Tsab i epchal axi ítej ti bijiyámej abal ka tólmixin ban Kwenél i Ókʼnom
TI MIÉRCOLES 18 a enero ti 2023 bináj jun i olchixtaláb lej kʼijidh ti jw.org. Ólnáj abal an epchal Gage Fleegle ani an epchal Jeffrey Winder neʼets ka tólmixin ban Kwenél i Ókʼnom. Jajáʼchik in neʼdhálits yan i támub tin tʼójonchal a Jehová.
A Gage Fleegle kʼal in kʼimádhil Nadia
An epchal Fleegle yejey ti Pensilvania (Estados Unidos). Jajáʼ exóbchat tin kwéntaj a Jehová kʼal in papá ani in mamá. Ani tam ti jajáʼ tsákamej, kʼalechik ti kʼwajíl al jun i tsakam kwenchaláb juʼtáj u yejenchábak más i epchal abal ti ólnom. Jajáʼ pujan ti 20 a noviembre ti 1988.
Kʼal in papá ani in mamá etsʼey tólmiyat abal kin léʼnaʼ kin tʼojonchij más a Jehová. Jajáʼchik in kániyalak tin kʼimáʼ an ókʼnom kʼal an circuito ani an betelitas. An epchal in tʼajaʼ ti kwéntaj abal axéʼchik xi epchal etsʼey kʼwajatak kulbél kom in tʼójonchal a Jehová. Wéʼ talbél jajáʼ pujan ani ti 1 a septiembre ti 1989 in tujchij ti precursor regular. Ti octubre ti 1991 kániyat ti tolmix ti Betel ti Brooklyn. Nixéʼ pelak jantʼoj axi jajáʼ in léʼak kin bajuw ma tam ti in kwaʼalak 12 i támub.
Tanáʼ tólmixin 8 i támub ban taller de encuadernación ani talbél aban ti tolmix ban Departamento de Servicio. Jayej al nixéʼchik xi támub kʼwajiy ti tolmix al jun i tamkuntaláb axi u kaw ruso. Ti 2006 tomkin kʼal a Nadia ani tsablom tin eb kʼwajinek ti tolmix ti Betel. Kʼwajiychik ti wéʼ tolmix al jun i tamkuntaláb axi u kaw portugués ani talbél kʼwajiychik laju i támub ti labkaw. Tolmixin yan i támub ban Departamento de Servicio, talbél aban ti tolmix ban Oficina del Comité de Enseñanza ani talbél ban Oficina del Comité de Servicio. Ti marzo ti 2022 bíjiyat abal ka tólmixin ban Comité de Servicio in kʼál an Kwenél i Ókʼnom.
A Jeffrey Winder kʼal in kʼimádhil Angela
An epchal Winder yejey ti Murrieta (California). Jajáʼ exóbchat tin kwéntaj a Jehová ma tin tsakamtal kom in tátachik pel i ólchix kʼal a Jehová ani pujan ti 29 a marzo ti 1986. Jun a ítsʼ talbél in tujchij ti precursor auxiliar. In lej kulbétnaʼ ani jaxtám ti 1 a octubre ti 1986 in tujchij ti precursor regular.
Tam ti tsakamej, an epchal Winder kʼalej ti Betel abal kin tsaʼbiy tsab in epchal axi kʼwájatakits ti tolmix tanáʼ. In lej kulbétnaʼ ani jaxtám in tsalpay abal tam kin koʼoy más i támub, neʼetsak ka kʼalej ti tolmix ti Betel. Talbél in báliy an solicitud ani kániyat ti mayo ti 1990 ti tolmix ti Betel ti Wallkill.
Jajáʼ pidhan yan in uchbíl ti Betel, tolmixin ban Departamento de Limpieza, ban Departamento de la Hacienda ani ban Oficina de Betel. Ti 1997 tomkin kʼal a Angela ani in áynanchij ti tolmixchik ti Betel. Ti 2014 kániyatchik ti tolmix ti Warwick ani an epchal Winder tolmixin abal ka tsʼejkáj an central mundial. Ti 2016 kʼalechik ti Patterson, tanáʼ kʼwajat an Centro Educativo de la Watchtower, ani tolmixin ban departamento de Servicios de Audio y Video. Tanáʼ kʼwajiychik tseʼ i támub, talbél wíchiychik ti Warwick, ani an epchal Winder tolmixin ban Oficina del Comité de Personal. Ti marzo ti 2022 bíjiyat abal ka tolmixin ban Comité de Personal in kʼál an Kwenél i Ókʼnom.
Axéʼchik xi epchal pel ejtíl i tsʼejwalixtaláb axi a Jehová tu pidhámal (Efes. 4:8). I lej konchal a Jehová abal kin áynanchij kin lábliy axéʼ xi tsab i epchal kʼal patal an tʼojláb axi exomchik in tʼajál.
