N TE KATENIBONG, Tianuare 18, 2023, ao e kaoti te katanoata ae okoro n jw.org, ae taekinaki iai bwa a a tia ni mwiokoaki Brother Gage Fleegle ao Jeffrey Winder bwa a na beku bwa kaain te Rabwata n Tautaeka Ibukia Ana Tia Kakoaua Iehova. A a tia taari mwaane aikai ni kakaonimaki ni beku iroun Iehova i nanon te tai ae maan.

E kaikawaaki Brother Fleegle i maeaon Pennsylvania, i U.S.A., irouia ana karo aika mamaaka te Atua. Ngke tebwi tabun ana ririki ao a a mwaing ana utu nakon te kaawa ae uarereke ae tionako, ike e kainnanoaki riki iai te ibuobuoki. E aki maan imwina ao e a bwabetitoaki n Nobembwa 20, 1988.

A aki toki ana karo Brother Fleegle ni kaungaa bwa e na beku ni kabwanina ana tai. N angiin te tai, a kakaoia mataniwi n te aono ao kaain te Betaera nakoni mwengaia, ao e kona n noria Brother Fleegle ae a kukurei taari aikai. E aki maan imwini bwabetitoana ao e a moana ana bwaiania ae katoatai n Tebetembwa 1, 1989. Uoua te ririki imwina, ao e a roko n tiana are e a kamani kateia ngke 12 ana ririki ae te beku n te Betaera. E moana ana beku n te Betaera i Brooklyn n Okitobwa 1991.

E mwakuri n te Betaera Brother Fleegle n te Tabo ni Karao Boki i nanoni wanua te ririki, ao imwina e kamwaingaki nakon te Aobiti Ibukin te Mwakuri. E beku n te tai anne n te ekaretia ae kabongana te taetae n Rutia i nanon tabeua te ririki. E mare ma buuna ae Nadia n 2006, ao e a beku ma ngaia n te Betaera. A a tia ni kaai ni beku n te aono ae kabonganaaki iai te taetae ni Botukare, ao e raka i aon tebwina te ririki n te aono ae kabonganaaki iai te taetae n Tibein. Imwin ririki aika bati ake e beku iai n te Aobiti Ibukin te Mwakuri, e a manga kamwaingaki Brother Fleegle bwa e na beku n Aobitin te Komete Ibukin te Angareirei ao imwina riki n Aobitin te Komete Ibukin te Mwakuri. Ni Maati 2022 ao e a mwiokoaki bwa te tia ibuobuoki n te Komete Ibukin te Mwakuri Ibukin te Rabwata n Tautaeka Ibukia Ana Tia Kakoaua Iehova.

 E kaikawaaki Brother Winder i Murrieta, i California, i U.S.A. E kaikawaaki i nanon te koaua irouia ana karo, ao e bwabetitoaki ni Maati 29, 1986. N te namwakaina are imwina ao e motinnanoia bwa e na riki bwa te bwaiania ae aki katoatai. E rangi ni kukurei iai ao e kan reitaanako ana bwaiania. Imwin tabeua ana namwakaina ni bwaiania ae aki katoatai, ao e a moana ana bwaiania ae katoatai n Okitobwa 1, 1986.

Ngke tebwi tabun ana ririki Brother Winder, ao e kawariia tarina aika uoman aika ikawai ake a beku n te Betaera n te tai anne. E kakorakoraaki nanona iai bwa e na kanoaa te booma ni bubutii ibukin te beku n te Betaera ngke e a ikawai. Ao ni Mei 1990, e a kaoaki bwa e na beku n te Betaera i Wallkill.

E mwakuri Brother Winder n aobiti aika kakaokoro n te Betaera, n ikotaki ma te Aobiti ae Tabe ma te Kaitiaki, te Ununiki, ao Aobitin te Betaera. E mare ma buuna ae Angela n 1997, ao a kaai ni beku n te Betaera man te tai anne ni karokoa ngkai. N 2014 ao a a kamwaingaki nako Warwick, ike e a ibuobuoki iai Brother Winder ni katean te tabo ibukini kautun ara botaki. N 2016 a mwaing nakon te Watchtower Educational Center i Patterson, ike e a mwakuri iai Brother Winder n te Aobiti ae Tabe ma Rawebwanaa/Taamnei. Aua te ririki imwina a a manga okira Warwick, ao e mwiokoaki Brother Winder bwa e na mwakuri n Aobitin te Komete ae Tabeakinia Taani Beku. Ni Maati 2022 e mwiokoaki bwa te tia ibuobuoki n te Komete ae Tabeakinia Taani Beku Ibukin te Rabwata n Tautaeka.

Ti tataro bwa e na kabatiaa kakabwaiaaia Iehova “mwaane [aikai] ake a a riki bwa bwaai n tituaraoi,” ngkai a teimatoa ni mwakuri korakora ibukin te Tautaeka n Uea.—IEbe. 4:8.