TOJ miércoles 18 te enero te 2023, kubʼ qʼoʼn jun tbʼanel tqanil toj jw.org. Tzaj qʼamaʼn qa xi qʼoʼn toklen ermano Gage Fleegle ex Jeffrey Winder toj Kʼloj Xjal Qʼil Twitz Aqʼuntl kye testigos de Jehová. O tzikʼ nim ambʼil in che ajbʼen ermano lu te Jehová.

Jaw chʼiy ermano Fleegle toj oeste te Pensilvania atz Estados Unidos. Xi kyqʼoʼn tman xnaqʼtzbʼil te tiʼj axix tok. Tej kuʼxun, xiʼ anqʼil toj jun tal tnam jatumel kyaj erman onbʼil toj pakbʼabʼil. Tej tikʼ chʼin ambʼil, bautisarin toj 20 te noviembre te 1988.

Kukx xi kyqʼamaʼn tman Fleegle te tuʼn tajbʼen toj tkyaqil ambʼil. In xitoq kyqʼoʼn txokbʼil kyiʼj superintendente te circuito ex qe betelita tuʼn kypon kyja. Iktzun tten ok tkeʼyin Fleegle qa in che tzalaj erman lu aj kyajbʼen te Jehová. Tej otoq tzikʼ chʼin ambʼil tbautisarin, xi tzyet tuʼn tajbʼen te precursor regular toj 1 te septiembre te 1989. Ex tej tikʼ kabʼe abʼqʼi, japun twi tmeta tuʼn tajbʼen toj Betel, otoq kubʼ t-ximen jlu tej qʼiʼntoq 12 abʼqʼi tuʼn. Xi tzyet tuʼn tajbʼen toj Betel te Brooklyn toj octubre te 1991.

Aqʼunan 8 abʼqʼi toj jun taller jatumel e bʼaj bʼinchaʼn qe uʼj ex tibʼajxi jlu, onin toj Departamento te Servicio. Toj ambʼil aju, ajbʼen toj jun congregación toj yol ruso. Ex toj 2006, kubʼ mojeʼ tukʼil Nadia ex kykabʼil in che ajbʼen toj Betel. Ax ikx, kykabʼil o che ajbʼen toj yol portugués ex mas te 10 abʼqʼi toj yol español. Tej otoq tzʼonin ermano Fleegle toj nim ambʼil toj Departamento te Servicio, xi samaʼn toj Oficina te Comité te Enseñanza ex yajxitl, toj Oficina te Comité te Servicio. Toj marzo te 2022, xi qʼoʼn toklen te onil  tiʼj Comité te Servicio te Kʼloj Xjal Qʼil Twitz Aqʼuntl.

Jaw chʼiy ermano Winder atz Murrieta, California. Testigo de Jehová qe tman, xi kyxnaqʼtzan axix tok te ex bautisarin toj 29 te marzo te 1986. Tej tikʼ jun xjaw, ok te precursor auxiliar. Tbʼanel ela te ex mintiʼ kyaj ttzaqpiʼn. Tej tikʼ junjun xjaw, ok te precursor regular toj 1 te octubre te 1986.

Tej kuʼxun ermano Winder, xiʼ visitaril kabʼe ttzik in che ajbʼen toj Betel. Onin jlu tiʼj tuʼn tkubʼ t-ximen tuʼn tkubʼ tnojsaʼn tsolicitud aj tjapun tabʼqʼi. Ex toj mayo te 1990, xi qʼoʼn txokbʼil tiʼj tuʼn tajbʼen toj Betel te Wallkill.

Tzaj qʼoʼn junxichaq toklen ermano Winder toj ambʼil aju, ik tzeʼn toj Departamento te Limpieza, toj Departamento te Hacienda ex toj Oficina te Betel. Toj 1997, kubʼ mojeʼ tukʼil Angela ex kykabʼil kukx in che ajbʼen toj Betel. Atzun toj 2014, e xiʼ atz Warwick, jatumel onin ermano Winder tuʼn tjaw bʼinchaʼn kytxuylal ninja qʼil twitz aqʼuntl. Toj 2016 e xiʼ anqʼil atz Patterson, aju Centro Educativo te Watchtower. Tej kypon atz, onin ermano Winder toj Servicio te Audio ex Video. Tej tikʼ kyaje abʼqʼi, e meltzʼaj atz Warwick ex xi qʼoʼn toklen ermano Winder toj Oficina te Comité te Personal. Ex toj marzo te 2022, xi qʼoʼn toklen te onil te Comité te Personal toj Kʼloj Xjal Qʼil Twitz Aqʼuntl.

Jun oyaj qe ermano lu tuʼn Jehová (Efes. 4:8). Kukx in qo naʼn Dios kyiʼj tuʼnju in bʼant jun tbʼanel aqʼuntl kyuʼn tuʼn kyonin tiʼj Tkawbʼil Jehová.