LYAMUCITATU, January 18, 2023, kwakele mutambi ha jw.org, uje wendekele ngwawo ndolome Gage Fleegle na ndolome Jeffrey Winder, banabangula kukala mu Cibunga ca Kutwamenena ca Bakaleho ba Yehova. Aba bandolome banapangela Yehova mu kulongwa ha myaka yaingi.

Ndolome Fleegle nakolela muyatangwa ya Pennsylvania, mu U.S.A, co bisemi bendi bakebo bamulongesele busunga. Mwapwile mwanike wa mukwenje, naanga yendi yajalukilile ku kambongi kamo kuje kwakele bujene bwakama. Munima ya simbu yaindondo lika, bamumbwitikile lya November 20, 1988.

Bisemi ba ndolome Fleegle simbu yoshe bakele na kumushongangeya kukobela mu cipangi ca simbu yoshe. Kakangi bakele na kulanya tunyungi ba kuzenguluka na bandolome ba mu naanga ya Betheu ku njibo yabo. Co ndolome Fleegle wakele na kumona kubwahelela cibakele naco aba bandolome na bandokazi. Munima ya simbu yaindondo kutunda habamumbwitikilile, washangumukile bupainiya bwa simbu yoshe lya September 1, 1989. Co munima ya myaka ibali, washulisilile cilengo calyakelele mwakele na myaka 12, ca kupangela ha Betheu. Washangumukile kupangela ha Betheu mu Brooklyn mu October 1991.

Ndolome Fleegle wapangelele ku Dipatimenti ya Kubwahesa Mabulu ha myaka 8. Kutundaho, wakapangelele ku Dipatimenti ya Bipangi. Ha simbu oyo, wakele mu cikungulukilo cije cakele na kupangesa ndaka ya Cirussia ha myaka ya kupwamo. Mu 2006, walyambatele na ndokazi Nadia, co banapangela hamo ha Betheu. Banapangela hamo mu citingitingi mubakapangesa ndaka ya Ciputukesi na kupangela hamo ha myaka ya kutubakana 10 mu citingitingi mubakapangesa ndaka ya Spanish. Munima ya kupangela ku Dipatimenti ya Bipangi ha myaka yaingi, ndolome Fleegle bamulombele kukapangela mu Ofisi ya Komiti ya Kulongesa. Kutundaho, wakapangelele mu Ofisi ya Komiti ya Bipangi. Mu March 2022, ndolome Fleegle bamwangwile kupwa mukwasi mu Komiti ya Bipangi ya Cibunga ca Kutwamenena.

 Ndolome Winder nakolela mu Murrieta, California, mu U.S.A. Bisemi bendi bakebo bamulongesele busunga, co bamumbwitikile lya March 29, 1986. Ngonde yateleko, walingile bupainiya bwa kukwasa. Walikuwile manene bupainiya bwa kukwasa, co washakele kutwalelelaho. Munima ya kulinga bupainiya bwa kukwasa ha bingonde byabingi, washangumukile bupainiya bwa simbu yoshe lya October 1, 1986.

Mwapwile mwanike wa mukwenje, ndolome Winder wendelele bandolome bendi ba kukola babali baje bakele na kupangela ha Betheu ha simbu oyo. Byuma byamwene ha Betheu byamulingisile ashake manene kukapangelaho mwakola. Co mu May 1990 bamulanyele kukapangela ha Betheu ya Wallkill.

Mwakele ha munango, ndolome Winder wapangelele mu madipatimenti a kuliseza-seza. Wapangelele ku Dipatimenti ya Kujelesa, ku Dipatimenti ya Lihya lya munga hamolika na ku Ofisi ije itala bya baka-naanga ya Betheu. Wambatele ndokazi Angela mu 1997, co banalikuu kupangela hamo Yehova. Mu 2014 babanungulwilile ku Warwick, co ndolome Winder wakwasele mu cipangi ca kutunga mitungo ku cikota ca Bakaleho ba Yehova. Mu 2016 babatwalele ku Patterson, uje wapwa mwela wakama wa masikola, co ndolome Winder wakele na kupangela ku dipamenti itala bya cilumo na mavidio. Munima ya myaka iwana, belukile ku Warwick, co ndolome Winder bamwanene cipangi ca kupangela ku Ofisi ya Komiti Itala bya Naanga ya Betheu. Mu March 2022, ndolome Winder bamwangwile kupwa mukwasi mu Komiti ya Cibunga ca Kutwamenena Itala bya Naanga ya Betheu.

Tulomba ngwetu Yehova abezikise aba ‘banalume banapu bwana’ omwo batwalelelaho kupanga na nzili mu kukundwiya bipangi bya Bumwene.—Efeso 4:8.