HACHISATU, January 18, 2023, ha jw.org atudikilihu yakubidika yadimena, yashimwini nawu aManakwetu aGage Fleegle nawaJeffrey Winder anayitondi kwikala mamembala aMwizanvu Dalombolaña dawaYinsahu jaYehova. Awa amanakwetu ayedi anamukalakeli Yehova nakashinshi hadi yaaka yayivulu.

Manakwetu Fleegle wakulilili kukabeta kamujika waPennsylvania, U.S.A., nawa amudizishili chalala kudi anvwali jindi. Hadiñayi kampululu, chisaka chawu chabuukilili kutawuni yanyanya kwadiña kukaankila kwawakakushimwina. Hashimbwili wanyi, wapapatisheweli haNovember 20, 1988.

Anvwali jaManakwetu Fleegle amukolesheleña mpinji yejima nawu akeñili mumudimu wampinji yejima. Kakavulu atambwilileña ankoñi añinza niakaBeteli hetala dawu, nawa Manakwetu Fleegle wamweneña muzañalu wadiña nanawa amanakwetu niahela. Hashimbwili wanyi kufuma hapapatisheweliyi, watachikili wupayiniya wampinji yejima haSeptember 1, 1989. Chimwahitili yaaka yiyedi, washikijili chikonkwanyi chemikiliyi hadiñayi nayaaka 12, chikonkwanyi chakuzatila haBeteli. Watachikili kuzatila haBeteli yamuBrooklyn muOctober 1991.

Hampinji yadiñayi haBeteli, Manakwetu Fleegle wazatilili kuDipatimenti Yalamikaña nyikanda hadi yaaka 8, kuhiñahu watachikili kuzatila kuDipatimenti yaMudimu. Hayina mpinji, wadiña nakukalakela muchipompelu mwazatishileñawu idimi daRussia hadi yaaka yantesha. Mu 2006 wasumbwili muhela Nadia, nawa watachikili kukalakela hamu nindi haBeteli. Anakalakeli hamu mwiluña mwahoshañawu idimi daPortuguese nawa hadi yaaka kubadika ha 10 anakalakeli mwiluña mwahoshañawu idimi daSpanish. Hanyima yakuzatila yaaka yayivulu muDipatimenti yaMudimu, Manakwetu Fleegle amwinkeli mudimu wakuzatila muKasanji kaKometi Yadizishaña nawa  nkumininaku, muKasanji kaKometi yaMudimu. MuMarch 2022 amutondeli kwikala nkwashi yaKometi yaMudimu Yezanvu Dalombolaña.

Manakwetu Winder wakulilili muMurrieta, California, U.S.A. Amudizishili chalala kudi anvwali jindi nawa wapapatisheweli haMarch 29, 1986. Kakweji kahiñilihu, wafuukwilihu kutachika wupayiniya wakukwasha. Wadiluñishileña nankashi muniwu mudimu chakwila wakeñeleña kutwalekahu kuwuzata. Hanyima yakuzata wupayiniya wakukwasha hadi tukweji twatuvulu, watachikili wupayiniya wampinji yejima haOctober 1, 1986.

Hadiñayi kampululu, Manakwetu Winder wayileña nakuhempula amanakwindi ayedi azatilileña haBeteli hayina mpinji. Akuna kuhempula dikwamusañumwini kwikala nampwila yakusoneka fomu yakwihwilahu kuya nakuzatila haBeteli neyi nakuli. Nawa muMay 1990, amutambikili kuya nakuzatila haBeteli yamuWallkill.

HaBeteli, Manakwetu Winder wazatilili kumadipatimenti ashiyashana, kushilahu Dipatimenti Yawunyonji, Dipatimenti Yatalaña haWundimi niDipatimenti yaKasanji kaBeteli. Wasumbwili muhela Angela, mu 1997, nawa kufuma hayina mpinji anatwalekihu kukalakela hamu haBeteli. Mu 2014 ayili nakuzatila kuWarwick, kwakwashiliyi Manakwetu Winder mudimu wakutuña kasanji keneni kamukaayi. Mu 2016 abuukilili kuWatchtower Educational Center kuPatterson, kwazatilileñayi Manakwetu Winder kuDipatimenti Yakwataña Mazu nimaVidiyo. Chimwahitili yaaka yiwana, afuntili kuWarwick, nawa Manakwetu Winder amwinkeli mudimu wakuzatila muKasanji kaKometi Yatalaña akaBeteli. MuMarch 2022 amutondeli kwikala nkwashi yaKometi Yatalaña akaBeteli Yezanvu Dalombolaña.

Tunakulomba netu Yehova akiswili chikupu “amayala [ekala] yawaana” chinatwalekihu kuzata nañovu mumudimu waWanta.—Efwe. 4:8.