KÀ LÈLÀ deè Wednesday, ló January 18, 2023, ene kà kele íb nègã́ beè sila boo jw.org, ea kọ́ọ̀, baa íbá ló Vígà Gage Fleegle nè Jeffrey Winder kọ bàá dũunà Gbò Ge Tulè Tóm Gbò Neǹ Ditõ̀ò Jìhóvà. Pálaa kà vígà págbálàí a tú gã́bug gbáá siimá tóm nè Jìhóvà mm̀ bọ́ọ̀ló dẹ̀lẹ̀ nyíé boo.

Tẹ̀ nè kà Vígà Fleegle, e bà ólò tú gè fã̀ Bàrì kolmá nu beè bumáe gbẹá deè dọ̀ọ̀mà tẽ́ nàànì ea di Pennsylvania, U.S.A. Pá ba tọ beè kil ene kà ńkem̀ bon e bà íe bíi ló gbò kọ̀ kpẹ̀a tṍó ea beè di mm̀ a òb nè sìgà gbáá. Pọ́ì ńkem̀ tṍó aa ló tṍóá, a beè gbóó diia múú November 20, 1988.

Tẹ̀ nè kà Vígà Fleegle beè olòó sièè kpóó ló kọ á bã boo tóm dénè tṍó. Ba beè olòó tú gbò e bà gé kudẽe ló sẹ́kiùt nè gbò e bà ólò sí tóm Bẹ́tẹẹ̀l sẹlẹ́ ba tọ, vaá níí beè naa kọọ̀ Vígà Fleegle á mòn bé e nyíè pá vígàí ólò ẹẹ ló ba tóm naa. Pọ́ì ńkem̀ tṍó aa ló tṍó ea ni diia múú lọ̀l, a beè gbóó dú nen gyà deèsĩ́ tóm kọ̀ kpẹ̀a dénè tṍó ló September 1, 1989. Bàà gbáá aa ló tṍóá, a beè teelá tùlà nu ea beè noo sẹ̀ẹ̀a sĩ́ tṍó ea beè toolá 12 gbáá​—ea dú gè sí tóm Bẹ́tẹẹ̀l. A beè dààmà togó gè sí tóm Bẹ́tẹẹ̀l ló October 1991.

Vígà Fleegle beè tú aatáà gbáá siimá tóm gbẹá tọọ̀ tóm e bà ólò nvèè kóó nvéè kpá gbẹá Bẹ́tẹẹ̀l, vaá tṍó e tṍó téní, ba beè lẹ̀ẹ̀làẹ tẹlẹ Service Department. Mm̀ gbò tṍóá, a beè tú sìgà gbáá siimá tóm gbẹá bõ̀ònatõ̀ò e bà ólò ló dém bel Russia. A beè ilí a vaà Nadia mm̀ gbáá 2006, vaá a beè zọ̀ẹ sí tóm Bẹ́tẹẹ̀l. Pálaa ọ̀và beè gbaaá ló bõ̀ònatõ̀ò e bà ólò ló dém bel Portugal, vaá ba beè tú nu ea sígá ló òb gbáá tõ̀òma bõ̀ònatõ̀ò e bà ólò ló dém bel Spain. Tṍó e Vígà Fleegle ni tú gã́bug gbáá siimá tóm Service Department, ba beè gbóó túe tẹlẹ Teaching Committee Office, vaá tṍó e tṍó téní, ba beè lẹ̀ẹ̀làẹ tẹlẹ Service  Committee Office. Ló March 2022, ba beè íe bá ló naamá nen ea gé nveè bá tóm nè Service Committee Gbò Ge Tulè Tóm.

Ba beè bumá Vígà Winder gbẹá Murrieta, ea di California, U.S.A. A tẹ̀ nè a kà beè bumáe mm̀ kà-kàí vaá a beè diia múú ló March 29, 1986. A beè dààmà togó ge sí tóm gyà deèsĩ́ tóm kọ̀ kpẹ̀a mm̀ ńkpulu dẽè tṍó ló April. Nyíée beè palàge ẹẹ vaá a beè leemáe ge kilsĩ́ gè sí tómí. Tṍó ea ni tú gã́bug ẽ́ siimá tóm gyà deèsĩ́ tóm mm̀ ńkpulu dẽè tṍó, a beè gbóó dú neǹ gyà deèsĩ́ tóm kọ̀ kpẹ̀a dénè tṍó ló October 1, 1986.

Tṍó e Vígà Winder beè di-dí mm̀ a òb nè sìgà gbáá, a beè kãa bàà kà a ńkà neǹ vígà e bà géè sí tóm Bẹ́tẹẹ̀l. Ge sì gé kãá va beè naa kọọ̀ á ié tàn ge sí tóm Bẹ́tẹẹ̀l tṍó ea é dù kànen. Vaá ba beè kolíe kọ á sí tóm Bẹ́tẹẹ̀l ea di Wallkill ló May 1990.

Vígà Winder a sí tóm gbẹá kele-kele tọọ̀ tóm ea di Bẹ́tẹẹ̀l, dì belí Cleaning Department, Farm Department, nè Bethel Office. A beè ilí a vaà Angela mm̀ gbáá 1997, vaá pálaa ọ́và dì e bà gé sí tóm Bẹ́tẹẹ̀l. Mm̀ gbáá 2014, ba beè lẹ̀ẹ̀làẹ kilma Warwick, vaá Vígà Winder beè zọ̀ pá vígà e bà di kĩá tìb tọ nàà tóm ea gé ẹb nú ea kil ló sìtóm kọ̀ kpẹ̀a beeá ló zivekà bàlà booí. Mm̀ gbáá 2016, ba beè lẹ̀ẹ̀làẹ tẹlẹ Watchtower Educational Center ea di Patterson, vaá Vígà Winder beè sí tóm Audio/Video Services gbẹá kĩá. Ténì gbáá aa ló tṍóá, ba beè òòmà va kilma Warwick, vaá ba beè kọọ̀ Vígà Winder á sí tóm Personnel Committee Office. Ló March 2022, ba beè íe bá ló naamá nen ea é nveè bá nè Personnel Committee Gbò Ge Tulè Tóm.

È baǹ kọọ̀ Jìhóvà á kilsĩ́ gè tãanè dee bá gbò vígà págbálà e bà íe “dõ̀ònù” e Bàrì beè nèvaí boo tṍó e bà gé sí tóm agẹlẹ bá mm̀ ge nvèè sãa kúm a Boǹ Méné.​—Ẹ́fẹ. 4:8.