LWAKASHARHU, Siku 18, Mwezi gwa 1, 2023, etangazo liminuzize lyahebwa oku jw.org, liderhere oku Mwene-werhu Gage Fleegle na Jeffrey Winder bashimikirwe bakole omu Baraza Lirhambwire ly’Abahamirizi ba Yehova. Abola bene-berhu bombi bakolere Yehova oku bwimana mu myaka minene.

Mwene-werhu Fleegle alembwaga n’abazere b’Abakristu emasheshukiro me Pennsylvania omu Etats-Unis. Amango aliri omu myaka y’olubiruko, omulala gwage gwahamira omu vile ngeke emunda halikenere oburhabale bw’abahubiri. Buzira kulegama, abatizwa omu Siku 20 Mwezi gwe 11, 1988.

Abazere ba mwene-werhu Fleegle baliri bamuheba omurhima aje omu kasi k’amango moshi. Bagendaga bazigana kupangisa ahamwabo abemangizi b’omuzunguluko n’abakozi b’oku Beteli, na Mwene-werhu Fleegle aliri abona obusime bungana abola bene-berhu na bali-berhu baligwerhe. Siku zigeke enyuma w’okubatizwa, arhondera kukola nka painiya w’oku kahunda k’okuderha omu Lusiku 1 Mwezi gwa 9, 1989. Myaka ebiri enyuma wahola, ahikira omuhigo achiheberagaho amango aliherhe myaka 12, k’okuderha omuhigo g’okukola oku Beteli. Mwezi gwe 10, 1991 arhondera kukola oku Beteli ye Brooklyn.

Oku Beteli, Mwene-werhu Fleegle akolere omu kasi k’okuganda ebitabu mu myaka 8, naho bamurhuma omu Departement Elolere Akasi. Mw’agola mango moshi aliri akolera mu myaka milebe omu chibaga ch’olulimi lwe Chirisi. Omu mwaka gwa 2006 ashaba mukage oyikirwe, Nadia, barhondera kukola naye omu kasi k’oku Beteli. Yewe na mukage, baliri bakolera omu chibaga chaliri chakolesa olulimi lwe Chiportigale, na mu myaka erhalukire 10 balikolere omu chibaga chaliri chakolesa olulimi lwe Chiespanyole. Amalire kukola mu myaka minene omu Departema Elolere Akasi, Mwene-werhu Fleegle ahabwa engabane y’okukola  omu Biro by’Ekomite Elolere Okuyigiriza. Omu Mwezi gwa 3, 2022 arhondera kukola nka mugwasi omu Komite Elolere Akasi ye Baraza Lirhabwire.

Mwene-werhu Winder, akuliraga e Murrieta omu Californie, États-Unis. Akuliraga omu mulala gw’Echikristu, abatizwa omu Siku 29 Mwezi gwa 3, 1986. Omwezi gwakulikiragaho achishoga kuhwanza kukola nka painiya mugwasi. Asima obupainiya bwenene arhanachilonzaga kubuleka. Amalire myezi minene y’ali akola nka painiya mugwasi, omu Lusiku 1 Mwezi gwe 10, 1986 arhola obupainiya b’oku kahunda.

Omu myaka yage y’olubiruko, Mwene-werhu Winder alambagirira bakulu bage 2 baliri bakola oku Beteli mw’agola mango. Okugera oku Beteli kwalirhumire ayunva asimire nj’akoleko hanola nj’akula. Omu Mwezi gwa 5, 1990, arhondera kukola oku Beteli ye Wallkill.

Oku Beteli, Mwene-werhu Winder alikolere mu makasi malengene, nk’omu Departema y’Obusafi, omu Departema y’Eferme, n’omu Biro bye Beteli. Omu mwaka gwa 1997, ashaba omukazi oyirikirwe Angela, bali bakola haguma oku Beteli kurhenga agola mango. Omu mwaka gwa 2014 bamurhuma e Warwick, emunda Mwene-werhu Winder ajaga kurhabala omu kasi k’okuyumbaka ebiro bikulu. Omu mwaka gwa 2016 bamurhuma oku Centre Y’okuyigiriza ya Watchtower eli e Patterson, emunda Mwene-werhu Winder ahanzaga kukola omu Departema ye Audio-Video. Enyuma wa myaka 4, ashubagaluka e Warwick, Mwene-werhu Winder arhondera kukola omu Biro by’Ekomite Elolere Abakozi. Omu Mwezi gwa 3, 2022 bamujira mugwasi omu Komite Elolere Abakozi omu Baraza Lirhabwire.

Rhuli rhwasalira Yehova agishe bwenene ezola “mpembo omu bantu” yi bagenderera kukola bwenene oku nyungu z’Obwami.—Efe. 4:8.