LACHITATU va 18 Januwale, 2023, va jw.org voo-eliwa chilengezo yavadela yoonga ira M’bali Gage Fleegle na M’bali Jeffrey Winder koo-eliwa m’Bungwe Lolamulela la Mboni da Yehova. Abali ambiili etene anala kotumikela Yehova mororomeleya wa thawi indendai.

M’bali Fleegle aulukulele m’banja la Mboni umazulo ya muzinda wa Pennsylvania, U.S.A., Angali wachinyamata, banja liwa lootamela wu taoni imo-iwa ing’onong’ono wewo wafuneya olaleela anjinji. Va-anavire thawi indendai, oobatiziwa va 20 Novembala, 1988.

Thawi detene makolo a M’balila koomulimbikisa ira aze apange utumiki wathawi detene. Aliwa kookonda wachela oing’anela dela koma teto atumiki ava Beteli waniwa ndipo M’bali Fleegle owona mwemo abali na arongolala kasangalalelaathu. Va-anavire thawi angabatiziwile, oowambeela upainiya wogarateya va 1 Septembala, 1989. Vangamalile chaka mbiili, ookwakwaneli-eda yolinga ineyo avi-elele liye angan’na chaka 12 yoi atumikele va Beteli. Oowambeela tumikela wu Beteli ya wu Brooklyn mu Octobala 1991.

Wu Beteli, M’bali Fleegle ootumikela m’Dipatimenti yosindikiza mabuku wa chaka 8 ndipo vanduli viwa owambeela tumikela mu Dipatimenti ya utumiki. Va thawiyo ootumukela mupingo wa iwongelo ya Chirasha. Wa chaka doyeva. Mu 2006 ootelana na mu-iyanae Nadia ndipo naliyene owambeela tumikela va Beteli. Aliwa kootumikela limo-i muchigawo ya Chipwitikizi ndipo wa chaka dokwaranya 10 muchigawo ya Chisipanishi. Kangatumikele wa chaka dinjinji m’Dipatimenti ya Utumiki, M’bali Fleegle ootumiziwa dowa tumikela mu Ofesi ya Mukomiti ya Utumiki. Mu Marichi 2022 oo-eliwa kala otandiza Mukomiti ya Utumiki ya Bungwe Lolamulela.

 M’bali Winder aulukulele muzinda wa California wu U.S.A. Aliwa kafunji-iwe choonadi na makolwiwa ndipo abatiziwile va 29 Marichi, 1986. Mwedi wo-arela oowambeela upainiya wotandiza. Oosangalala vinjinji na utumikila ndipo ooganiza vyokeda enjedela ndipo angapangile upainiya wotandiza wa medi doyeva, oowambeela upainiya ogarateya va 1 Okotobala, 1986.

Angali nyamata, M’bali Winder oodowa dowa aona achimwenae ambiili anayo katumikela wu Beteli. Ulendola woopangi-a ira m’balila afunenga tumikela va Beteli aza aulukula. Ndipo mu Mey 1990, oitaniwa ira atumikele wu Beteli ya wu Wallkill.

Wu Beteli, M’bali Winder ootumikela m’madipatimenti, o-iyana iyana tangani-avo Dipatimenti yosamalela wu Famu koma teto mu Ofesi ya Osamalela Banja la Beteli. Mu 1997, ootelana na mu-iyanae Angela ndipo kookala katumikelanga limo-i va Beteli kumela thawi ineyo. Mu 2014, aliwa kootamela wu Warwick wewo M’bali Winder ootandiza va chito yomanga maofesi wu likulu li-u. Mu 2016, aliwa kootamela wu Likulu la Maphuzilo la Watchtower wu Patterson, wewo katumikela m’Dipatimenti Yojambula Mavidiyo na Vyongo Vyokeda Vuruwana. Vangavirile chaka 4 aliwa koowelela wu Warwick wewo M’bali Winder aambeele liye tumikela mu Ofesi ya Mukomiti Yoona vya Atumiki a va Beteli. Mu Marichi 2022, oo-eliwa kala otandiza Mukomiti Yoona vya Atumiki a va Beteli ya Bungwe Lolamulela.

Ti pempelo li-u ira Yehova apitilize dalisa “phaso da alombwana” dedi vevo kanapitilizaathu inda mwatindi chito da Umwene. — Aife. 4:8.