SANG Mierkoles, Enero 18, 2023, ginpabalo paagi sa jw.org nga si Brother Gage Fleegle kag si Brother Jeffrey Winder gintangdo bilang mga miembro sang Nagadumala nga Hubon sang mga Saksi ni Jehova. Matutom sila nga nagaalagad kay Jehova sa sulod na sang malawig nga tion.

Saksi ang mga ginikanan ni Brother Fleegle kag nagdaku sia sa nakatundan nga bahin sang Pennsylvania, U.S.A. Sang tin-edyer sia, nagsaylo ang ila pamilya sa isa ka gamay nga banwa nga nagakinahanglan sang dugang nga manugbantala. Wala madugay pagkatapos sini, nabawtismuhan sia sang Nobiembre 20, 1988.

Pirme ginapalig-on si Brother Fleegle sang iya mga ginikanan nga mag-alagad sing bug-os tion. Ginaagda nila sa ila balay ang mga circuit overseer kag ang mga Bethelite, kag nakita ni Brother Fleegle nga malipayon gid ini nga mga kauturan. Wala madugay pagkatapos sia mabawtismuhan, nagregular payunir sia sang Septiembre 1, 1989. Pagligad sang duha ka tuig, ginpatawag sia sa Bethel. Sang 12 anyos pa lang sia, gusto gid niya mangin isa ka Bethelite, gani natuman ang iya handum. Nag-umpisa sia sa pag-alagad sa Bethel sa Brooklyn sang Oktubre 1991.

Sa Bethel, gin-asayn si Brother Fleegle sa Bindery sa sulod sang walo ka tuig. Dayon gin-asayn sia sa Service Department. Sadto nga tion, nag-alagad sia sa Russian nga kongregasyon sa sulod sang pila ka tuig. Sang 2006, nagpakasal sila ni Nadia. Nangin Bethelite man si Nadia pagkatapos nila magpakasal. Nag-alagad sila sa Portuguese nga kongregasyon. Dayon nag-alagad sila sa Spanish nga kongregasyon sing sobra napulo ka tuig. Pagkatapos sang madamo nga tuig sa Service Department, gin-asayn si Brother Fleegle sa Teaching Committee Office. Sang ulihi, gin-asayn sia sa Service Committee Office. Sang Marso 2022, gintangdo sia bilang  kabulig sa Service Committee sang Nagadumala nga Hubon.

Nagdaku si Brother Winder sa Murrieta, California, U.S.A. Saksi ang iya mga ginikanan, kag nabawtismuhan sia sang Marso 29, 1986. Pagkasunod nga bulan, nag-auxiliary payunir sia dayon. Nalipay gid sia sa pag-alagad bilang auxiliary payunir, gani nagdesisyon sia nga padayunon ini. Pagkatapos niya mag-auxiliary payunir sa sulod sang pila ka bulan, nagregular payunir sia sang Oktubre 1, 1986.

Sang tin-edyer si Brother Winder, ginbisitahan niya ang iya duha ka magulang nga lalaki nga nagaalagad sa Bethel sadto nga tion. Napalig-on gid sia nga mag-aplay man sa Bethel sa ulihi. Sang Mayo 1990, gin-agda sia nga mag-alagad sa pasilidad sang Bethel sa Wallkill.

Sa Bethel, nakaalagad si Brother Winder sa sarisari nga mga departamento. Nalakip sa sini ang Cleaning Department, Farm Department, kag Bethel Office. Sang 1997, nagpakasal sila ni Angela, kag magkaupod sila nga nagaalagad sa Bethel asta subong. Sang 2014, ginsaylo sila sa Warwick, kag gin-asayn si Brother Winder sa pagbulig sa konstruksion sang pasilidad sang world headquarters. Sang 2016, ginsaylo sila sa Watchtower Educational Center sa Patterson, kag gin-asayn si Brother Winder sa Audio/Video Services. Pagligad sang apat ka tuig, ginbalik sila sa Warwick, kag gin-asayn si Brother Winder sa Personnel Committee Office. Sang Marso 2022, gintangdo sia bilang kabulig sa Personnel Committee sang Nagadumala nga Hubon.

Ginapangamuyo naton kay Jehova nga kabay pa nga pakamaayuhon gid niya ining “mga dulot nga mga lalaki” nga padayon nga nagapangabudlay para sa Ginharian.​—Efe. 4:8.