AME lo Draihnacian 18 Januare 2023, hna mama la ketre ithuemacany ngöne jw.org. Kola qaja ka hape, ase hë acili trejin Gage Fleegle me Jeffrey Winder troa hane nyiatrene la Lapa Ne Xomi Meköt Ne La Itretre Anyipici Iehova. Nyimu macatre hë ne nyihlue i Iehova nyidro.

Hnei trejin Fleegle hna tru ngöne la götrane kuë ne Pennsylvanie (Etazini), nge hna hetru nyidrë hnene la kem me thine i nyidrë ka Temoë Iehova. Ame lo nyidrëti a jeune, hnei nyidrë me fami nyidrë hna fek kowe la ketre neköi traon ka aja ixatua. Tha hmitre ju kö, nge nyidrëti a xomi bapataiso, lo 20 Nofeba 1988.

Hnene la kem me thine i nyidrë hna ithuecatre koi nyidrë, troa huliwa Iehova drai ka pexej. Hnei angatr palahi hna kapa ngöne la hnalapa, la itretre thupë sirkoskripsio me itre trejin ka huliwa ngöne la Bethela. Matre öhne catre trejin Fleegle, la madrine ka ej thene la itre trejine cili. Thupene la hnei nyidrë hna xomi bapataiso, hnei nyidrë hna xome la huliwa ne pionie lapa, lo 1 Semitrepa 1989. Lue macatre thupen, hnei nyidrë hna eatrëne lo aja i nyidrëti ekö, lo nyidrëti a 12 lao macatre, ene la troa huliwa ngöne la Bethela. Ame lo Okotropa 1991, nyidrëti ha huliwa ngöne la Bethela e Brooklyn.

Ame ngöne la Bethela, hnei trejin Fleegle hna huliwa koi 8 lao macatre ngöne la hnë cai tus. Thupene lai, hna xomi nyidrë troa huliwa ngöne la Biero Thatraqane La Huliwa Ne Cainöj. Ngöne la ijine cili, hnei nyidrëti hna sine la ekalesia ka qene russe koi nyimu macatre. Ame lo 2006 hnei nyidrëti hna faipoipo me Nadia, nge eahlo fe hë a huliwa ngöne la Bethela. Hnei nyidroti hna ce huliwa ngöne la ekalesia ka qene portugais, nge thupen, 10 jë kö lao macatre hnei nyidro hna ce huliwa ngöne la ekalesia ka qene espagnole. Thupene la itre macatre ne huliwa ngöne la Biero Thatraqane La Huliwa Ne Cainöj, hna upi nyidrë troa huliwa ngöne la Komite Göi Ini. Thupene lai,  ngöne la Komite Göi Huliwa. Lue komite lai ne la Lapa Ne Xomi Meköt. Ame hë lo Maac 2022, atre ixatua hë nyidrë ngöne la Komite Göi Huliwa.

Hnei trejin Winder hna tru e Murrieta (Californie). Hna hetru nyidrë ngöne la nyipici. Nge hna bapataiso nyidrë, lo 29 Maac 1986. Ame lo treu thupen, hnei nyidrë hna xome la huliwa ne pionie ka ixatua. Madrine catre nyidrë, matre hnei nyidrë hna mekun troa lapa ngöne la huliwa cili. Thupene la itre treu ne xome la huliwa ne pionie ka ixatua, hnei nyidrëti hë hna xome la huliwa ne pionie lapa, lo 1 Okotropa 1986.

Ame lo nyidrëti a jeune, hnei nyidrëti palahi hna tro troa wange la lue mama i nyidrë, ka huliwa ngöne la Bethela. Celë hi ka thue aja i nyidrë troa hane huliwa elany ngöne la Bethela. Ame hë lo Mei 1990, hna hane hë nyidrë troa huliwa ngöne la Bethela e Wallkill.

Ame ngöne la Bethela, hnei trejin Winder hna huliwa ngöne ménage me ngöne la hnë axö öni, me ngöne la bureau du Béthel. Ame lo 1997, hnei nyidrëti hna faipoipo me Angela, nge nyidroti hë a ce huliwa ngöne la Bethela. Ame lo 2014, hna upi nyidroti a tro Warwick, troa xup la Bethela. Ame hë lo 2016 hnei nyidroti hna fek a tro Patterson, lo Centre d’enseignement des Témoins de Jéhovah. Hnei trejin Winder hna huliwa ngöne la hnë kuci audio-vidéo. Foa lao macatre thupen, hnei nyidroti hna bëeke hmaca a tro Warwick, nge hna upi trejin Winder troa huliwa ngöne la Komite Thatraqane La Bethela, ketre komite ne la Lapa Ne Xomi Meköt. Ame hë lo Maac 2022, hna acili nyidrë troa atre ixatua ne la komite cili.

Easa sipo Iehova troa amanathithine la “itre ahnahna” cili, ka huliwa catr kowe la Baselaia i Nyidrë.​—Efe. 4:8.