ဖဲမုၢ်သၢနံၤ, လါယနူၤအါရံၤ ၁၈, ၂၀၂၃ န့ၣ်ပထံၣ်ဘၣ် တၢ်ဘိးဘၣ်သ့ၣ်ညါလီၤဆီတခါလၢ jw.org ဝဲးပဆဲးအပူၤ. ဖဲန့ၣ် ပာ်ဖျါထီၣ်ဝဲလၢ ဒီပုၢ်ဝဲၢ်ခွါက့ၣ် ဖလံကၢၤ ဒီးဒီပုၢ်ဝဲၢ်ခွါကၠဲဖရံၤ ဝါဒၢၤန့ၣ် ပှၤပာ်ထီၣ်အဝဲသ့ၣ် ဒ်ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်. ဒီပုၢ်ဝဲၢ်ခွါခံဂၤအံၤ မၤယဟိဝၤယွၤ အတၢ်မၤလၢ တၢ်သးတီအပူၤ ဖးယံာ်လံ.

ဒီပုၢ်ဝဲၢ်ခွါဖလံကၢၤ ဒိၣ်ထီၣ်လၢ ဖဲၤစံၤဘ့နံယါ မုၢ်နုာ်တခီလၢ ကီၢ်အမဲရကၤ ဒီးအမိအပါ သိၣ်လိအီၤ တၢ်မ့ၢ်တၢ်တီ. ဖဲအသးစၢ်အခါန့ၣ် အဟံၣ်ဖိဃီဖိ လဲၤပၠီလၢသဝီဖိတဖျၢၣ် ဖဲပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ. အဝဲသ့ၣ် လဲၤပၠီဖဲန့ၣ် ဝံၤတယံာ်ဘၣ်ဒီး ဒီပုၢ်ဝဲၢ်ခွါဖလံကၢၤ ဒိးဘျၢထံ ဖဲလါနိၣ်ဝ့ဘၢၣ် ၂၀, ၁၉၈၈.

ဒီပုၢ်ဝဲၢ်ခွါဖလံကၢၤ အမိအပါ ဟ့ၣ်ဂံၢ်ဟ့ၣ်ဘါအီၤလၢ အကကဲထီၣ် ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤ. ညီနုၢ်န့ၣ် အမိအပါ ကွဲမုာ်ဝဲ ကဝီၤအပှၤကွၢ်တၢ် ဒီးပှၤဘ့ၤသ့လးဖိ လၢအဝဲသ့ၣ်အဟံၣ် ဒီးဒီပုၢ်ဝဲၢ်ခွါဖလံကၢၤ ထံၣ်ဘၣ်ဝဲလၢ ဒီပုၢ်ဝဲၢ်မုၣ်ခွါတဖၣ်အံၤ အဝဲသ့ၣ်အိၣ်ဒီး တၢ်သးခုအါမး. ဒီပုၢ်ဝဲၢ်ခွါအံၤ ဒိးဘျၢထံဝံၤ တယံာ်ဘၣ်ဒီး အစးထီၣ်မၤ ပှၤလဲၤလၢညါ ဖဲလါစဲးပတ့ဘၢၣ် ၁, ၁၉၈၉. လၢခံ ခံနံၣ်ဒီးန့ၣ် အဖီတၢၣ်လၢ အပာ်လီၤဃာ်ဝဲဖဲ အသးအိၣ် ၁၂ နံၣ် လၢအဘၣ်ဃးဒီး အကမၤတၢ်လၢ ဘ့ၤသ့လးန့ၣ် ဟဲလၢပှဲၤထီၣ်ဝဲ. ဒီးဖဲလါအီးကထိဘၢၣ် ၁၉၉၁ န့ၣ်အစးထီၣ် မၤတၢ်လၢ ဘ့ၤသ့လး ဖဲဘရိးကလ့ၣ်.

လၢဘ့ၤသ့လးန့ၣ် ဒီပုၢ်ဝဲၢ်ခွါဖလံကၢၤ မၤတၢ်လၢ ပှၤစဲကျံးထုးထီၣ်လံာ်လဲၢ်ဝဲၤကျိၤ ဃိးနံၣ် ဒီးလၢခံ အလီၤဘၣ်က့ၤမူဒါလၢ ဘီမုၢ်အတၢ်မၤဝဲၤကျိၤ. ဖဲအမၤတၢ်လၢ ဘီမုၢ်အတၢ်မၤဝဲၤကျိၤအခါ အအိၣ်တၢ်အိၣ်ဖှိၣ်လၢ ပှၤတဲရၢၡါကျိာ် တဘျုးနံၣ်ညါ. ဒီးဖဲ ၂၀၀၆ န့ၣ်အဖျီသးဒီးအမါ နါဒံယါ ဒီးလၢခံ အမါစ့ၢ်ကီး မၤတၢ်လၢ ဘ့ၤသ့လး. အဝဲသ့ၣ် အိၣ်ဘၣ်တၢ်အိၣ်ဖှိၣ်လၢ ပှၤတဲဖီၣ်တူၢ်ကံးကျိာ် ဒီးအိၣ်ဘၣ်လၢ ပှၤတဲစပဲနံးကျိာ် အနံၣ်တဆံဘျဲၣ်ညါ. ဒီပုၢ်ဝဲၢ်ခွါဖလံကၢၤ မၤတၢ်လၢ ဘီမုၢ်အတၢ်မၤဝဲၤကျိၤ တဘျုးနံၣ် ဝံၤအလီၢ်ခံ အလီၤဘၣ်မူဒါလၢ တၢ်သိၣ်လိနဲၣ်လိ ကမံးတံာ် အရူ ဒီးလၢခံ အလီၤဘၣ်မူဒါ လၢ ဘီမုၢ်အတၢ်မၤ ကမံးတံာ်အရူ. ဖဲလါမၢ်ၡး ၂၀၂၂ န့ၣ်ပှၤပာ်ထီၣ်အီၤလၢ ဘီမုၢ်အတၢ်မၤ ကမံးတံာ် အပှၤမၤစၢၤတၢ် လၢဝဲၤလီၢ်ခိၣ်သ့ၣ်.

