Gavanin Bodi Memba Matamatadia Rua
WEDNESDAY, January 18, 2023 ai hahediba hereva namona ta na jw.org ai e hedinarai. Tadikaka Gage Fleegle bona Jeffrey Winder, na hari Iehova ena Witnes edia Gavanin Bodi memba matamatadia. Unu tadikaka raruosi na Iehova vada eme hesiai henia daudau.
Gage Fleegle bona Nadia
Tadikaka Fleegle na Pennsylvania, U.S.A. ena west kahana ai, tamana sinana ida e nohova. Ia na teenager neganai, ena famili ida taoni maraḡina ta ela, unuseniai pablisa na dia momo. Se daudau November 20, 1988 ai e bapatiso.
Tadikaka Fleegle na tamana sinana ese hanaihanai e hagoadaiava fultaim hesiai ḡaukara ai baine vareai. Nega momo, edia ruma ai sekit taudia bona Betele taudia e abidia daeva, bona Tadikaka Fleegle na e itaia unu tadikaka taihu na e moaleva. September 1, 1989 ai ena regula painia ḡaukara e hamatamaia. October 1991 Brooklyn Betele ai e ḡaukara matama. Ia na laḡanina 12 neganai, e ura Betele ai baine ḡaukara, bona ena tahua ḡauna na e haḡuḡurua.
Betele ai, Tadikaka Fleegle na Bindery ai laḡani eit e ḡaukara, una murinai Service Department ai e ḡaukara. Una negai, Russia gado kongrigeisin ai laḡani haida e heduru. Laḡani 2006 ai Nadia ida e headava, bona raruosi na Betele ai e ḡaukara. Idia raruosi na Portuguese gado kongrigeisin ai e heduru, bona laḡani 10 mai kahana Spanish kongrigeisin e bamoa. Tadikaka Fleegle na laḡani momo Service Department ai e ḡaukara murinai, e siaia lao Teaching Committee Office, gabeai Service Committee Office ai e ḡaukara. March 2022 ai, e abia hidi Gavanin Bodi ena Service Committee baine durua.
Jeffrey Winder bona Angela
Tadikaka Winder na Murrieta, California, U.S.A. ai e bada. Ia tamana sinana na Witnes taudia bona ia na hereva momokani ai e tubu, bona March 29, 1986 ai e bapatiso. Murina huana ai, ia na heduru painia ḡaukarana e hamatamaia. Una na e moalelaia bada dainai hua haida lalodiai e heduru painia. Bena October 1, 1986 ai regula painia ḡaukarana e hamatamaia.
Tadikaka Winder na teenager neganai, kakana memerodia rarua, Betele ai e ḡaukarava na e vadivadidia. Una ese e hagoadaia, ia baine bada neganai Betele ai baine ḡaukara. Bena May 1990 ai, e boiria Wallkill Betele ai baine ḡaukara.
Betele ai, Tadikaka Winder e ḡaukara dipatmen idauidau na Cleaning Department, Farm Department, bona Bethel Office. Laḡani 1997 ai Angela ida e headava, bona una nega amo idia raruosi na Betele ai e ḡaukara. Laḡani 2014 ai e siaidia lao Warwick, unukahai Tadikaka Winder na world headquarters ena konstraksen ḡaukarana e durua. Bena 2016 ai e siaidia Watchtower Educational Center, Patterson ai, bona Tadikaka Winder na Audio/Video Services ai e ḡaukara. Laḡani foa muridiai ma e lou ela Warwick, unuseniai Tadikaka Winder na Personnel Committee Office ai e ḡaukara. March 2022 ai e abia hidi Gavanin Bodi ena Personnel Committee baine durua.
Iehova ese iena “herahia” amo e henida tadikakadia daidiai a ḡuriḡurimu, ia ese baine hanamodia badina iena Basileia dainai e ḡaukara goadamu.—Efe. 4:8.
