CHITATU 18 wa Janeiro wa 2023, va jw.org vatoo-eliwa milanyu yavakundo yoonga ira Bali Gage Fleegle na Bali Joffrey Winder tato-eliwa kala a Gulu Lotonga la Mboni dha Yohova. Abali ambinlene enala tatom’labela Yohova mororomeleya wa hora indendai.

Bali Fleegle uulukulele mubanja la Mboni dha Yohova, mavirelo a dhuwa wa sidadi la Pensilvania wu Estados Unidos ya America. Angali zombwe, anamabalee tatoothamela musidadi n’nango ling’ono weo wafiya anamalaleya anjinji. Va-anavire hora indendai, atoobadiziwa va 20 wa Novembro wa 1988.

Anamabala a balula, hora dhothene tanom’limbi-a ira adhalabe urumiwi wahora dhothene. Anamabalee tanoodhiveliwana maningi wachela anamaing’anela isa na arumiwi ava Beteli, thitho bali Fleegle anooda ona mwemo abali naarongolala mwasangalalela aliwa. Va-anavire hora indendai angabadiziwile, atookala painiya okaatheya va 1 wa Setembro wa 1989. Vangavirile vyawa 2, atokwakwaneli-edha ifunelo yadhi-elele liye angana vyawa 12, yoi adhalabe va Beteli. Atooroma laba va Beteli yau Brooklyn va Novembro wa 1991.

Angali Beteli, Bali Fleegle atoolaba mudepartamento yodinda mabukhu wa vyawa 8 adhamale vevo atooroma laba mudepartamento ya urumiwi. Va hora yeniyo atumikela mupingo wa iongelo ya Irasha wa vyawa vingasi. 2006, atom’thela Nadia na liyene thitho Nadia atooroma laba va Beteli. Aliwa tatoolaba vambo-i na i-yanee muisa ya iongelo ya Izungu thitho muisa ya iongelo ya Espanhol. Tangalabile wa vyawa vinjinji mudepartamento ya urumiwi, Bali Fleegle atootumiziwa dhowa malaba muskritoriyo ya komisau yau urumiwi. Março wa 2022 atoo-eliwa kala okami-a mu komisau ya urumiwi ya Gulu Lotonga.

 Bali Winder uulukulele wu Murrieta musidadi ya Califonia wu Estados Unidos ya America. Aliwa tafunji-iwile imbarimbari na anamabaliwa, abadiziwile va 29 wa Maço wa 1986. Mwedi o-arela atooroma upainiya okami-a. Atoosangalala maningi na urumiula thitho atoothuulela vyodhowanave laba urumiula. Atooira upainiya okami-a wa myedi mingasi voi aromile upainiya okaatheya va 1 wa Outubro wa 1986.

Angali zombwe, Bali Winder atoodhowa maona abalee ambili enao talaba va Beteli. Ulendula watoiri-a ira balula afunechechenga maningi dhowa malaba va Beteli adhaukula. Maio wa 1990, atoitaniwa ira amalabenga va Beteli yau Wallkill.

Angali Beteli, Bali Winder atoolaba mumadepartamento o-iyana i-yana thangani-avo departamento yosamalela va Beteli, deparamento yoing’anela mabasa aminda na Skritoriyo yosamalela banja lava Beteli. Yawa ya 1997, atom’thela Angela thitho takadhi talabanga vambo-i va Beteli romela hora yeniyo. Yawa ya 2014, tatoothamela wu Worwicki. Weo bali Winder atookami-a va basa yomanga maskritoriyo asede li-u lavailambo yothene yavathi. Yawa ya 2016, tatoothamela wu sede la mafunjedho a Nsanja ya Namaing’anela wu Patterson, weo talaba mudepartamento yokumi-a mavidiyo na vyongo vyovuruwana. Vangavirile vyawa 4 tatoowelela okoka wu Worwicki. Weo Bali Winder atooroma laba muskristoriyo ya komisau yoona vya arumiwi ava Beteli. Março wa 2022, atoo-eliwa kala wokami-a mukomisau yoona vya arumiwi ava Beteli ya Gulu Lotonga.

Ndi lobelo li-u loi Yohova adhowenave raeli-a “yotuva ya alombwana” ninga yen’na vevo vanodhowanave aliwa laba mwathindhi mabasa Aumwene.—Aef. 4:8.