မ့မ့ၢ် ဒီပုၢ်ဝဲၢ်ခွါဝါဒၢၤန့ၣ် အဒိၣ်ထီၣ်လၢ မၢၤရံၤအဲတၤ, ခဲၤလံၤဖိနံယါ လၢကီၢ်အမဲရကၤ. အမိအပါ သိၣ်လိအီၤ တၢ်မ့ၢ်တၢ်တီ ဒီးအဒိးဘျၢထံ ဖဲလါမၢ်ၡး ၂၉, ၁၉၈၆ နံၣ်. အဒိးဘျၢထံ ဝံၤတလါဘျီ အစးထီၣ်မၤ ပှၤလဲၤလၢညါမၤစၢၤတၢ်. အမၤပှၤလဲၤလၢညါမၤစၢၤတၢ် မုာ်ဒိၣ်မးအဃိ အဘၣ်သးဆဲးမၤဝဲ. ဒီးအမၤဝဲန့ၢ် တဘျုးလါဝံၤဒီး ဖဲလါအီးကထိဘၢၣ် ၁, ၁၉၈၆ န့ၣ်အစးထီၣ်မၤဝဲ ပှၤလဲၤလၢညါ.

ဖဲဒီပုၢ်ဝဲၢ်ခွါဝါဒၢၤ သးစၢ်အခါန့ၣ် အလဲၤဟးအိၣ်သကိး အကၠီခံဂၤ လၢအမၤတၢ်လၢ ဘ့ၤသ့လး. အတၢ်လဲၤဟးတဘျီအံၤ ထိၣ်ဟူးထိၣ်ဂဲၤထီၣ်အီၤလၢ အကမၤတၢ်လၢ ဘ့ၤသ့လး ဖဲအညါအိၣ်ထီၣ်အခါ. ဒီးဖဲလါမ့ၤ ၁၉၉၀ န့ၣ်ပှၤကွဲမုာ်အီၤလၢ အကမၤတၢ်လၢ ဘ့ၤသ့လး ဖဲဝီခ့.

လၢဘ့ၤသ့လးန့ၣ် ဒီပုၢ်ဝဲၢ်ခွါဝါဒၢၤ မၤတၢ်လၢ ဝဲၤကျိၤတဘျုးခါညါ ဒီးအမၤဘၣ်တၢ်လၢ တၢ်မၤကဆှဲကဆှီတၢ်ဝဲၤကျိၤ, တၢ်သူၣ်တၢ်ဖျးဝဲၤကျိၤ ဒီးလၢဘ့ၤသ့လးအရူစ့ၢ်ကီး. အဖျီသးဒီးအမါ အဲကၠၢၤလၤဖဲ ၁၉၉၇ ဒီးစးထီၣ်ဖဲန့ၣ်န့ၣ် အဝဲသ့ၣ်ဆဲးမၤတၢ် လၢဘ့ၤသ့လး. ဖဲ ၂၀၁၄ န့ၣ်အဝဲသ့ၣ် လဲၤအိၣ်က့ၤလၢ ဝီဝံး ဒီးဖဲန့ၣ်န့ၣ် ဒီပုၢ်ဝဲၢ်ခွါဝါဒၢၤ မၤစၢၤတၢ်လၢ ဝဲၤလီၢ်ခိၣ်သ့ၣ် အတၢ်သူၣ်ထီၣ်ဘှီထီၣ် တကပၤ. ဒီးဖဲ ၂၀၁၆ န့ၣ်အဝဲသ့ၣ် လဲၤအိၣ်ကဒါလၢ တၢးထီခိးတၢ် တၢ်သိၣ်လိနဲၣ်လိအလီၢ် လၢဖဲထစၢၤ. ဖဲန့ၣ် ဒီပုၢ်ဝဲၢ်ခွါဝါဒၢၤ မၤတၢ်လၢ တၢ်ကလုၢ်ဒီးတၢ်ဂီၤမူဝဲၤကျိၤ. လၢခံလွံၢ်နံၣ်ဘျီ အဝဲသ့ၣ် က့ၤအိၣ်ကဒါလၢ ဝီဝ့း ဒီးဖဲန့ၣ် ဒီပုၢ်ဝဲၢ်ခွါဝါဒၢၤ လီၤဘၣ်မူဒါလၢ ပှၤမၤတၢ်ဖိဂ့ၢ်ဝီ ကမံးတံာ်အရူ. ဖဲလါမၢ်ၡး ၂၀၂၂ န့ၣ်ပှၤပာ်ထီၣ် ဒီပုၢ်ဝဲၢ်ခွါဝါဒၢၤ ဒ်ပှၤမၤတၢ်ဖိဂ့ၢ်ဝီ ကမံးတံာ် အပှၤမၤစၢၤတၢ် လၢဝဲၤလီၢ်ခိၣ်သ့ၣ်.

“ပိာ်ခွါတဖၣ်အံၤ” အလီၤဂာ် “ဒ်တၢ်ဟ့ၣ်တဖၣ် အသိး” ဒီးပဃ့ထုကဖၣ်လၢ ယဟိဝၤယွၤ ကဆိၣ်ဂ့ၤ အဝဲသ့ၣ် အတၢ်ဂုာ်ကျဲးစၢး လၢဘီမုၢ်တၢ်မၤအဂီၢ်.—အ့း ၄:၈.