Dua nga Bagu nga Miembro na Manangngal nga Baggi
TURI TA Mierkules, Enero 18, 2023, egga i espesial nga neyanunsio ta jw.org. Nakagi tatun nga da Brother Gage Fleegle anna Jeffrey Winder ay natunno bilang miembro na Manangngal nga Baggi na Saksi ira ni Jehova. Parefu nga nabayag ngana nga matalo nga massesserbi kani Jehova yatun nga dua nga brother.
Si Gage Fleegle anna i atawa na nga si Nadia
Si Brother Fleegle ay pinadakal na magana na ta kinakurug ta western Pennsylvania, U.S.A. Ta katinedyer na, nagali ira na familia na ta baddi nga ili nu sitaw mas dakal i pakawagan. Ari nabbayag, na-baptize yayya turi ta Nobiembre 20, 1988.
Namegafu ta kabbing ni Brother Fleegle, pinagaram yayya na magana na nga maf-full-time. Kanayun ira nga mamisita ta baleda tu circuit overseer anna Bethelite. Nasingan ni Brother Fleegle nga fermi i pagayayya natun ira nga brother anna sister. Ari nabbayag kabalin na bawtismo na, nar-regular pioneer yayya turi ta Setiembre 1, 1989. Dua ragun kabalin natun, nasserbi yayya ta Bethel. Dati ngana nga goal na yatun turi ta 12 pagalaman i dagun na. Namegafu yayya nga masserbi ta Brooklyn Bethel turi ta Oktubre 1991.
Ta Bethel, nattrabahu si Brother Fleegle ta Bindery tu walu nga ragun, tapus kabalin natun neyasayn yayya ta Service Department. Tatun nga tiempo, piga dagun gapa yayya ta tadday nga Russian-language nga kongregasion. Turi ta 2006, nakkasal ira ni Nadia, nga na-absorb gapa ta Bethel. Makkavulu ira ta Portuguese field anna maturu tu mafulu ragun gapa ira ta Spanish field. Kabalin na aru nga dagun ni Brother Fleegle ta Service Department, neyasayn yayya ta Teaching Committee Office tapus turi kua, ta Service Committee Office. Turi ta Marso 2022, natunno yayya bilang helper na Service Committee na Manangngal nga Baggi.
Si Jeffrey Winder anna i atawa na nga si Angela
Si Brother Winder gapa ay pinadakal na magana na ta kinakurug ta Murrieta, California, U.S.A. Na-baptize yayya turi ta Marso 29, 1986. Ta tumunug nga vulan, insigida yayya na-auxiliary pioneer. Fermi nga nagustuan na yatun, yayya nga kayà na nga itulu-tuloy. Kabalin na piga vulan nga pa-auxiliary pioneer na, nar-regular pioneer yayya turi ta Oktubre 1, 1986.
Turi ta tinedyer si Brother Winder, binisita na i dua nga manung na nga massesserbi bi ta Bethel tatun nga tiempo. Gafu ta nasingan na ta pabbisita na, kayà na i mabbalin tu Bethelite sonu dumakal yayya. Tapus turi ta Mayo 1990, nembitan yayya nga masserbi ta Wallkill Bethel.
Ta Bethel, madduruma nga departamento i nattrabahuan ni Brother Winder. Kasali ngana tatun i Cleaning Department, Farm Department, anna Bethel Office. Nakkasal ira ni Angela turi ta 1997 anna makkavulu ira ta Bethel adde sangawe. Ta 2014, nagali ira ta Warwick nu sitaw nanguffun si Brother Winder ta construction na world headquarters. Ta 2016, nagali ira ta Watchtower Educational Center ta Patterson, nu sitaw nattrabahu si Brother Winder ta Audio/Video Services. Appa-ta-ragun kabalin natun, nanoli ira ta Warwick, nu sitaw neyasayn si Brother Winder ta Personnel Committee Office. Ta Marso 2022, natunno yayya bilang helper na Personnel Committee na Manangngal nga Baggi.
Ipaka-pakimallo mi nga bendisionan nakuan ni Jehova danaw nga ‘regalu ta totolay ira’ durante nga mallallappo ira para ta intereses na Pappatulan.—Efe. 4:8.
