NA KUARTA-FÉRA, 18 di janeru di anu 2023, parse un avizu spesial na jw.org ta fla ma irmons Gage Fleegle i Jeffrey Winder diziginadu pa faze párti di Grupu Enkaregadu di Óbra di Tistimunhas di Jeová. Kes dôs irmon li dja ten txeu ténpu ta sirbi Jeová di manera fiel.

Irmon Gage kriadu na oésti di Pensilvánia, na Mérka, pa se pai ku se mai ki é Tistimunhas di Jeová. Kantu ki el éra jóven, se família muda pa un sidadi pikinoti ki ta fika fóra di sidadi, undi ki tinha más nisisidadi. Poku ténpu dipôs, na dia 20 di novénbru di anu 1988, el batiza.

Pai ku mai di Gage sénpri ta insentivaba el pa el entra na sirvisu pa ténpu interu. Txeu bês, se família ta resebeba enkaregadu di grupu di kongregason i betelitas na ses kaza, i irmon Gage ta odjaba ma kes irmon ku irmans li éra filís. Poku ténpu dipôs ki el batiza, el bira pioneru. Kel-li kontise na dia 1 di setenbru di anu 1989. Dôs anu dipôs, el konsigi alkansa kel méta ki el poba désdi kantu el tinha 12 anu, ki éra ba sirbiba na Betel. El kumesa se sirvisu na Betel di Brooklyn na otubru di anu 1991.

Na Betel, duránti 8 anu irmon Gage trabadja na poi kapa na publikasons, i dipôs el diziginadu pa trabadja na Dipartamentu di Sirvisu. Duránti kel ténpu, el tevi alguns anu ta sirbi na un kongregason di língua rusu. Na anu di 2006, el kaza ku un irman ki txoma Nadia, ki ba sirbi djuntu ku el na Betel. Djuntu es sirbi na tiritóriu di língua purtugês, i pa más di 10 anu es sirbi na tiritóriu di língua spanhol. Dipôs di txeu anu ta trabadja na Dipartamentu di Sirvisu, irmon Gage diziginadu pa trabadja na skritóriu di Kumison di Ensinu i dipôs na skritóriu di Kumison di Sirvisu. Na marsu di anu 2022, el diziginadu pa ser ajudanti di Kumison di Sirvisu di Grupu Enkaregadu di Óbra.

 Irmon Jeffrey kriadu na Murrieta, na Kalifórnia, na Mérka. Se pai ku se mai inxina-l verdadi i el batiza na dia 29 di marsu di anu 1986. Lógu na kel otu mês, el bira pioneru ajudanti. El gosta txeu dimás ki el krê kontinuaba. Dipôs di alguns mês ta sirbi di pioneru ajudanti, el bira pioneru fíksu na dia 1 di otubru di anu 1986.

Kantu irmon Jeffrey éra jóven, el ba vizita se dôs irmon más grandi ki staba ta sirbi na Betel. Kel-li pô-l ku vontadi di prenxe pitison pa sirbi na Betel óras ki el bira grandi. I na maiu di anu 1990, el konvidadu pa sirbi na Betel na Wallkill.

Na Betel, irmon Jeffrey trabadja na txeu dipartamentu, sima dipartamentu di linpéza i di agrikultura, i na skritóriu di Betel. Na anu di 1997, el kaza ku un irman ki txoma Angela, i es sta ta sirbi djuntu na Betel ti gósi. Na anu di 2014, el mudadu pa Warwick. La el trabadja na djuda na konstruson di prédius di Sédi Mundial. Na anu di 2016, es mandadu pa Betel di Patterson na Nova York, i irmon Jeffrey diziginadu pa trabadja na Dipartamentu di Audiu i Vídiu. Kuatu anu dipôs, es volta otu bês pa Warwick i irmon Jeffrey diziginadu pa trabadja na skritóriu di Kumison di Pesoal. I na marsu di anu 2022, el diziginadu pa ser ajudanti di Kumison di Pesoal di Grupu Enkaregadu di Óbra.

Nu ta ora pa Jeová kontinua ta abênsua kes ómi li, ki é sima un “prezenti”, timenti es ta kontinua ta sforsa pa apoia interesis di Reinu. — Efé. 4:8.