Mẹyọyọ Awe Yin Pipà Do Hagbẹ Anademẹtọ lọ Mẹ
TO MERCREDI 18 janvier 2023, nulila vonọtaun de sọawuhia to jw.org ji, bo dohia dọ Mẹmẹsunnu Gage Fleegle po Jeffrey Winder po ko yin pipà nado sẹ̀n to Hagbẹ Anademẹtọ Kunnudetọ Jehovah tọn lẹ tọn mẹ. Mẹmẹsunnu awe lọ lẹ ko sẹ̀n Jehovah po nugbonọ-yinyin po na ojlẹ dindẹn.
Gage Fleegle po asi etọn Nadia po
Mẹjitọ budisi Jehovah tọ́ lẹ wẹ plọn Mẹmẹsunnu Gage Fleegle whẹ́n to Whèyihọ-waji Pennsylvanie tọn to États-Unis. To whenue e to aflanmẹ, whẹndo etọn sẹtẹn yì gbétatò pẹvi de mẹ, fie nuhudo sù te taun. Enẹgodo, e ma dẹn bọ e yí baptẹm to 20 novembre 1988.
Mẹjitọ Mẹmẹsunnu Fleegle tọn lẹ nọ na ẹn tuli whẹwhẹ nado biọ sinsẹ̀nzọn whenu-gigọ́ tọn mẹ. Yé nọ saba yí nugopọntọ lẹdo tọn po mẹhe nọ wazọ́n to Bẹtẹli lẹ po do owhé yetọn gbè, podọ Mẹmẹsunnu Fleegle gán mọ obá he mẹ mẹmẹsunnu po mẹmẹyọnnu ehelẹ po nọ do ayajẹ jẹ. To baptẹm etọn godo, e ma dẹn bọ e bẹ gbehosọnalitọ whepoponu tọn jẹeji to 1er septembre 1989. To owhe awe godo, e jẹ yanwle he e zedonukọnna ede to whenue e do owhe 12 de kọ̀n, enẹ wẹ nado sẹ̀n to Bẹtẹli. E jẹ sinsẹ̀n ji to Bẹtẹli Brooklyn tọn to octobre 1991.
To Bẹtẹli, Mẹmẹsunnu Fleegle wazọ́n to Azọ́nwatẹn Owe lẹ Bibladopọ tọn na owhe ṣinatọ̀n, bọ to enẹgodo, e yin azọ́ndena do Azọ́nwatẹn Sinsẹ̀nzọn tọn. To ojlẹ enẹ gblamẹ, e sẹ̀n to agun Russie-gbè tọn de mẹ na owhe kleun de. To 2006, e wlealọ hẹ Nadia he wá gọ́ na ẹn to sinsẹ̀nzọn Bẹtẹli tọn mẹ. To pọmẹ, yé ko sẹ̀n to agun Portugal-gbè tọn mẹ, podọ na owhe ao linlán to agun Espagne-gbè tọn mẹ. To whenue Mẹmẹsunnu Fleegle ko wazọ́n to Azọ́nwatẹn Sinsẹ̀nzọn tọn na owhe susu lẹ godo, e yin azọ́ndena do Azọ́nwatẹn Wedegbẹ́ Mẹpinplọn Tọn, podọ to nukọn mẹ do Azọ́nwatẹn Wedegbẹ́ Sinsẹ̀nzọn tọn. To mars 2022, e yin dide taidi alọgọtọ Wedegbẹ́ Sinsẹ̀nzọn tọn Hagbẹ Anademẹtọ lọ tọn.
Jeffrey Winder po asi etọn Angela po
Mẹmẹsunnu Winder whẹ́n to Murrieta, to Californie, to États-Unis. Mẹjitọ etọn lẹ plọn ẹn whẹ́n to nugbo lọ mẹ, podọ e yí baptẹm to 29 mars 1986. To osun he bọdego tlolo mẹ, e de nado basi gbehosọnalitọ alọgọtọ tọn. E yiwanna sọmọ bọ e jlo nado zindonukọn. To whenue e ko basi gbehosọnalitọ alọgọtọ tọn na osun delẹ godo, e bẹ gbehosọnalitọ whepoponu tọn jẹeji to 1er octobre 1986.
To whenue Mẹmẹsunnu Winder to aflanmẹ, e yì dla mẹdaho etọn sunnu awe he to sinsẹ̀n to Bẹtẹli to ojlẹ lọ mẹ lẹ pọ́n. Dlapọn enẹ whàn ẹn nado doalọwemẹ na sinsẹ̀nzọn Bẹtẹli tọn to whenue e whẹ́n. Podọ to mai 1990, e yin oylọ-basina nado sẹ̀n to Bẹtẹli Wallkill tọn.
To Bẹtẹli, Mẹmẹsunnu Winder wazọ́n to azọ́nwatẹn voovo lẹ, ehe bẹ Azọ́nwatẹn Wiwejininọ Tọn, Azọ́nwatẹn He Nọ Penukundo Ogle go, gọna Azọ́nwatẹn He Nọ Penukundo Owhé Bẹtẹli tọn go hẹn. E wlealọ hẹ Angela to 1997, podọ yé ko to sinsẹ̀n dopọ to Bẹtẹli sọn whenẹnu. To 2014, yé yin didohlan Warwick, fie Mẹmẹsunnu Winder gọalọ to azọ́n tatọ-tẹnnọ lọ gbigbá tọn mẹ te. To 2016, yé sẹtẹn yì Nọtẹn Wepinplọn Watchtower tọn to Patterson, bọ Mẹmẹsunnu Winder wazọ́n to Azọ́nwatẹn Hoyidokanji po Video po tọn. To owhe ẹnẹ godo, yé lẹkọwa Warwick, podọ Mẹmẹsunnu Winder yin azọ́ndena nado wazọ́n to Wedegbẹ́ Nukunpedomẹgo Tọn mẹ. To mars 2022, e yin dide taidi alọgọtọ to Wedegbẹ́ Nukunpedomẹgo Tọn Hagbẹ Anademẹtọ lọ Tọn mẹ.
Odẹ̀ mítọn wẹ yindọ Jehovah ni dona ‘nunina to sunnu mẹ’ ehelẹ dile yé zindonukọn nado to azọ́n sinsinyẹn wà do Ahọluduta lọ tamẹ.—Efe. 4:8.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Etẹwẹ Hagbẹ Anademẹtọ Kunnudetọ Jehovah Tọn lẹ Tọn Yin?
Be hagbẹ etọn lẹ wẹ yin nukọntọ titobasinanu mítọn tọn ya?
