PA KISATU, pa 18 January, 2023, babijikile pa jw.org, kuba’mba Mulongo Gage Fleegle ne Jeffrey Winder banungwako ku Jibumba Jitangijila ja Bakamonyi ba kwa Yehoba. Bano balongo bonse babiji baingijila Yehoba mu bukishinka myaka yavula bingi.

Mulongo Fleegle wakomejile ku muzhika wa Pennsylvania, U.S.A., kabiji bansemi bo bamufunjishenga bukine. Byo ajinga na myaka kukila jikumi na ibiji, kisemi kyanji kyavilukijile mu muzhi mucheche mwakepele basapwishi. Kabiji kechi pabanjile ne, wabatizhiwe pa 20 November, 1988.

Bansemi ba Mulongo Fleegle bamutundaikile kutendeka mwingilo wa kimye kyonse. Javula bansemi banji batemenwe kwita bakalama ba mwanzo ne balongo ne banyenga ba pa Betele kwiya ku nzubo kwabo kabiji Mulongo Fleegle wimwenejile lusekelo lwajinga na bano balongo ne banyenga. Mwaka walondejilepo kufuma kimye kyo abatizhiwe, watendekele bupainiya bwa kimye kyonse pa 1 September, 1989. Byo papichile myaka ibiji, wafikizhe mulaye wanji wa kuya na kwingijila pa Betele ye alayile saka aji na myaka 12. Mu October 1991, watendekele kwingijila pa Betele wa mu Brooklyn.

Mulongo Fleegle byo ajinga pa Betele, waingijilenga ku Dipatimenti wa Kupulinta Mabuku. Byo papichile myaka itanu na isatu, watendekele kwingijila ku Dipatimenti Utala pa Bibena Kwenda Mwingilo. Myaka itanshi icheche waingijilenga na bipwilo byamba mulaka wa kina Russia. Mu 2006 wasongwele nyenga Nadia, kabiji naye bamwichile pa Betele. Batendekele kwingijila pamo mu nyaunda ya bipwilo byamba mulaka wa Kipotogizi kabiji myaka ikwabo kukila jikumi baingijile na nyaunda mwajinga bipwilo byamba mulaka wa Kisipanishi. Mulongo Fleegle byo aingijile myaka yavula bingi ku uno Dipatimenti Utala pa Bibena Kwenda Mwingilo, bamupele mwingilo mukwabo wa kwingijila mu Ofweshi wa Kavoto ka Lufunjisho kabiji palutwe kacheche watendekele kwingijila mu Ofweshi wa Kavoto ka Mwingilo. Mu March  2022, bamutongwele kwikala nkwasho ku Kavoto ka Mwingilo ka Jibumba Jitangijila.

Mulongo Winder wakomejile ku Murrieta, mu muzhi wa California, U.S.A. Bansemi banji bo bamufunjishe bukine kabiji wabatizhiwe pa 29 March, 1986. Ñondo walondejilepo wafuukwilepo kutendeka mwingilo wa bupainiya bwa kukwasha. Wakebelenga kutwajijila kwingila uno mwingilo mambo watendekele kumumvwa bulongo. Byo aingijileko bañondo bacheche mwingilo wa bupainiya bwa kukwasha, watendekele bupainiya bwa kimye kyonse pa 1 October, 1986.

Mulongo Winder byo akijinga mwanyike, wafwakashijile bakolojanji babiji baingijilenga pa Betele pa kyokya kimye. Na mambo a kino, byo akomeneko wanembele pepala wa kwipwizhapo mwingilo wa pa Betele. Kabiji mu May 1990, bamwichile kuya na kwingijila pa Betele wa ku Wallkill.

Mulongo Winder byo ajinga pa Betele, waingijile ku madipatimenti avula, kuvwangakotu ne Dipatimenti wa Butooto, Dipatimenti wa Bunjimi ne Dipatimenti Utala pa Balongo ne Banyenga Bengijila pa Betele. Mu 1997 wasongwele nyenga Angela, kabiji kufuma kyokya kimye bengijila pamo mwingilo wa pa Betele. Mu 2014 bebavilwijile ku Warwick, Mulongo Winder ko aingijilenga mwingilo wa kushimika ofweshi mukatampe wa ntanda yonse. Mu 2016, bebavilwijile pekela masukulu (Watchtower Educational Center) ku Patterson, akwa Mulongo Winder waingijilenga ku Dipatimenti Ufyatula Mavidyo. Byo papichile myaka ina, bebabwezhezhe ku Warwick, kabiji Mulongo Winder waingijilenga mu Kavoto Katala pa ba Mwingilo wa Kimye Kyonse. Mu March 2022, bamutongwele kwikala nkwasho ku Kavoto Katala pa ba Mwingilo wa Kimye Kyonse ka Jibumba Jitangijila.

Tubena kulomba’mba Yehoba apeshe bano banabalume kwikala “bya bupe” ne kutwajijila kwingila na ngovu uno mwingilo wa Bufumu.​—Efi. 4:8.