PACITATU pa 18 January , 2023, pa jw.org pakabikwa cakoolobesha cilibetele cakalinga kwaamba ayi Mukwesu Gage Fleegle a Mukwesu Jeffrey Winder basalwa kusebensa mu Likoto Litanjilila lya Bakamboni Bakwe Yehova. Bamakwesu boonse bobilo aba basebensela Yehova cakushomeka kwamyaaka iinji.

Mukwesu Fleegle wakakulila kulubasu lwakumbo ku Pennsylvania, mu U.S.A., alimwi wakeeya cancine kuswa ku bashali bakwe. Ndyakalinga cikula bwangu, bamumukwashi wakwe bakalongela mukatauni kaniini kakumushi umo mwakalinga kuyandika beshikushimikila baanji. Ndyepakeendabo ciindi ciniini kuswa ndyebakalonga, pa 20 November, 1988 mukwesu uyu wakabombekwa.

Bashali ba Mukwesu Fleegle lyoonse bakalinga kumuyuminisha kusebensa muncito yaciindi coonse. Liinji bakalinga kwiitako bamatanjilili balubasu abaabo basebensela pa Bethel kusa mukubafwakashila kumishaabo alimwi Mukwesu Fleegle wakalinga kubona bamakwesu abenankashi aba mbobakalinga kusangalete. Ndyepakeendabo ciindi ciniini kuswa ndyaakabombekwa, wakatalika bupainiya bwaciindi coonse pa 1 September, 1989. Ndipakeenda myaaka yobilo, wakakumanisha ncaakasalawo kucita ndyaakalinga kucite myaaka 12—nkokwaamba ayi kusebensela pa Bethel. Mu October 1991, wakatalika kusebensela pa Bethel yaku Brooklyn.

Mukwesu Fleegle ndyaakatalikabo kusebensela pa Bethel, kwamyaaka 8 wakasebensela nkobabika makava ku mabuku, lyalo pesule wakapekwa ncito yakusebensa mu Dipatimenti Yancito. Paciindi ici, kwamyaaka iniini wakalinga kubungana mulibungano lyakalinga kusebensesha mushobo wa ciRussian. Mu 2006 wakeeba ba Nadia, alimwi abalo bakatalika kusebensela pa Bethel. Ndyebakeebana bakatalika kubungana mulibungano lya ciPortuguese lyalo kwamyaaka iindilila 10 bakalinga kubungana mulibungano lya ciSpanish. Pesule lyakusebensa mu Dipatimenti Yancito kwamyaaka iinji, Mukwesu Fleegle wakapekwa ncito yakusebensa mu Ofesi ya Komiti Yakwiisha lyalo pesule wakatalika kusebensa mu Ofesi ya Komiti Yancito. Mu March 2022,  wakasalwa kusebensa mbuli shikucafwilisha mu Komiti Yancito ya Likoto Litanjilila.

Mukwesu Winder wakakulila kumusena wiitwa ayi Murrieta, ku California, mu U.S.A. Wakeeya cancine kuswa kubashali bakwe alimwi wakabombekwa pa 29 March , 1986. Mweenshi wakakonkelaawo, wakasalawo kutalika bupainiya bwakucafwilisha. Wakasangalala abuumbi kusebensako bupainiya bwakucafwilisha cakwaamba ayi wakalinga kusuni kutolelela. Pesule lyakusebensa bupainiya bwakucafwilisha kwamyeenshi iinji, pa 1 October, 1986 wakatalika bupainiya bwaciindi coonse.

Ndyaakalinga cikula bwangu, Mukwesu Winder wakalinga kufwakashila bamanene bakwe basankwa bobilo abo bakalinga kusebensela pa Bethel. Kufwakasha uko kwakamupa kusunishisha kulemba foomu yakuya mukusebensela pa Bethel ndyaakakomena. Alimwi mu May 1990, bakamwiita kutalika kusebensela pa Bethel ku Wallkill.

Mukwesu Winder ndyaakatalika kusebensela pa Bethel, wakasebensa mu madipatimenti apusenepusene mbuli Dipatimenti Ilanga Pamakani Akubotesha, Dipatimenti Ilanga Pashakulima alimwi akusebensela mu Ofesi Ilanga Pabaabo Basebensela pa Bethel. Mu 1997 wakeeba ba Angela, alimwi batolelela kusebensela pa Bethel kushika apacecino ciindi. Mu 2014 bakalongela ku Warwick, uko Mukwesu Winder nkwaakaya mukucafwilisha muncito yakuyaka maofesi esu anene. Mu 2016 bakalongela ku Watchtower Educational Center ku Patterson, uko Mukwesu Winder nkwaakatalika kusebensa mu Dipatimenti Ipanga Mavidyo. Ndipakeenda myaaka ili 4, bakaboolela alimwi ku Warwick, lyalo Mukwesu Winder wakapekwa ncito yakusebensa mu Ofesi ya Komiti Ilanga Pabasebenshi. Mu March 2022, wakasalwa kusebensa mbuli shikucafwilisha mu Komiti Ilanga Pabasebenshi ya Likoto Litanjilila.

Tutopaila kwaamba ayi Yehova abape shoolwe bamakwesu aba bali ‘nshipo mubantu’ ndyebatotolelela kusebensa cankusu kutola sha Bwaami panembo.—Efe. 4:8.