MU DIISAAT, dya 18/1/2023, tuhetel dimanyish dya habwaah mu sit iitut a jw.org, dileej neey biin-kweet aab: Gage Fleegle ni Jeffrey Winder i biibanoonoh bwa kushaalobw biin mu Kasumbw kaludik ka Baatemw ba Yehow. Biin-kweet babidy aab i bakadil Yehow mudimw ni lulamat mukacy mwa mafuk mavul.

Mwiin-kweet Fleegle i mukasakeen mu Pennsylvanie wa kutweetweelel diib, mu États-Unis, ni balel bindiy baakady baciin Mawej. Ciisang cyaakadyey sand, cisak cyaabab cimwangeel ni kuyecy mu kataawuny kakeeh kwaakadyobw bakaam bakajaady bavul. Kuunyim kwa mafuk makeeh, uhetel baatiisumw mu diifuk dya 20/11/1988.

Balel ba mwiin-kweet Fleegle baakady teng bamukashish bwa kulongey mudimw a ku diib ni ku diib. Baakady ni ciibidil cya kwaak balombol ba bijeng ni biin ku Betel kwaabab, ni mwiin-kweet Fleegle waakady mwa kutal mwaakady biin-kweet baan-balum ni baan-bakaj aab biikal ni musangal. Mafuk makeeh kuunyim kwa yiy muman kuhet baatiisumw, utwaadijil kulong mudimw a buuseb’aa njil bwa ha ciibidil—mu diifuk dya 1/9/1989. Kuunyim kwa mivw yibidy, ukumbajil kiihacil kindiy kaakadyey mwiifundil haacyaakadyey ni mivw 12—ka kukal mudimw ku Betel. Utangil kukal mudimw ku Betel wa mu Brooklyn mu suuny a 10/1991.

Ku Betel, mwiin-kweet Fleegle waakady ukal mudimw a kulamik mikand ni kwiiyumb bizub mukacy mwa mivw mwandamukul, ni kuunyim bamutumin mu cibambal citaatal mudimw a bukajaady. Mu ciisang aacy, waakady ukal mudimw mu cisumbw cya cileebel cya ciin Risih mukacy mwa mivw yikeeh. Mu 2006 ubakil mukaj indiy, Nadia, utangil kukal neend mudimw ku Betel. Boos babidy, bakadil mudimw mu teritwaar wa ciin Portugal ni bakadil cikwaabw mu teritwaar a ciin Espany mukacy mwa mivw yihit ha dikumy. Kuunyim kwa mivw yivul ukadil mudimw mu cibambal citaatal mudimw, baakishil mwiin-kweet Fleegle mudimw mukwaabw bwa kwiikaley mu Biro bya komiteh wa kulongweesh ni kuunyim ukadil mudimw mu Biro bya Komiteh  Utaatal Mudimw. Mu suuny 3/2022 ushaadil mukwanjok mu Komiteh wa Mudimw wa Kasumbw Kaludik.

Mwiin-kweet Winder i mukasakeen mu Murrieta, mu Californie, mu États-Unis. I balel bindiy bamulongweeshel myand ya biin-biin, ni uhetel baatiisumw mu diifuk dya 29/3/1986. Mu suuny ulondel, wangacil dihangadik dya kushaal seb aa njil mukwanjok. Ukacil bikasakan mudimw aaw ni ukacil bwa kutungunuk ni kulong mudimw a buuseb’a njil bwambulwiish mukacy mwa suuny yivul, utangil buuseb’ aa njil bwa ha ciibidil mu diifuk dya 1/10/1986.

Hacyaakadyey ni bidimw muush mwa 20, mwiin-kweet Winder uyiil katal baayaay indiy babidy baakady bakal mudimw ku Betel ha ciisang aacy. Kulong nook, kukashishil lungeny lwindiy lwa kuy kakal mudimw ku Betel haakadyey mwa kukuluuh. Ni mu suuny 5/1990, bamubiikeen bwa kuy kalongey mudimw ku Betel wa ku Wallkill.

Ku Betel, mwiin-kweet Winder ukadil mudimw mu bibambal bishiil-shiilangan: mu cya myand ya makend, cya myand ya madimy ni mu biroh bya Betel. Mu 1997, ubakil mukaj indiy Angela, ni kacy teng ciisang aacy bakaakal nend mudimw aakaabumw ku Betel. Mu 2014 biibatumin ku Warwick, kwiinaak, mwiin-kweet Winder waakady wambulwiish ku midimw ya lwiibak lwa biro biitut bya bulab butuutul. Mu 2016, bayiil ku Patterson cyaab citam cya kulongweeshelangan cya Watchtower, Kwiinaak mwiin-kweet Winder ukadil mudimw mu cibambal cya kukwaat kwa may ni film. Kuunyim kwa mivw inaay, bahingilomw ku Warwick, ni baakishil mwiin-kweet Winder mudimw mu biro bya Komiteh utaatal biin ku Betel. Mu suuny 3/2022, ushaadil mukwanjok mu Komiteh wa Kasumbw Kaludik utaatal biin ku Betel.

Tuloolomb bwa Yehow afiil ‘baat bady biikal biheel’ aab kis muvul bu mutuutungunukobw ni kukal mudimw mukasakan bwa myand ya Bukaleng.—Ef. 4:8.