ສະມາຊິກໃໝ່ 2 ຄົນຂອງຄະນະກຳມະການປົກຄອງ
ໃນວັນພຸດທີ 18 ມັງກອນ 2023 ມີຄຳປະກາດໃນເວັບໄຊ jw.org ວ່າ ພີ່ນ້ອງເກກ ຟລີເກີ້ກັບພີ່ນ້ອງເຈບຟຣີ ວິນເດີ້ໄດ້ຖືກແຕ່ງຕັ້ງໃຫ້ເປັນສະມາຊິກຂອງຄະນະກຳມະການປົກຄອງຂອງພະຍານພະເຢໂຫວາ. ພີ່ນ້ອງທັງສອງຄົນຮັບໃຊ້ພະເຢໂຫວາຢ່າງສັດຊື່ມາຫຼາຍປີ.
ເກກ ຟລີເກີ້ກັບນາເດຍເມຍຂອງລາວ
ພໍ່ແມ່ຂອງພີ່ນ້ອງເກກເປັນພະຍານພະເຢໂຫວາ. ເຂົາເຈົ້າຢູ່ທາງທິດຕາເວັນຕົກຂອງລັດເພັນຊິນເວເນຍ ສະຫະລັດອາເມຣິກາ. ຕອນທີ່ພີ່ນ້ອງເກກເປັນໄວລຸ້ນ ຄອບຄົວຂອງລາວຍ້າຍໄປຢູ່ເມືອງນ້ອຍໆທີ່ຢູ່ນອກເມືອງທີ່ຕ້ອງການຜູ້ປະກາດຫຼາຍກວ່າ. ຫຼັງຈາກນັ້ນບໍ່ດົນ ລາວກໍຮັບບັບເຕມາໃນວັນທີ 20 ພະຈິກ 1988.
ພໍ່ແມ່ຂອງພີ່ນ້ອງເກກສະໜັບສະໜູນລາວໃຫ້ຮັບໃຊ້ເຕັມເວລາ. ເຂົາເຈົ້າມັກຊວນຜູ້ເບິ່ງແຍງໝວດແລະພີ່ນ້ອງທີ່ຮັບໃຊ້ຢູ່ເບເທນມາເຮືອນ. ພີ່ນ້ອງເກກເຫັນວ່າພີ່ນ້ອງເຫຼົ່ານັ້ນມີຄວາມສຸກຫຼາຍໃນວຽກຮັບໃຊ້ຂອງເຂົາເຈົ້າ. ຫຼັງຈາກທີ່ພີ່ນ້ອງເກກຮັບບັບເຕມາໄດ້ບໍ່ດົນ ລາວກໍເລີ່ມເປັນໄພໂອເນຍປະຈຳໃນວັນທີ 1 ກັນຍາ 1989. ສອງປີຕໍ່ມາ ລາວກໍເຮັດຕາມເປົ້າໝາຍທີ່ຕັ້ງໄວ້ຕອນອາຍຸ 12 ປີໄດ້ສຳເລັດ ນັ້ນແມ່ນໄປຮັບໃຊ້ຢູ່ເບເທນ. ລາວເລີ່ມຮັບໃຊ້ຢູ່ເບເທນບຣຸກລິນໃນເດືອນຕຸລາ 1991.
ພີ່ນ້ອງເກກເຮັດວຽກຢູ່ພະແນກເຂົ້າເຫຼັ້ມປຶ້ມຢູ່ເບເທນ 8 ປີ. ຫຼັງຈາກນັ້ນ ລາວຖືກມອບໝາຍໃຫ້ໄປຢູ່ພະແນກການຮັບໃຊ້. ຕອນນັ້ນລາວຮັບໃຊ້ຢູ່ປະຊາຄົມທີ່ໃຊ້ພາສາຣັດເຊຍສອງສາມປີ. ໃນປີ 2006 ລາວແຕ່ງດອງກັບພີ່ນ້ອງນາເດຍແລະຮັບໃຊ້ຢູ່ເບເທນນຳກັນ. ເຂົາເຈົ້າຮັບໃຊ້ຢູ່ປະຊາຄົມທີ່ໃຊ້ພາສາປອກຕຸຍການ. ຈາກນັ້ນ ເຂົາເຈົ້າກໍໄປຮັບໃຊ້ກັບປະຊາຄົມທີ່ໃຊ້ພາສາແອັດສະປາຍຫຼາຍກວ່າ 10 ປີ. ຫຼັງຈາກທີ່ເຮັດວຽກຢູ່ພະແນກການຮັບໃຊ້ຫຼາຍປີ ພີ່ນ້ອງເກກໄດ້ຖືກມອບໝາຍໃຫ້ໄປເຮັດວຽກຢູ່ສຳນັກງານຂອງຄະນະກຳມະການຝ່າຍການສອນ ແລະຕໍ່ມາລາວກໍໄປເຮັດວຽກຢູ່ສຳນັກງານຂອງຄະນະກຳມະການຝ່າຍການຮັບໃຊ້. ໃນເດືອນມີນາ 2022 ລາວຖືກແຕ່ງຕັ້ງໃຫ້ເປັນຜູ້ຊ່ວຍຄະນະກຳມະການຝ່າຍການຮັບໃຊ້ຂອງຄະນະກຳມະການປົກຄອງ.
