Ɛ̄CĪ UWƐNƐSDE, ku Ɔya Aflɛyi 18, 2023, ɛnɛɛnɛ ɛlā ō ka tɛɛcɛ éyi bɛɛcɛ ipu jw.org, yɔ i mafu ka é lɛ Ayinɛ alɔ Gage Fleegle mla u Jeffrey Winder fu kéē wɛ ipu Ígwu Nōo Gē Leyi Kwu Ɔwa Ku Alɔ a. Ayinɛ alɔ ɛpa nyā humayi gba Ujehofa ɛ̄gbā kpaakpa ihayi alɛwa ɛ.

Ɔyinɛ alɔ Nɔnyilɔ Fleegle jɛ ɛnɔɔnɛ ku Pennsylvania, U.S.A., ɛ́nɛ́ mla adā nu kē bi ɔ jɛ ipu ɔkwɛyi a. Eko nɛ ó wɛ ɛdrɔ a, apɔlɛ ku nu le calɛ gā ipɔlɛ ligii éyi nɛ ɛgbá ku ācɛ o tɔɔna ɛlā Ɔwɔico yɔ fiyɛ a. Eko kpii igbihi ɔɔma, ó gáā lɛ ubatisim ya ipu Ɔya Ɔmigwoleyi 20, 1988.

Ɛ́nɛ́ mla adā ku ɔyinɛ alɔ Nɔnyilɔ Fleegle gē je ɔtu ō tu kwu ɔtu lɛ ɔ kóō gā ipu uklɔ ō ya lɛ Ujehofa eko doodu. Igbalɛwa, é ge hi ācɛ o leyi kwu usɛkut mla ayinɛ nōo gē yuklɔ ipu Ubɛtɛlu a igwú wa ɔlɛ wa, ɛnyā kē ya kóō tɔɔtɛ lɛ ɔyinɛ alɔ Nɔnyilɔ Fleegle kóō má ɛgɛ nɛ ayinɛ nyā gē gweeye lɛ a. Ó gboji ŋ igbihi nɛ ó lɛ ubatisim ya a, ó gbɔɔ ō yuklɔ ku ɔcɛ o gbɔbu ɔna ō ta eko doodu—ipu Ɔya Ɔmahaanɛ 1, 1989. Igbihi nɛ ihayi ɛpa le gla a, ó gáā lɛ odee nɛ ó miya ō ya eko nɛ ó wɛ ihayi igwɛɛpa a ya jila—ōmiya ō yuklɔ ipu Ubɛtɛlu. Ó gbɔɔ ō yuklɔ ku Ubɛtɛlu ipu Brooklyn ipu Ɔya Ɔmigwo 1991.

Ipu Ubɛtɛlu, ɔyinɛ alɔ Nɔnyilɔ Fleegle yuklɔ aya ku Bindery ihayi ahata, igbihi ɔɔma, é lɛ uklɔ ku nu piyabɔ ō yuklɔ mla u Service Department. Ɛpleeko ɔɔma, ó yuklɔ mla ujɔ nōo gē ka uce ku Russian a ihayi ōhī. Ipu ihayi ku 2006, ó gáā kwu ɔnyā nu nōo lé ka u Nadia u lɛ, nōo ba ɔ iyē ipu uklɔ ku Ubɛtɛlu a. Uwa ɛplɛɛpa yuklɔ ɛga o tɔɔna nōo gē ka uce ku Portuguese a, é klla yuklɔ ɛga o tɔɔna nōo gē ka uce ku Spanish a fiyɛ ihayi igwo. Igbihi nɛ ó yuklɔ ihayi alɛwa mla Service Department a, é gáā kwu uklɔ ku ɔyinɛ alɔ Nɔnyilɔ Fleegle u piyabɔ ō yuklɔ mla u Teaching Committee Office, igbihaajɛ é klla lɛ ɔ fu ō yuklɔ mla u Service Committee Office. Ipu Ɔya Ɔmɛta 2022, é lɛ ɔ fu kóō je otabɔ lɛ u Service  Committee ku Ígwu Nōo Gē Leyi Kwu Ɔwa Ku Alɔ a.

Ɔyinɛ alɔ Nɔnyilɔ Winder jɛ ipu Murrieta, California, U.S.A. Ɛ́nɛ́ mla adā nu bi ɔ jɛ ipu ɔkwɛyi a, ó kē ya ubatisim ipu Ɔya Ɔmɛta 29, 1986. Ɔya ɔhá nōo gboce ɔ boobu a, ó kwu piya ɔcɛ o gbɔbu ɔna ō ta ŋma eko teeko. Ó jɔɔnyɛ nu nɛɛnɛhi nɛ ó dɔka ō gɔbu. Igbihi nɛ ó yuklɔ ku ɔcɛ o gbɔbu ɔna ō ta ŋma eko teeko ɔya alɛwa a, ó gbɔɔ ō yuklɔ ku ɔcɛ o gbɔbu ɔna ō ta eko doodu ipu Ɔya Ɔmigwo 1, 1986.

Eko nɛ ó wɛ ɛdrɔ a, ɔyinɛ alɔ Nɔnyilɔ Winder gáā má ayinɛ nu nōo lé ɔnyakwɔcɛ lɛ ɔ nōo yɔ i yuklɔ ipu Ubɛtɛlu eko ɔɔma a. Ɔɔma ya kóō lɛ unwu ō lɛ abɔ ta ɔkpá ō gáā yuklɔ ku Ubɛtɛlu eko nɛ ó kwu piya ijinkpa a. Ipu Ɔya Ɔmɛhɔ 1990, é lɛ ɔ higwu kóō yuklɔ ipu Ubɛtɛlu nōo yɔ u Wallkill a.

Ipu Ubɛtɛlu, ɔyinɛ alɔ Nɔnyilɔ Winder yuklɔ aya ɛyɛɛyɛyi, kwu Cleaning Department, Farm Department, mla u Bethel Office. Ó lɛ ɔnyā nu nōo lé ka u Angela a ipu ihayi ku 1997, uwa ɛplɛɛpa kē humayi yuklɔ ku Ubɛtɛlu ŋmiifi eko ɔɔma. Ipu ihayi ku 2014, é lɛ uwa tɛhɔ gā u Warwick, ɛga nɛ ɔyinɛ alɔ Nɔnyilɔ Winder je otabɔ lɛ uklɔ ku ɔlɛ ɔtahɛ ku abɔ ku ɛga ō yuklɔ ku alɔ néē yɔ i gwo a. Ipu ihayi ku 2016, é le yɛ gā u Watchtower Educational Center nōo yɔ u Patterson a, ɛga nɛ ɔyinɛ alɔ Nɔnyilɔ Winder yuklɔ mla u Audio/Video Services a. Igbihi nɛ ihayi ɛnɛ le gla a, é le cigbihi gā u Warwick, abɔɔ a, é le uklɔ ku ɔyinɛ alɔ Nɔnyilɔ Winder piyabɔ ō yuklɔ mla u Personnel Committee Office. Ipu Ɔya Ɔmɛta 2022, é lɛ ɔ fu kóō je otabɔ lɛ Personnel Committee ku Ígwu Nōo Gē Leyi Kwu Ɔwa Ku Alɔ a.

Alɔ gbɔɔkɔ ku Ujehofa kóō hɔha nɛɛnɛhi ce ācɛ nōo wɛ “ɛhi lɛ ācɛ” a, abɔ é gɔbu yɔ i yuklɔ lɔfu lɔfu ohigbu ɛlā ku Ajɔɔcɛ a.—Āfi. 4:8.