal thla tampi chung a ṭuan hnu ah 1986, October 1 ah hmaanhmaan hmaikal a hun ṭuan.

Kumhra fai a rak si lioah Bethel ah rian a ṭuanmi a ule pahnih sinah a rak leng hna. Mah nih a upat tikah Bethel ah rian ṭuan duhnak lungput a ngeihter. 1990, May ah Walkhill Bethel ah rian ṭuan ding in sawm a si.

Bethel ah Unaupa Winder cu Inn Thiannak Department, Lo Tuahnak Department le Bethel Zung ti bantuk department tampi ah rian a ṭuan. 1997 ah Angela he an i um i Bethel ah rian an ṭuanṭi. 2014 ah Warwick ah an i ṭhial i Unaupa Winder cu vawleicung pumpi innsaknak ah rian pek a si. 2016 ah Patterson i Vennak Innsang Fimcawnnak ah an i ṭhial i Unaupa Winder cu Audio/Video lei ah rian a ṭuan. Kumli hnu ah Warwick ah an rak kir ṭhan i Unaupa Winder cu Rianṭuantu Kawmiṭi ah rian pek a si ṭhan. 2022, March ah Uktu Bu i Rianṭuantu Kawmiṭi ah bawmtu in rian pek a si.

Jehovah nih minung “laksawng” in a kan pekmi mah pa hna nih Pennak caah fakpi in rian an ṭuan peng caah thluachuah tampi pe ko hna seh tiah thla kan campiak hna.—Efe. 4:8.