ON WEDNESDAY, January 18, 2023, had one spesho ting fo erybody know on jw.org, dat tell Braddahs Gage Fleegle an Jeffrey Winder wen get pick fo be part of Jesus Luna Guys of Witnesses Fo Jehovah. Both dese braddahs wen faithfully work fo Jehovah long time.

Braddah Fleegle wen grow up in western Pennsylvania, U.S.A., an he wen learn da trut from his parents. Wen he was one teenaga, his family wen move to one small town in da boonies wea dey needed moa help. Pretty soon afta dat, he wen get baptize on November 20, 1988.

Braddah Fleegle’s parents always wen try fo help him work fo Jehovah full-time. All da time dey would have braddahs fo da circuit an Bethel frenz come ova dea house, an Braddah Fleegle could see how happy dey was. Litto bit afta he wen get baptize, he wen start fo pionea on September 1, 1989. Two years layta, he had reach one goal he wen set wen he was 12 years old​—da goal fo work at Bethel. He wen start fo work at Brooklyn Bethel in Octoba 1991.

Braddah Fleegle wen work in da Bindery at Bethel fo eight years, an afta dat he wen work fo da Departmen Dat Kea Fo Da Preaching. Dat time, he wen help in one Russian-language local hui fo few years. In 2006 he wen marry his wife, Nadia, an dey wen work in Bethel togedda. Dey both wen work in da Portuguese field an fo ova ten years in da Spanish field. Afta plenny years helping in da Departmen Dat Kea Fo Da Preaching, Braddah Fleegle wen get switch ova fo work in da Office Fo Da Guys Dat Kea Fo Da Teaching Stuff, an bumbye da Office Fo Da Guys Dat Kea Fo Da Preaching Work. In March 2022 he wen get pick fo be one  helpa guy fo da Guys Dat Kea Fo Da Preaching Work fo Jesus Luna Guys.

Braddah Winder wen grow up in Murrieta, California, U.S.A. He wen learn da trut from his parents, an he wen get baptize on March 29, 1986. Da month right afta dat, he wen choose fo pionea part-time. He wen like um so much dat he wanted fo keep going. Afta a few months of pioneering part-time, he wen start fo pionea full-time on October 1, 1986.

Wen he was one teenaga, Braddah Winder wen visit his two olda braddahs who was working at Bethel dat time. Dat made him like apply fo work at Bethel wen he get olda. An in May 1990, he wen get da invite fo work at Wallkill Bethel.

At Bethel Braddah Winder wen work in all kine departmens, like da Departmen Dat Kea Fo Da Cleaning, da Departmen Dat Kea Fo Da Farm, an da Bethel Office. He wen marry his wife Angela in 1997, an eva since den dey wen work togedda in Bethel. In 2014 dey wen get switch ova to Warwick, ova dea Braddah Winder wen help wit building da world headqwatahs. In 2016 dey wen move to da Watchtower Educational Center at Patterson, wea Braddah Winder wen work in Audio/Video Services. Four years layta, dey wen move back to Warwick an Braddah Winder wen work in da Office fo Da Guys Dat Kea Fo Da Bethel Ohana. In March 2022 he wen get pick fo be one helpa guy fo Da Guys Dat Kea Fo Da Bethel Ohana fo Jesus Luna Guys.

We pray Jehovah give plenny blessings to dese braddahs az dey keep working hard fo God’s Govament.​—Efe 4:8.