KE WEDNESDAY, January 18, 2023, akpan ntọt ama odu ke jw.org. Ẹkedọhọ ke ẹma ẹmek Brọda Gage Fleegle ye Brọda Jeffrey Winder ẹsịn ke otu mbon Otu Emi Ẹsede Ẹban̄a Utom Mme Ntiense Jehovah. Brọda iba emi ẹsọn̄ọ ẹda ẹnam n̄kpọ Jehovah ke ata ediwak isua.

Brọda Fleegle okokpon ke edem usoputịn Pennsylvania ke U.S.A. Ete ye eka esie emi ẹbakde Abasi ẹkebọk enye. Ini Brọda Fleegle edide ekpri akparawa, enye ye mbonubon esie ẹma ẹwọrọ ẹka ekpri obio-in̄wan̄ emi ẹkeyomde-yom mme ọkwọrọikọ. Esisịt ini ke oro ebede, enye ama ana baptism ke November 20, 1988.

Ete ye eka Brọda Fleegle ẹma ẹsidọhọ enye anam utom ofụri ini ọnọ Abasi. Mmọ ẹma ẹsiwak ndikot mme esenyịn circuit ye mbon Bethel ufọk, ndien Brọda Fleegle ama esikụt nte esịt ekesinemde nditọete irenowo ye iban oro. Esisịt ini ekebe ke enye ama akana baptism, enye ama ọtọn̄ọ usiakusụn̄ ofụri ini ke September 1, 1989. Isua iba ekebe, enye ama aka Bethel. Tọn̄ọ ini enye edide isua 12 ke enye ekebiere ke ima ikpon iyakanam utom ke Bethel. Ke October 1991 ke enye ọkọtọn̄ọ utom ke Bethel Brooklyn.

Ke Bethel, Brọda Fleegle akanam utom ke Itie Udian N̄wed ke isua itiaita, ekem ẹma ẹnọ enye akanam utom ke Itieutom Utịmutom. Ke mme ini oro, enye ama odu ke esop emi ẹsemde usem Russia ke isua ifan̄. Ke 2006, enye ama ọdọ Nadia n̄wan esie. Nadia ama etiene enye edinam utom ke Bethel. Mmọ mbiba ẹma ẹdu ke esop usem Portuguese, ẹma ẹnyụn̄ ẹdu ke esop usem Spanish ebe isua duop. Ke Brọda Fleegle ama akanam utom ke Itieutom Utịmutom ke ediwak isua, ẹma ẹnọ enye akanam utom ke Ọfis Kọmiti Unọ Ukpep, ekem ẹnọ enye aka Ọfis Kọmiti  Utom. Ke March 2022, ẹma ẹmek enye andin̄wam Kọmiti Utom Otu Emi Ẹsede Ẹban̄a Utom Nnyịn.

Brọda Winder okokpon ke Murrieta ke California ke U.S.A. Ete ye eka esie ẹken̄wam enye ọdiọn̄ọ akpanikọ. Enye akana baptism ke March 29, 1986. Ke April isua oro, enye ama ebiere ndidi asiakusụn̄ unọ un̄wam. Ama enem enye tutu enye ọdọhọ ke imọ iditreke. Ke enye ama akanam usiakusụn̄ unọ un̄wam ke ediwak ọfiọn̄, enye ama ọtọn̄ọ usiakusụn̄ ofụri ini ke October 1, 1986.

Ini Brọda Winder edide ekpri akparawa, enye ama aka Bethel ekese nditọeka esie irenowo iba emi ẹkesọn̄ọde enye. Mmọ ẹkenam utom ke Bethel ini oro. Se enye okokụtde akanam ọdọn̄ enye ndisịn n̄wed ndikanam utom ke Bethel ke enye ama akafiak okpon. Ke May 1990, ẹma ẹkot enye edi Bethel Wallkill edinam utom.

Ke Bethel, Brọda Winder ama anam utom ke nsio nsio itieutom, esịnede itieutom emi ẹsinamde mme itie ke Bethel asana, in̄wan̄, ye ọfis emi ẹsisede n̄kpọ ẹban̄a mbon Bethel. Ke 1997, enye ama ọdọ Angela n̄wan esie, ndien tọn̄ọ oro mmọ mbiba ẹdu ke Bethel ẹnam n̄kpọ Abasi. Ke 2014, ẹma ẹnọ mmọ ẹka Warwick. Ke Warwick, Brọda Winder ama etiene an̄wam ini ẹbọpde n̄kpọ ke ibuot itieutom nnyịn oro. Ke 2016, ẹma ẹnọ mmọ ẹka itie emi ẹsinịmde ufọkn̄wed esop Abasi ke Patterson. Do, Brọda Winder akanam utom ke Itieutom Emi Ẹsede Ẹban̄a Vidio Nnyịn. Isua inan̄ ekebe, mmọ ẹma ẹfiak ẹnyọn̄ Warwick, ndien ẹma ẹnọ Brọda Winder akanam utom ke Ọfis Kọmiti Mbonutom. Ke March 2022, ẹma ẹmek enye edi andin̄wam Kọmiti Mbonutom Otu Emi Ẹsede Ẹban̄a Utom Nnyịn.

Akam nnyịn edi yak Jehovah enen̄ede ọdiọn̄ irenowo emi enye ọnọde nnyịn nte enọ mi nte mmọ ẹkade iso ẹsịn idem ẹnam n̄kpọ man utom Abasi akaka iso.​—Eph. 4:8.