PA CHITATU pa 18 Janiwale 2023 pa jw.org, pakaba ichakufumusya ichapalubazu cho chikanena ukuti, Umukamu u Gage Fleegle nu Jeffrey Winder basaliwa ukuti babombelaghe mu Kagulu Akakwenelezya aka Bakaboni ba Yehova. Abakamu babili aba bosi bamubombela u Yehova ukwakabalilo akatali umwabusubaliwa.

Umukamu u Fleegle akakulila cha kubwingililo bwizuba ukwa Pennsylvania, U.S.A., sona akamanyila ubwanaloli ukufuma ku bapapi bache. Pa kabalilo ko akaba munyamata, imbumba yabo yikasamila ku chigaba chimo icha mukaya ko kukalondiwanga abalumbilili abinji. Pakati pendapo akabalilo akanandi bulo akoziwa pa 20 Novembala 1988.

Abapapi aba mukamu u Fleegle akabalilo kosi bakamulimbikisyanga ukuti ize amubombele u Yehova ubumi bwache bosi. Akabalilo akinji kunyumba kwabo bakabapokelelagha abakwendela idela na bo bakubombela pa Beteli umwakuti Umukamu u Fleegle akennyanga mo abakamu na bayemba aba bakahobokelagha. Patakenda akabalilo akatali ukufuma po akoziwa, akanda ubupayiniya ubwakabalilo kosi pa 1 Seputembala 1989. Pakati pendapo imyaka yibili, akakwanilisya ichakwibikila cho akibikila po akaba ni myaka 12, ichakuti ize abombele pa Beteli. Akanda ukubombela pa Beteli iya ku Brooklyn mu Okutobala 1991.

Pa Beteli, Umukamu u Fleegle akabombelagha ku dipatimenti iya Kupulinta amabuku ukwa myaka 8, pisinda pache bakamusintila ku Dipatimenti Iyakwenelezya Imbombo Iyabulumbilili. Pa kabalilo kala akabunganagha ni chipanga icha chinenelo icha ku Russia ukwa myaka iyinandi bulo. Mu 2006 bakasendana nu Nadia, yo wepe akanda ukubombela pa Beteli. Babombela poka kuchigaba cho bakunena ichi Portuguese sona imyaka iyakupululila 10 babombela kuchigaba cho bakunena ichi Spanish. Akati abombelako ukwa myaka iyinji ku Dipatimenti Iyakwenelezya Imbombo Iyabulumbilili, Umukamu u Fleegle bakamusinta ukuti abombelaghe mu Ofesi iya Komiti Iyakwenelezya Imbombo Iyakumanyisya sona pisinda pache akanda pakubombela mu Komiti  Iyakwenelezya Imbombo Iyabulumbili. Mu Malichi 2022 akasaliwa ukuba mwavwilizi uwa Komiti Iyakwenelezya Imbombo Iyabulumbilili iya Kagulu Akakwenelezya.

Umukamu u Winder akakulila ku Murrieta, California, U.S.A. Akamanyila ubwanaloli ukufuma ku bapapi bache, sona akoziwa pa 29 Malichi 1986. Akati oziwa bulo, umwezi uwakukonkapo akanda ubupayiniya ubwakabalilo akanandi. Akahobokagha sana nu bupayiniya ubu umwakuti akalondagha ukuti abukilile. Akati apanga ubupayiniya ubwakabalilo akanandi ukwa myezi iyinji, pa 1 Okutobala 1986 akanda ubupayiniya ubwakabalilo kosi.

Pa kabalilo ko akaba munyamata, Umukamu Winder akabendela abakulu bache bo pa kabalilo kala bakabombelagha pa Beteli. Ivi vikapangisya ukuti abe ni chinyonywa ichakuti nanti akula ize asimbe ifomu iyakulonda ukuti aye abombelaghe pa Beteli. Mu Meyi 1990, bakamwitizya ukuti aye ande pakubombela ku Beteli iya ku Wallkill.

Pa Beteli Umukamu u Winder akabombelagha mu madipatimenti aghakupambana-pambana, ngati Idipatimenti Iyakuyannya Amalo, Iyakumughunda sona ku Ofesi Iyakwenelezya Ivintu pa Beteli. Mu 1997 bakasendana nu Angela sona bakubombela poka pa Beteli ukwanda pa kabalilo kala-kala. Mu 2014 bakabasintila ku Warwick, ko Umukamu u Winder akavwanga idipatimenti iya vyakuzenga-zenga yo yili ku hedikota. Mu 2016 bakasamila ku maofesi ghitu agha ku Paterson, ko Umukamu u Winder akabombelagha ko bakujambulila amavidiyo. Pakati pendapo imyaka 4, bakanyokela sona ku Warwick, ko Umukamu Winder akanda ukubombela mu Ofesi iya Komiti iyakwenelezya bo bakubombela pa beteli. Mu Malichi 2022 bakamusala ukuti abe mwavwilizi Mukomiti iya Kwenelezya bo Bakubombela pa Beteli iya Kagulu aka Kwenelezya.

Tukwiputa ukuti u Yehova abukilile ukubasaya abanavuli aba, bo ‘vyabupi’ po bakubukilila ukubomba ivintu ivya Bumwene.—Efe. 4.8.