MOUTATU, 18 Murongagona 2023, ko jw.org kwa tulire ko ediviso lyokulikarera asi munazinyetu gomugara Gage Fleegle ntani Jeffrey Winder vana va tura va kare womoMbungagedesi zoNombangi daJehova. Vanavazinyetu ava vavali kwa karera Jehova noulimburukwi siruwo sosire.

Munazinyetu Fleegle kwa kulira koutokero waPennsylvania, moAmerika ano vakondi vendi kwa murerere mousili. Apa ga kere munona, epata lyawo kwa dirukilire modoropa zonunu omu mwa hepere evatero lyenene lyovazuvhisi. Ano konyima zosiruwo yipo ga gwene ekuho mo-20 Mangundu 1988.

Vakondi vamunazinyetu Fleegle nkenye apa ngava mu korangeda a rugane sirugana sosiruwo nasinye. Awo ngava zigida vatareli wonombunga ntani vanaBeteli membo lyawo, ntani munazinyetu Fleegle ga mwene ruhafo oru va kere naro. Konyima zapa ga gwene ekuho yipo ga tamekere uzuvhisi wokukarerera mo-1 Sitarara 1989. Konyima zonomvhura mbali, age kwa sikisiremo sitambo sendi esi ga kere naso apa ga kere nonomvhura 12 sokurugana koBeteli. Age kwa tamekere kurugana koBeteli mwaSikukutu 1991.

MoBeteli, munazinyetu Fleegle kwa rugene nomvhura ntantatu omu ava ruganene nobuke, ano konyima yipo va mu pulire a rugane moDepartemende zoyirugana yokuzuvhisa. Posiruwo oso age kwa kere mombungakriste zeraka lyoruRusia. Mo-2006 yipo ga kwere Nadia, ogu ga tamekere nage kurugana koBeteli. Awo kwa kere mombungakriste zoRuputu ntani kwa kere mombungakriste zoRusipaniya nomvhura dokupitakana murongo. Konyima zokurugana moDepartemende zoyirugana yokuzuvhisa, munazinyetu Fleegle kwa rugene momberewa zoKomitiye zerongo ano konyima momberewa zoKomitiye zoyirugana yokuzuvhisa. MwaNsinano 2022 yipo va mu tulire a kare muvateli gomoKomitiye zoyirugana yokuzuvhisa zoMbungagendesi.

 Munazinyetu Winder kwa kulira moMurrieta, California, moAmerika. Vakondi vendi kwa mu rerera mousili, ntani age kwa gwene ekuho mo-29 Nsinano 1986. Mokwedi oku kwa kwemeko yipo ga tokwere kurugana uzuvhisi wokuvatera. Age kwa here kutwikira morwa ga yihaferere unene. Konyima zapa ga rugene uzuvhisi wokuvatera makwedi gongandi, yipo ga tamekere uzuvhisi wokukarera mo-1 Sikukutu 1986.

Apa ga kere mudinkantu, munazinyetu Winder kwa ka dingwire vakuru vendi vavali wovagara ava ngava rugana moBeteli posiruwo sina. Ano eyi kwa mu ninkisire a hare kuturamo ehundiro lyokuza koBeteli apa nga kura. MwaKudumonkuru 1990, yipo va mu zigidire a ka rugane koBeteli zomoWallkill.

MoBeteli, munazinyetu Winder nga rugana monodepartemende dokulisiga-siga, kukwateramo Departemende zokuzeresa, Departemende zofarama, ntani momberewa zoBeteli. Age kwa likwere na Angela mo-1997 ntani kutunda momvhura ozo awo kwa rugana kumwe moBeteli. Mo-2014 yipo va va tumine va ka rugane moWarwick. Munazinyetu Winder kwa vaterere kutunga mberewa zonene zoNombangi daJehova. Mo-2016 yipo va dirukilire koWatchtower Educational Center moPatterson, ano munazinyetu Winder nga rugana sirugana soAudio/Video Services. Konyima zonomvhura ne, yipo vatengwire koWarwick, ano munazinyetu Winder nga rugana momberewa zoKomitiye zovalizambeli. MwaNsinano 2022 yipo va mu tulire a kare muvateli gomoKomitiye zovalizambeli zoMbungagendesi.

Ta tu kanderere kwaJehova yipo a tungike unene ava “vagara ngomauhwi” ngomu vana kurugana unene pokutura Uhompa muhowo.—Efe. 4:8.