Tu baala di kon aini a kulu fu den baala di e tii a wooko
DIIDEWOOKO 18 yanuari 2023, den baala be poti a jw.org taki baala Gage Fleegle anga Jeffrey Winder kon aini a kulu fu den baala di e tii a wooko a hii goontapu. A omen yali kaba den baala ya e dini Yehofa anga den hii ati.
Baala Gage Fleegle anga en uman Nadia
Baala Fleegle kiya na a west se fu Pennsylvania na a Ameekankondee. En dda anga en mma be lobi a waaleiti. Di a be moo nyoni, den sama fi en be foloisi go tan a wan pikin foto a pe moo peleikiman be de fanowdu. Aa langa seefi neen a dopu a 20 november 1988.
En mma anga en dda be gi en taanga-sikin fu du a fuuten diniwooko. Den be lobi kai den kelen-owluman anga den sama di e wooko a Betel kon a den osu. Baala Fleegle be si taki den sama ya de koloku tuutuu. Aa langa di a dopu, neen a bigin du a kowownu-pionili wooko a 1 september 1989. Baka tu yali, neen a doo a maiki di a be poti di a be abi 12 yali. A be fende a kai fu go wooko a Betel. A be bigin wooko na a Betel fu Brooklyn aini oktober 1991.
Baala Fleegle wooko aitin yali a pe den e doloki buku a Betel. Bakaten a go wooko na a Diniwooko Kantoo. A ten de a be de wantu yali aini wan kemeente pe den e taki Rosiyatongo. Aini 2006 a toow anga en uman Nadia. Bakadati Nadia bigin wooko a Betel tu. Den be de aini wan Potogisitongo kemeente. A moo enke 10 yali langa den be de aini wan Sipanyootongo kemeente tu. Baka omen yali di baala Fleegle wooko na a Diniwooko Kantoo, a be fende a gaandi fu go wooko na a Leli Komte. Bakaten a be fende a gaandi fu wooko na a Diniwooko Komte. Aini maart 2022, a toon wan yeepiman fu a Diniwooko Komte fu den baala di e tii a wooko.
Jeffrey Winder anga en uman Angela
Baala Winder kiya a Murrieta California na a Ameekankondee. En mma anga en dda kiya en a waaleiti. A dopu a 29 maart 1986. Wan mun baka di a dopu, neen a bigin du a yeepi-pionili wooko. Ná pikin lobi a be lobi a wooko ya. Neen meke a be wani du moo. Baka di a du a yeepi-pionili wooko wantu mun, neen a toon wan kowownu-pionili a 1 oktober 1986.
Di baala Winder be moo yonkuu, a be go luku tu gaan baala fi en di be e wooko a Betel. A sani ya meke enseefi be wani go wooko a Betel tu. Aini mei 1990, a be fende a kai fu go wooko na a Betel fu Wallkill.
A omen sowtu wooko baala Winder du a Betel. A be e kiin peesi, a be e paandi sani. A be e wooko a wan fu den kantoo tu. En anga en uman Angela toow aini 1997. Fanafu di den toow neen den tu man e wooko a Betel. Aini 2014 den foloisi go a Warwick. Baala Winder be e yeepi anga a bow-wooko fu a edekantoo. Aini 2016 den foloisi go na a Waktitoren Skoro Centrum a Patterson. Baala Winder be bigin wooko na a pisi pe den e seeka poku anga felon. Baka fo yali neen den foloisi go a Warwick baka. A so baala Winder be bigin wooko na a Wookoman komte. Aini maart 2022, a toon wan yeepiman fu a Wookoman komte fu den baala di e tii a wooko.
Ai bigi giw taki Yehofa ‘poti mannengee na a kemeente di sabi du son sani’, bika den e wooko taanga fu holibaka gi a Kownukondee fu Gadu.—Efe. 4:8.
