METITATU, 18 Januali 2023, ko jw.org okwa li kwa holoka eshiivifo le likalekelwa la popya kutya omumwatate Gage Fleegle nosho yo Jeffrey Winder ova nangekwa po ve li oilyo yOlutuwiliki lEendombwedi daJehova. Aveshe ova longela Jehova noudiinini oule wefimbo lile.

Omumwatate Fleegle okwa kulila kouninginino waPennsylvania moU.S.A., a tekulwa kovadali vaye ovatilikalunga. Eshi a li omunyasha, ovaneumbo lavo ova li va tembukila kokadoolopa ke li koushai oko kwa li ku na omhumbwe inene yovaudifi. Diva konima yaasho, okwa li a ninginifwa mo 20 Novemba 1988.

Ovadali vomumwatate Fleegle ova kala alushe have mu ladipike a ye moilonga yefimbo li yadi. Luhapu ova kala hava shivi meumbo lavo ovapashukilishikandjo nOvabetel, nomumwatate Fleegle okwa li a mona nghee ovamwatate novamwameme va tya ngaho va hafa. Diva konima eshi a ninginifwa, okwa li a ninga omukokolindjila wondjikilile me 1 Septemba 1989. Konima yomido mbali, okwa li a hanga elalakano laye lokulonga kObetel, olo a li e litulila po, eshi a li e na omido 12. Okwa li a hovela okulonga kObetel yaBrooklyn muOktoba 1991.

Omumwatate Fleegle okwa longa kObetel kOshikondo shOkutula kumwe Omambo oule womido hetatu, nolwanima okwa li a tuminwa kOshikondo shOilonga. Pefimbo opo, okwa kala e li meongalo lOshirussia oule womido dinini. Opo nee mo 2006 okwa ka hombola Nadia, oo e ke mu waimina moilonga yaBetel. Ova kala pamwe meongalo lOshiputu nova kala yo meongalo lOshispanish oule womido di dulife pomulongo. Konima yomido dihapu odo a kala kOshikondo shOilonga, omumwatate Fleegle okwa li a tumwa a ka longele kOmbelewa yOkomitiye yOkuhonga nolwanima okOmbelewa yOkomitiye yOilonga. MuMarsa 2022, okwa li a nangekwa po e li omukwafeli mOkomitiye yOilonga yOlutuwiliki.

 Omumwatate Winder okwa kulila muMurrieta, California, mo-U.S.A. Okwa hongwa oshili kovadali vaye nokwa ninginifwa mo 29 Marsa 1986. Omwedi wa shikula ko, okwa li a tokola okukufa oukwafelikokolindjila. Okwa li e u hafela neenghono nokwa li a hala okutwikila. Konima yeemwedi donhumba, eshi a kala ta kufa oukwafelikokolindjila, okwa li a ninga omukokolindjila wondjikilile me 1 Oktoba 1986.

Eshi a li omunyasha, omumwatate Winder okwa li a talela po ovamwainamati, ovo va kula kuye, ovo va li hava longo kObetel pefimbo opo. Etalelepo olo ola li le mu ningifa a kale a halelela okuninga eindilo lokuya kObetel, ngeenge okwa kulu. MuMei 1990, okwa li a shivwa a ka longe kObetel koWallkill.

Omumwatate Winder kObetel okwa longa moikondo i lili noku lili, mwa kwatelwa Oshikondo shOkuwapaleka, Oshikondo shOunamapya nomOmbelewa yaBetel. Okwa hombola Angela mo 1997, nokudja opo ova kala tava longele pamwe moBetel. Mo 2014, ova li va tumwa va ka longele koWarwick, oko omumwatate Winder a li ha kwafele moilonga yokutunga omatungo eembelewa detu da kula. Mo 2016, ova li va tembukila ko-Watchtower Educational Center oyo i li moPatterson, oko omumwatate Winder a li ha longo mOshikondo shOkukwata Omawi nOuvidio. Konima yomido nhee, ova li va tembukila vali koWarwick, nomumwatate Winder okwa li a pewa oshinakuwanifwa shokulonga mOmbelewa yOkomitiye yOnghalonawa yOvanhu. MuMarsa 2022, okwa li a nangekwa po e li omukwafeli mOkomitiye yOnghalonawa yOvanhu yOlutuwiliki.

Ohatu ilikana Jehova a nangeke noupuna ‘ovalumenhu ovo ve li eeshali,’ eshi tava twikile okulonga noudiinini mokuxumifa komesho oinima yOuhamba. — Ef. 4:8.