CHIENG’ Tich Adek, Januar 18, higa 2023, ne nitie lendo moro makende e jw.org ma ne wacho ni oket Owadwa Gage Fleegle kod Jeffrey Winder mondo obed e Bura Matayo Joneno mag Jehova. Owetego osetiyo ne Jehova kuom higni mang’eny.

Owadwa Fleegle nopon Pennsylvania, e piny Amerka, kendo jonyuolne e ma nopuonje adiera. Ka ne en rawera, joodgi nodar modhi odak e gweng’ moro man mabor gi taon kuma jolendo ne dwaroree moloyo. Mapiyo bang’ mano, nobatise Novemba 20, 1988.

Jonyuolne ne jajiwega mondo oti ne Nyasaye kuom thuolone duto. Ne gijorwako jorit-alwora kod owete gi nyimine ma ne tiyo e Bethel, kendo Owadwa Fleegle ne nyaloga neno kaka owete gi nyiminego ne mor gadier. Bang’ kinde moko ka nosebatise, nobedo painia mapile e dwe mar Septemba 1, higa 1989. Higni ariyo bang’e, nochopo gombo moro ma nosebedo ka en-go chakre ka ne en jahigni 12, ma en tiyo e Bethel. Noluonge Bethel man Brooklyn kendo nochako tiyo kuno e dwe mar Oktoba, higa 1991.

Ka ne en Bethel, Owadwa Fleegle notiyo kama ne iriwoe buge (Bindery) kuom higni aboro. Bang’ mano, notere e Migawo Mochung’ ne Tij Lendo. Kindego, nobedo e kanyakla miwachoe dho Russia kuom higni moko. E higa mar 2006 nokendo Nadia, kendo ne gidhi nyime tiyo e Bethel. Gisebedo e kanyakla miwachoe dho Portuguese, kendo sani gisebedo e kanyakla miwachoe dho Spanish kuom higni apar. Bang’ tiyo e Migawo Mochung’ ne Tij Lendo kuom higni mang’eny, Owadwa Fleegle noter e Komiti mar Puonjo, kae to bang’e e Komiti Mochung’ ne Tij Lendo. E dwe mar Mach 2022, nokete mondo obed  jakony e Komiti Mochung’ ne Tij Lendo manie bwo Bura Matayo.

Owadwa Winder to nopon e taon mar Murrieta, California, e piny Amerka. En bende jonyuolne e ma nopuonje adiera kendo nobatise Mach 29, higa 1986. E dwe ma noluwo, nobedo painia makonyo. Nomor ahinya gi migawono kendo nogombo ahinya bedo painia mapile. Bang’ bedo painia kuom dweche moko mogwaro, nobedo painia mapile e dwe mar Oktoba 1, 1986.

Ka ne Owadwa Winder rawera, nolimo owetene moko ariyo ma ne dongone, ma ne tiyo Bethel e kindego. Limbeno nomiyo ogombo mondo chieng’ moro en bende obi oti Bethel ka koro osebedo ng’ama duong’. E dwe mar Mei 1990, nogwele mondo oti e Bethel man Wallkill.

Ka ne en Bethel, ne otiyo e migepe mopogore opogore kaka Migawo mar Ler, Migawo mar Puodho, kod Ofis mar Bethel. Nokendo Angela e higa mar 1997, kendo en kaachiel gi Angela ne gidhi nyime tiyo e Bethel. E higa mar 2014 notergi Warwick, kendo Owadwa Winder nokonyo e tij gero ofiswa maduong’. E higa mar 2016, notergi Watchtower Educational Center man Patterson, kendo kuno Owadwa Winder notiyo e Migawo mar Dwol gi Vidio. Higni ang’wen bang’e, ne gidok Warwick, kendo Owadwa Winder noter e Komiti mar Jotich. E dwe mar Mach, higa 2022, nobedo jakony e Komiti mar Jotich manie bwo Bura Matayo.

Walemo mondo Jehova oguedh chwo ma gin “mich” momiyowa sama gidhi nyime timo kinda e tij Pinyruoth.—Efe. 4:8.