EVAỌ Edesa-Oka, nọ ọ jọ edẹ 18 amara Ọvo 2023, a whowho obọdẹ usi jọ kẹ omai kpobi evaọ jw.org, inọ a rọ Brọda Gage Fleegle avọ Jeffrey Winder mu no re a jọ Utu Ẹruorote Isẹri Jihova. Aimava na a gọ Jihova kri no, yọ a rọ eva rai kpobi ru iruo riẹ gaga no re.

Evaọ ukoko na a jọ yẹ Brọda Fleegle. Yọ obọ ukiediwo-ọre Pennsylvania U.S.A. a jọ yọrọ iẹe. Okenọ ọ jọ ikpe ikpegbọ, oye ọsẹgboni riẹ a rọ kwa kpohọ ẹwho ọsese jọ nọ a jọ gwọlọ inievo nọ e rẹ ta usi uwoma. Uwhremu na, ọ tẹ te họ-ame evaọ edẹ 20 Akpegbọvo, 1988.

Ọsẹgboni Brọda Fleegle a jẹ hae vuẹe inọ o mu iruo odibọgba oke-kpobi họ. Yọ a jẹ hai zizie esẹro okogho gbe inievo nọ e be jọ Ebẹtẹle ru iruo ziọ uwou rai. Brọda Fleegle o muẹrohọ nọ eva e be were inievo na gaga fiki iruo nọ a bi ru kẹ Jihova. Nọ ọ họ-ame no, u gbe kri hi, o te mu ọkobaro oke-kpobi họ evaọ ẹdẹ ọsosuọ Azie, 1989. A te zizie iei kpohọ Ebẹtẹle evaọ ikpe ivẹ nọ i lele i rie. Anwọ okenọ ọ rọ jọ ikpe ikpegbivẹ ọ rọ ta nọ o ti kpohọ Ebẹtẹle nọ o te te ohwo nọ o re kpohọ Ebẹtẹle no. Evaọ amara Akpe 1991, o ro mu iruo họ eru evaọ Ebẹtẹle nọ ọ rrọ Brooklyn.

Ofẹ nọ a re jo printi ebe ọ jọ je ru iruo. Yọ ikpe eree ọ jọ etẹe ru iruo. A tẹ te rehọ iẹe kpohọ ofẹ nọ a rẹ jọ rẹrote iruẹru ikoko. Yọ oke yena ukoko nọ a rẹ jọ ta ẹvẹrẹ Russia ọ jọ evaọ imikpe jọ. O te ti wo aye evaọ ukpe 2006. Odẹ riẹ Nadia. Aye riẹ o te ti mu iruo họ eru evaọ Ebẹtẹle re. Aimava a jọ ukoko nọ a rẹ jọ ta ẹvẹrẹ Portuguese. Yọ u te no ere no, a jọ ukoko ẹvẹrẹ Spanish vrẹ ikpe ikpe. Nọ Brọda Fleegle ọ jọ oria nọ a rẹ jọ rẹrote iruẹru ikoko ikpe buobu no, a tẹ rehọ iẹe kpohọ Ọfisi Ogbẹgwae Ewuhrẹ. Uwhremu na, a tẹ rehọ iẹe no etẹe kpohọ Ọfisi Ogbẹgwae Iruo Ukoko. Nọ u je te amara Asa 2022, ukoko o tẹ rehọ iẹe mu re ọ jọ ofiobọhọ kẹ Ogbẹgwae Iruo Ukoko orọ Utu Ẹruorote na.

Ọsẹgboni Brọda Winder a rrọ ukoko na. Yọ ẹwho Murrieta, evaọ California, nọ ọ rrọ U.S.A. a jọ yọrọ iẹe. Ọ họ-ame evaọ edẹ 29  amara Asa, 1986. Ọ tẹ rehọ ọkobaro obufihọ evaọ amara nọ o lele i rie. Ọkobaro obufihọ na ọ were riẹ gaga. Fikiere o te ru ei emerae buobu. Nọ u je te ẹdẹ ọsosuọ amara Akpe, 1986, o te mu ọkobaro oke-kpobi họ.

Brọda Winder ọ nyae ruẹ inievo ekpako ivẹ riẹ evaọ obọ Ebẹtẹle okenọ ọ jọ ikpe ikpegbọ. Obei nọ ọ nya na, u ru nọ ọ rọ ta nọ o ti kpohọ Ebẹtẹle nọ ọ tẹ rro no. Fikiere, nọ o te unuikpe nọ ohwo o re ro kpohọ Ebẹtẹle no, o te fili efọmo Ebẹtẹle. Nọ u je te amara Asoi 1990, a te zizie iei kpohọ Ebẹtẹle Wallkill.

Brọda Winder o ru oghoghẹrẹ iruo buobu no evaọ Ebẹtẹle. O ru iruo no evaọ ofẹ nọ a rẹ jọ rẹrote iwou je ru ai fo. Yọ ọ jọ usu ahwo nọ a jẹ hae rọ ijini fi ẹbe ogege jẹ ruẹrẹ eware nọ a ti ro there emu kpahe. A tẹ jẹ rehọ iẹe kpohọ ọfisi nọ a rẹ jọ ma omaa eware buobu nọ a re ru evaọ Ebẹtẹle (Bethel Office). Nọ u je te ukpe 1997, o te wo aye. Odẹ aye riẹ Angela. Yọ rite inẹnẹ na tei te aye riẹ a gbẹ rrọ Ebẹtẹle ru iruo. Evaọ ukpe 2014, ukoko o tẹ rehọ ae no etẹe kpohọ Ebẹtẹle Warwick. O te je lele inievo nọ e jẹ bọ Ebẹtẹle Warwick ru iruo. Evaọ ukpe 2016 a tẹ rehọ iẹe avọ aye riẹ kpohọ Watchtower Educational Center evaọ obọ Patterson (koyehọ oria nọ isukulu ukoko na jọ e rrọ). Brọda Winder o te je ru iruo evaọ oria nọ a re jo rekọdo eware. Ikpe ene nọ i lele i rie, a tẹ wariẹ vuẹ ae nọ a kpobọ Warwick. Brọda Winder o te je ru iruo evaọ ọfisi Ogbẹgwae Ẹruorote Ahwo Uwou Ogha gbe Ebabọ. Evaọ amara Asa 2022, ukoko o tẹ rehọ iẹe mu re ọ jọ ofiobọhọ kẹ Ogbẹgwae Ẹruorote Ahwo Uwou Ogha gbe Ebabọ ọrọ Utu Ẹruorote na.

Ma be lẹ nọ jọ Jihova ọ ghale ‘ezae nana nọ a rọ kẹ omai ekẹ na.’ Ajọ ọ kẹ ae ẹgba nọ a re gbe ro ru iruo Uvie na vrẹ.—Ẹf. 4:8.