MERKREDI le 18 Zanvie 2023, ti ena enn lanons spesial lor nou sit jw.org: Frer Gage Fleegle ek Frer Jeffrey Winder inn vinn manb Komite Santral bann Temwin Zeova. Sa fer lontan ki sa de frer-la pe servi Zeova avek fidelite.

Frer Fleegle inn grandi dan lwes Pennsylvanie, dan Letazini. So bann paran inn elve li dan laverite, ek kan li ti enn adolesan, zot ti al servi dan enn ti lavil kot ti bizin plis proklamater. Inpe apre sa, le 20 Novam 1988, li ti pran batem.

So bann paran inn touletan ankouraz li pou rant dan servis aplintan. Souvan zot ti invit bann responsab sirkonskripsion ek bann Betelit kot zot, ek Gage ti trouve kouma sa bann frer-la ek sa bann ser-la ti ere. Inpe apre so batem, le 1^e Septam 1989, Gage ti vinn pionie permanan. De-z-an apre, li ti realiz enn lobzektif ki li ti ena depi laz 12 an; li ti al servi dan Betel. Li ti koumans so servis dan Betel Brooklyn an Oktob 1991.

Dan Betel, Frer Fleegle inn travay pandan wit an dan departman ki relie bann liv, ek apre sa li ti al travay dan Departman Servis. Sa lepok-la, pandan de-trwa lane li ti servi dan enn lasanble lang Ris. An 2006, li ti marye ar Nadia, ki’nn koumans servi dan Betel apre zot maryaz. Zot inn servi dan teritwar Portige, ek pandan plis ki di-z-an, zot inn servi dan teritwar Espagnol. Apre plizir lane dan Departman Servis, Frer Fleegle inn al travay dan Biro Komite pou Lansegnman, ek apre sa dan Biro Komite Servis. An Mars 2022, li’nn vinn enn asistan dan Komite Servis pou Komite Santral.

 Frer Winder inn grandi dan Murrieta, Californie, dan Letazini. So bann paran inn elve li dan laverite, ek li’nn pran batem le 29 Mars 1986. Enn mwa apre so batem, li ti desid pou fer pionie tanporer. Li ti telman kontan sa ki li ti anvi kontigne. Apre ki li ti fer pionie tanporer pandan plizir mwa, li ti vinn pionie permanan le 1^e Oktob 1986.

Kan li ti enn adolesan, Jeffrey ti al get so de frer ki ti pe servi dan Betel sa lepok-la. Li ti telman kontan seki li ti trouve, ki sa ti motiv li pou ranpli enn form Betel kan li ti vinn gran. An Me 1990, li ti gagn linvitasion pou servi dan Betel Wallkill.

Dan Betel, Frer Winder inn travay dan plizir departman, kouma dan Departman Netwayaz, Departman Laferm, ek Biro Betel. An 1997, li’nn marye ar Angela, ek zot inn kontign servi dan Betel. An 2014, zot inn al Warwick. Laba, Frer Winder ti pe ede dan konstriksion bann batiman biro mondial. An 2016, zot ti al Patterson, ek Frer Winder ti travay dan Departman Odio/Video. Kat-r-an plitar, zot ti retourn Warwick, ek Frer Winder inn koumans travay dan Biro Komite pou Personel. An Mars 2022, li’nn vinn enn asistan dan Komite pou Personel pou Komite Santral.

Nou priye ki Zeova kontign beni sa bann zom ki “kouma bann don” ek ki zot kontign travay dir pou Rwayom Bondie.—Efe. 4:8.