Rua Tale na Lewe ni iLawalawa Dauvakatulewa
ENA Vukelulu na ika18 ni Janueri 2023, e laurai ena jw.org e dua na itukutuku marautaki a kacivaki, ya ni rau sa lesi o Brother Gage Fleegle kei Jeffrey Winder me rau lewe ni iLawalawa Dauvakatulewa ni iVakadinadina i Jiova. Erau veiqaravi tu ena yalodina na tacida qo me dua na gauna balavu.
O Gage Fleegle kei watina o Nadia
A susu o Brother Fleegle ena ra kei Pennsylvania, Merika, rau tiko ena dina na nona itubutubu. Ni se itabagone, e toki nona vuvale ena dua na tauni lailai e vinakati kina vakalevu na veivuke. Oti ga vakalailai qori, sa papitaiso sara ena ika20 ni Noveba, 1988.
Rau dau uqeti Brother Fleegle na nona itubutubu me veiqaravi vakatabakidua. Rau dau sureti ira na ivakatawa ni tabacakacaka kei ira na veiqaravi e Peceli mera gole yani i vale, e raica rawa o Brother Fleegle na nodra mamarau na tacida qori. Ni oti ga vakalailai nona papitaiso, e tekivu painia tudei ena imatai ni Seviteba, 1989. Oti tale e rua na yabaki, a rawata e dua na isausau a lalawataka tu mai ni se qai yabaki 12, ya me veiqaravi e Peceli. E tekivu veiqaravi ena Peceli e Brooklyn ena Okotova 1991.
E cakacaka o Brother Fleegle ena vanua ni dabani ivola me walu na yabaki, oti sa qai lesi ena Tabana ni Cakacaka. Ena gauna qori, e veiqaravi ena dua na ivavakoso vosa vakaRusia me vica na yabaki. Ena 2006 e vakamautaki Nadia, rau mani veiqaravi vata e Peceli. Rau veiqaravi tale ga ena yalava vosa vakaPotukali, oti rau veiqaravi ena vosa vakaSipeni me sivia ni tini na yabaki. E dede toka o Brother Fleegle ena Tabana ni Cakacaka, oti sa qai lesi ina Valenivolavola ni Komiti ni Veivakavulici, toso na gauna e lai veiqaravi tale ga ena Valenivolavola ni Komiti ni Cakacaka. Ena Maji 2022, e lesi me dauveivuke ena Komiti ni Cakacaka ni iLawalawa Dauvakatulewa.
O Jeffrey Winder kei watina o Angela
E susu o Brother Winder e Murrieta, Kalifonia, Merika. Rau susugi koya ena dina na nona itubutubu, mani papitaiso ena ika29 ni Maji, 1986. Ena vula ga e tarava, e vakatulewataka me painia veivuke. Dua na ka nona taleitaka, sega sara ga ni vinakata me cegu. Oti e vica na vula nona painia veivuke tiko, e tekivu painia tudei sara ena imatai ni Okotova, 1986.
Ni se itabagone o Brother Winder, e gade vei rau na tuakana rau veiqaravi tiko e Peceli ena gauna ya. Nona lako qori e uqeti koya me veiqaravi tale ga e Peceli ni sa qase mai. Ena Me 1990, e sureti me veiqaravi ena Peceli e Wallkill.
E cakacaka o Brother Winder ena levu na tabana, wili kina na Tabana ni Sasamaki, Tabana e Qarava na iTeitei, kei na Tabana e Raica na iTikotiko. E vakawatitaki Angela ena 1997, rau veiqaravi vata e Peceli me tekivu mai na gauna qori. Ena 2014 rau toki i Warwick, e lai veivuke o Brother Winder ena taravaki ni itikotiko e liu. Ena 2016 rau toki ena Watchtower Educational Center e Patterson, lai cakacaka o Brother Winder ena tabana ni katokatoni kei na vidio. Oti tale e va na yabaki, rau toki lesu i Warwick, e lesi o Brother Winder ena Valenivolavola ni Komiti ni Lewe i Peceli. Ena Maji 2022 e lesi o Brother Winder me dauveivuke ena Komiti ni Lewe ni Peceli ni iLawalawa Dauvakatulewa.
E noda masu me vakalougatataka tiko ga o Jiova na “isolisoli tamata” qo, ni ratou cakacaka vakaukaua ena vuku ni Matanitu ni Kalou.—Efeso 4:8.
Rawa ni o Wilika Tale ga
TARO E TAROGI WASOMA
Na Cava na iLawalawa Dauvakatulewa ni iVakadinadina i Jiova?
Vakacava eratou iliuliu sara ga ni noda isoqosoqo?
