Pa 18 Januwale 2023 pali citatu, kwali icimanyisyo iciiyele pa jw.org, amazwi akutandikilapo yatangi umwina Gage Fleegle nu mwina Jeffrey Winder iyasontwa ukuya umwi Iumba Ilikatungulula lyakwe Ya Nte Yakwe Yeova. Aina yaa yaombela Yeova apa myaka ingi.

Umwina Fleegle wakulile uku western Pennsylvania, U.S.A., avyazi yakwe yatemilwe sana Yeova. Lino ya Fleegle yali ance ulupwa lwao lwakukile umwi tauni ilinono umwalondekwanga ya kasimikila. patalengile, pa 20 Novemba umu 1988 yabatiziwe.

Avyazi a mwina Fleegle yamukomelezyanga ukuti angaombako umulimo wa nsita yonsi. Apa ng’anda yapokelelanga Angalizi ya viputulwa alino na aomvi ya pa Betele, nupya umwina Fleegle waweni insansa zino aina na ya nkazi yakweti. Apa 1 Sepetemba 1989 yatandike upainiya wa nsita yonsi. Lino papisile imyaka ili, umwina Fleegle wafikilizye uyo ino wimike ala ali ni myaka 12, watandike ukuombela pa Betele. Watandike ukuombela pa Betele iya ku Brooklyn umu Okotoba 1991.

Umwina Fleegle waombelanga kuli dipatimenti ikapanga impapulo nupya waombileko pa myaka 8, pa cisila watandike ukuombela kuli dipatimenti ya mulimo. Pa nsita ii walonganyileko pa myaka inono umu cilongano cino yaomvyanga ulimi lwa ku Russia. Umu 2006 ya Fleegle yatwaline na ya Nadia, nupya nayo kwene yatandike ukuombela pa Betele. Yaombiilepo uku ncende kuno yakalanda ici Portuguese lyene pa cisila izile yaombela uku ncende kuno yalandanga ici Spanish pa myaka 10. Pa cisila ca kuomba imyaka ingi muli dipatimenti ya mulimo umwina Fleegle watandike ukuomba muli Komiti wa Kusambilizya nupya wizile aombela na muli Komiti wa Mulimo. Mu 2022 umu Maaci umwina Fleegle izile iyamusonta ukuya kaazwa wa muli komiti wa mulimo uwa mwi Iumba Ilikatungulula.

 Umwina Winder wakulile uku Murrieta, umu California, U.S.A. Avyazi yakwe aamusambilizye icumi nupya apa 29 Maaci umu 1986 wabatiziwe. Umu mwezi uwakonsilepo wasoolwilepo ukutandika upainiya wa nsita inono. Waipakizyanga sana icakuti wasoolwilepo ukutwalilila. Pa cisila ca kuomba upainiya wa nsita inono izile yasoololapo ukutandika ukuomba upainiya wa nsita yonsi pa 1 Okotoba umu 1986.

Ya Winder lino yali ance yaile umu kutandalila ya isilenzi yaili aombelanga pa Betele pa nsita iya. Ukutandala kuu kwalenzile yalondesya ukuombela pa Betele. Nupya mu 1990 umu Mei, yayamile uku Betele ya ku Wallkill.

Umwina Winder waombelapo uku ma dipatimenti apusane pusane, wakwe kuli dipatimenti yakuzifya, dipatimenti ikalolekasya uku vilimwa vya pa Betele, pa cisila wizile atandika ukuomba umulimo wa mu ofesi. Umu 1997 izile yatwalana na ya Angela, nupya ukutandika lili kwene yakaombela pamwi apa Betele. Lyene umu 2014 izile yatandika ukuombela uku Warwick, nupya umwina Winder watandike ukuombako umulimo wa kukula maofesi yakalamba mu nsi yonsi. Umu 2016 yaile uku Maofesi Yakalamba ukukayela Masukulu ya Uleza uku Patterson, umwina Winder watandike ukuomba umulimo wa kukopa Mavidyo na Mazwi. Lino papisile imyaka 4 yaswilile uku Warwick, nupya umwina Winder watandike ukuombela muli Komiti Ikasakamala Aomvi ya pa Betele. Mu 2022 umu Maaci ya yasonsile ukuya ya kaazwa muli Komiti Ikasakamala Aomvi ya pa Betele iya mwi Iumba Ilikatungulula.

Tukapepa kuli Yeova ukuti atwalilile ukupaala aonsi yaa yano wapeela “ivya upe” Lino yakutwalilila ukutungilila Uwene Wakwe Leza.—Efes. 4:8.