MERKREDI le 18 Zanvye 2023, i ti annan en lanons spesyal lo jw.org ki ti dir ki Frer Gage Fleegle ek Frer Jeffrey Winder ti’n ganny apwente konman manm lo Konsey Direkter Temwen Zeova. Tou le de frer in servi Zeova fidelman pour en kantite letan.

Frer Fleegle ti grandi les Pennsylvania, Leta-z-ini e son paran in elve li dan laverite. Ler i ti en adolesan, son fanmir ti al reste dan en pti lavil kot i ti annan bezwen pour plis proklanmater. Pa bokou letan apre sa, le 20 Novanm 1988, i ti batize konman en Temwen Zeova.

Paran Frer Fleegle ti toultan ankouraz li pour fer servis a plen tan. Souvandfwa, zot ti envit bann sirveyan rezyonal ek bann Betelit dan zot lakour e Frer Fleegle ti kapab vwar ki sa bann frer ek ser ti zwaye. Pa bokou letan apre ki i ti’n batize, le 1 Septanm 1989, i ti konmans son servis konman en pionye ordiner. De-z-an apre sa, i ti atenn sa lobzektif ki i ti’n annan depi ki i ti annan 12 an e sa i pour servi dan Betel. An Oktob 1991, i ti konmans servi dan Betel Brooklyn.

Dan Betel, i ti travay dan seksyon Bindery pour wit an e apre sa i ti al servi dan Departman Servis. Pandan sa letan, i ti dan en kongregasyon ki koz Larisi pour detrwa lannen. An 2006, i ti marye avek Nadia e apre sa Nadia ti vin servi ansanm avek li dan Betel. Ansanm zot in ede dan teritwar ki koz Portige e pour plis ki di-z-an, zot in ede dan teritwar ki koz Espanyol. Apre ki Frer Fleegle ti’n servi pour plizyer lannen dan Departman Servis, i ti al servi dan Biro Komite Lansennyman e pli tar dan Biro Komite Servis. An Mars 2022, i ti ganny apwente konman en asistan lo Komite Servis pour Konsey Direkter.

 Frer Winder ti grandi Murrieta, Kaliforni, Leta-z-ini. Son paran ti elve li dan laverite e i ti batize le 29 Mars 1986. En mwan apre son batenm, i ti deside pour konmans fer pionye asistan. I ti sitan kontan sa servis ki i ti anvi kontinyen. Alor le 1 Oktob 1986, i ti konmans servi konman en pionye ordiner apre ki i ti’n fer pionye asistan pour plizyer mwan.

Ler Frer Winder ti en adolesan, i ti al vizit son de gran frer ki ti pe servi dan Betel. Sa vizit ti fer li anvi antre dan Betel li osi e an Me 1990, i ti ganny envite pour al servi dan Betel Wallkill.

Dan Betel, Frer Winder ti travay dan diferan departman, enkli dan Departman pour netwaye, lo laferm Betel e osi dan lofis Betel. An 1997, i ti marye avek Angela e depi sa letan, zot tou le de zot pe servi dan Betel. An 2014, Frer Winder ek son madanm ti al reste Warwick e laba Frer Winder ti ede dan konstriksyon bann batiman pour biro prensipal. An 2016, zot ti al reste Watchtower Educational Center ki sitye Patterson e laba Frer Winder ti travay dan servis odyo ek video. Kat-r-an pli tar, Frer Winder ek son madanm ti retourn reste Warwick, kot Frer Winder ti al servi dan Biro pour Komite Personnel. An Mars 2022, i ti ganny apwente konman en asistan lo Komite Personnel pour Konsey Direkter.

Nou priye ki Zeova i beni sa bann zonm ki en “kado” anmezir ki zot travay dir dan lentere Rwayonm Bondye.—Efe. 4:8.