ເຈບຟຣີ ວິນເດີ້ກັບແອງເຈລ້າເມຍຂອງລາວ
ພີ່ນ້ອງເຈບຟຣີເກີດຢູ່ເມືອງເມີຣີເອຕ້າ ລັດຄາລິຟໍເນຍ ສະຫະລັດອາເມຣິກາ. ພໍ່ແມ່ຂອງລາວເປັນພະຍານພະເຢໂຫວາ. ລາວຮັບບັບເຕມາໃນວັນທີ 29 ມີນາ 1986 ແລະເດືອນຕໍ່ມາລາວໄດ້ເປັນໄພໂອເນຍສົມທົບ. ລາວມັກວຽກນີ້ຫຼາຍແລະຢາກເຮັດຕໍ່ໄປເລື້ອຍໆ. ຫຼັງຈາກເປັນໄພໂອເນຍສົມທົບໄດ້ຫຼາຍເດືອນ ລາວກໍເປັນໄພໂອເນຍປະຈຳໃນວັນທີ 1 ຕຸລາ 1986.
ຕອນທີ່ເປັນໄວລຸ້ນ ພີ່ນ້ອງເຈບຟຣີໄດ້ໄປຢາມອ້າຍຂອງລາວ 2 ຄົນທີ່ເຮັດວຽກຢູ່ເບເທນ. ການໄປຢາມພວກອ້າຍເທື່ອນັ້ນເຮັດໃຫ້ລາວຢາກສະໝັກເຂົ້າເບເທນເມື່ອໃຫຍ່ຂຶ້ນ. ໃນເດືອນພຶດສະພາ 1990 ລາວຖືກເຊີນໃຫ້ໄປຮັບໃຊ້ຢູ່ເບເທນວໍຄິວ.
ພີ່ນ້ອງເຈບຟຣີເຮັດວຽກຫຼາຍພະແນກໃນເບເທນ ເຊັ່ນ: ພະແນກອະນາໄມ ເຮັດວຽກຢູ່ຟາມ ແລະສຳນັກງານເບເທນ. ລາວແຕ່ງດອງກັບພີ່ນ້ອງແອງເຈລ້າໃນປີ 1997 ແລະເຂົາເຈົ້າກໍເຮັດວຽກຢູ່ເບເທນນຳກັນຕັ້ງແຕ່ນັ້ນມາ. ໃນປີ 2014 ເຂົາເຈົ້າຖືກຍ້າຍໄປວໍວິກຍ້ອນພີ່ນ້ອງເຈບຟຣີຕ້ອງໄປຊ່ວຍໂຄງການກໍ່ສ້າງສຳນັກງານໃຫຍ່. ໃນປີ 2016 ເຂົາເຈົ້າຖືກຍ້າຍໄປສູນການສຶກສາວັອດສ໌ທາວເວີ້ຢູ່ແພັດເທີສັນ ແລະພີ່ນ້ອງເຈບຟຣີກໍເຮັດວຽກໃນພະແນກບໍລິການພາບແລະສຽງ. ສີ່ປີຕໍ່ມາ ເຂົາເຈົ້າຖືກຍ້າຍກັບໄປວໍວິກ ແລະພີ່ນ້ອງເຈບຟຣີໄດ້ຮັບມອບໝາຍໃຫ້ເຮັດວຽກຢູ່ສຳນັກງານຂອງຄະນະກຳມະການຝ່າຍບຸກຄົນ. ໃນເດືອນມີນາ 2022 ລາວຖືກແຕ່ງຕັ້ງໃຫ້ເປັນຜູ້ຊ່ວຍຄະນະກຳມະການຝ່າຍບຸກຄົນຂອງຄະນະກຳມະການປົກຄອງ.
ພວກເຮົາອະທິດຖານຂໍໃຫ້ພະເຢໂຫວາອວຍພອນພີ່ນ້ອງທັງສອງຄົນ. ເຂົາເຈົ້າເປັນ “ຂອງຂວັນທີ່ເປັນມະນຸດ” ແລະເຮັດວຽກໜັກຫຼາຍເພື່ອການປົກຄອງຂອງພະເຈົ້າ.—ອຟຊ. 4:8
