EBIRO, 18 Kyakasathu, Okwokubanza, 2023, okwa jw.org mukwabya ekirango ky’embaghane, ekikabugha kithi Mughalha Wethu Gage Fleegle na Jeffrey Winder babirisombolhwa eribya okwa Kathunga Akakasondolha ak’Abema ba Yehova. Baghalha bethu abosi babiri aba babirikolera Yehova buthaleghulha ahabw’emyaka mingyi.

Mughalha Wethu Fleegle akulibawa n’ababuthi biwe abakubaha Nyamuhanga, ebulengera lyuba bwe Pennsylvania omwa U.S.A. Iniakine mulengwa, eka yabu muyahumira okwa kalu kake eyabya obuyithawa bunene. Buthuku buke enyuma waho, mwabatizibwa omwa Kwerikuminakughuma 20, 1988.

Ababuthi ba Mughalha Wethu Fleegle ibakabera erimuhira mw’omuhwa w’eryingira omwa mubiiri w’omughulhu wosi. Ibakabera erikokya abalebererya b’omuthimbo n’abanya Beteli, neryo Mughalha Wethu Fleegle iniakalhangira ngoku balikyethu aba batsemire. Buthuku buke alibatizibirwe, mwatsuka obutemburi bw’omughulhu wosi—omwa Kwomwenda 1, 1989. Myaka ibiri enyuma waho, mwahika okwa kilhubirirwa kiwe ekyo ayihiriraho iniakine w’emyaka 12—ekilhubirirwa ky’erikolera okwa Beteli. Atsuka erikolera okwa Beteli e Brooklyn omwa Kwerikumi 1991.

Iniane okwa Beteli, Mughalha Wethu Fleegle mwakolera omw’ikolero ly’ebitabu ahabw’emyaka munani, enyuma waho mwasubibwa omwa Dipatimenti y’Omubiiri. Okwa buthuku obo, mwabya omwa kithunga eky’omubughe w’Olhurasya ahabw’emyaka mirebe. Omwa 2006 mwaherukya mukali wiwe ya Nadia, nayu amamuyiyungako omwa mubiiri we Beteli. Haghuma, babirikolera omwa myanya eyikabughawamo Olhupotiguizi kandi mubaghunza emyaka eyilhabire okw’ikumi omwa myanya eyikabughawamo Olhuspanishi. Enyuma w’emyaka mingyi iniane omwa Dipatimenti y’Omubiiri, Mughalha Wethu Fleegle mwasubibwa omwa Ofisi y’Ekomiti y’eby’Erikangirirya n’enyuma  waho omwa Ofisi y’Ekomiti y’Omubiiri. Omwa Kwakasathu 2022 mwasombolhwa ng’omuwathikya okwa Komiti y’Omubiiri ey’Akathunga Akakasondolha.

Mughalha Wethu Winder akulira e Murrieta, California, U.S.A. ababuthi biwe bamukuliraya omwa kwenene, kandi abatizibawa Okwakasathu 29, 1986. Okwezi okwakwamako, mwathwamu erikolha obutemburi bw’obuwathikya. Mwabutsemera kutsibu kyamaleka inianza erilholha embere. Abere abughunzamo mezi malebe, mwatsuka obutemburi bw’omughulhu wosi omwa Kwerikumi 1, 1986.

Iniakine mulengwa, Mughalha Wethu Winder mwabungira baghalha babu babiri abakulhu biwe ababya bakakolera okwa Beteli okwa buthuku obo. Olhubungo olho mulhwamuhiramo omuhwa w’erianza erisyakolera okwa Beteli abikulha. Kandi omwa Kwakathano 1990, mwakokibwa okwa Beteli e Wallkill.

Iniane okwa Beteli, Mughalha Wethu Winder mwakolera omwa syodipatimenti muthina-muthina, imwamune ey’obuyonzo, ey’efamu, n’omwa Ofisi. Mwaherukya mukali wiwe ya Angela, omwa 1997, kandi haghuma banemukolera okwa Beteli erihika munabwire. Omwa 2014 mubasubibwa e Warwick, eyo, Mughalha Wethu Winder mwawathikya okwa buhimbe bw’ekyaghanda kikulhu. Omwa 2016 mubahumira okwa Watchtower Educational Center e Patterson, eyo, Mughalha Wethu Winder mwakolera omwa Audio/Video. Myaka ini enyuma waho, mubasuba e Warwick, kandi Mughalha Wethu Winder mwakolera omwa Ofisi y’Ekomiti ye Pasonel. Omwa Kwakasathu 2022 mwasombolhwa ng’omuwathikya okwa Komiti ye Pasonel ey’Akathunga Akakasondolha.

Thukasaba thuthi ambi Yehova iniatsumulha “abandu b’olhusunzo” aba banemulholha embere erikolha kutsibu busana n’emyatsi y’Obwami.—Efe. 4:8.