Bampangi zole yina me bwelama na Kimvuka ya Bantwadisi
KILUMBU ya mercredi 18 janvier 2023, ba pesaka beto nsangu ya kitoko na jw.org, ti bampangi Gage Fleegle na Jeffrey Winder me bwelama na kati ya bampangi ya Kimvuka ya Bantwadisi ya Bambangi ya Yehova. Bampangi zole yayi, me vanda ya kukangama na kisalu ya Yehova na kati ya bamvula mingi.
Gage Fleegle na kento ya yandi, Nadia
Mpangi Fleegle kulaka na wesete ya Pennsylvanie, na U.S.A., mpe ni bibuti ya yandi longaka yandi matsyeleka. Na ntangu yandi vandaka ntwenya, yandi na dikanda ya yandi kwendaka na bwala mosi yina ba vandaka na nsatu ya lubakusu. Bamvula kaka fioti na manima, yandi kuzwaka mbotokolo kilumbu ya 20 novembre 1988.
Bibuti ya mpangi Fleegle vanda kindisaka yandi na kusala kisalu ya ntangu nyonso. Ba vandaka mpe na kifu ya kuyambaka bantwadisi ya circonscription mpe ba betelite na yinzo ya bawu, mpe mpangi Fleegle vandaka na kilengi mingi na kukutana na bawu. Ntangu fioti na manima ya mbotokolo ya yandi, yandi kumaka mupasuli-nzila kilumbu ya 1er septembre 1989. Bamvula zole na manima, yandi lungisaka mukanu ya yandi yina yandi bakaka na ntangu yina yandi vandaka na bamvula 12, kusala na Betele. Na octobre 1991, yandi bandaka na kusala na Betele ya Brooklyn.
Kuna, mpangi Fleegle lutisaka bamvula 8 na kisalu ya imprimerie. na manima, ba fidisaka yandi na Département pour le Service. Na ntangu yina, na mwa bantangu fioti, yandi vanda tulaka diboko na kimvuka ya ndinga ya Russe. Na 2006, yandi kwelanaka na Nadia mpe Nadia kwenda sala na yandi na betele. Kintwadi, ba tulaka diboko na kimvuka ya ndinga ya Portuguais, mpe na kimvuka ya ndinga ya Espagnole, ba salaka bamvula 10. Na manima ya bamvula mingi, na Département pour le Service, ba fidisaka Fleegle na kusala na biro ya Comité pour l’enseignement mpe na manima na biro ya Comité pour le Service. Na mars 2022, yandi kumaka kisadisi na Biro ya Comité pour le Service ya Kimvuka ya Bantwadisi.
Jeffrey Winder na kento ya yandi, Angela
Mpangi Winder kulaka na bwala ya Murrieta, na Californie, na U.S.A. Ni bibuti ya yandi longaka yandi matsyeleka, mpe na kilumbu ya 26 mars 1986, yandi kuzwaka mbotokolo. Ngonda yina landaka, yandi kumaka mupasuli-nzila ya ntangu fioti. Samu ti yandi zolaka yawu mingi, yandi vandaka ve na nsatu ya kubika yawu. Na manima ya kulutisa bantangu mingi na kisalu ya mupasuli-nzila ya ntangu fioti, yandi kumaka mupasuli-nzila ya ntangu nyonso kilumbu ya 1er octobre 1986.
Ntangu yandi vandaka ntwenya, yandi kwenda tala ba yaya ya yandi zole yina vanda salaka na Betele na ntangu yina, ya pesaka mpe yandi nsatu ya kusala na Betele ntangu yandi zola kula. Mpe na mai 1990, ba bokilaka yandi na kusala na Betele ya Wallkill.
Kuna, mpangi, Winder salaka na ba Départements mingi. Na kifwani, Département ya kusukula, na ferme mpe na biro ya Betele. Mpe yandi kwelanaka na kento ya yandi, Angela, na 1997, mpe ba bandaka kusala bawu zole kintwadi na Betele. Na 2014, ba fidisaka bawu na Warwick. Kuna, yandi tulaka diboko samu na kisalu ya kutunga Biro yina ke twadisaka bisalu ya beto na yinza nyonso. Na 2016 ba fidisaka bawu na kisika yina ke salamaka balukolo na Patterson, na Service ya Audio-Vidéo. Bamvula 4 na manima, ba vutukaka na Warwick, mpe kuna mpangi Winder bandaka kusala na Bureau ya Comité pour le Personnel. Na mars 2022, yandi kumaka kisadisi ya Comité pour le Personnel ya Kimvuka ya Bantwadisi.
Beto ke na sambilaka Yehova samu yandi sakumuna bantu yayi yina ke mutindu “makabu,” mpe samu ba bika ve kusala bangolo samu na Kimfumu ya Nzambi.—Ef. 4:8.
