ВӰРГЕЧЫН, 2023 ийын, 18 январьыште jw.org сайтыште ойыртемалтше увертарымаш лектын. Тушто ойлалтын: Гейдж Флигл ден Джеффри Уиндер иза-влак Иегован Таныкше-влакын Вуйлатыше советыштышт служитлаш шогалтыме лийыныт. Тиде кок иза уже шуко ий Иеговалан ӱшанлын служитла.

Флигл иза Ушымо Американ Штат-влакыште Пенсильваний штатын касвел могырыштыжо Иегован Таныкше-влакын ешыштышт кушкын. Кунам тудо подросток лийын, тудын ешыже изи олашке илаш куснен, кушто уверзе-влак ситен огытыл. Тидын деч вара 1988 ийын 20 ноябрьыште тудо тынеш пурен.

Флигл изан ача-аваже тудым кечыгут служитлыше лияш эре таратеныт. Нунын дек чӱчкыдын районым эскерыше иза-влак да Вефильыште служышо-влак унала толыныт. Гейдж ужын, нине иза-ака-влак мыняр чот пиалан улыт. Тынеш пурымыж деч вара ик ият эртен огыл, 1989 ийын, 1 сентябрьыште тудо эрелык пионер семын служитлаш тӱҥалын. Тидын деч вара кок ий эртымеке, 1991 ийын октябрьыште тудо Бруклинысе Вефильыште служитлаш тӱҥалын. Тыгай цельым тудо 12 ияш лиймыж годымак шынден.

Вефильыште Флигл иза 8 ий комлышо цехыште пашам ыштен, тидын деч вара служебный пӧлкаште служитлаш тӱҥалын. Тунам тудо икмыняр ий руш погынымаште служитлен. 2006 ийыште тудо Надя лӱман акам марлан налын, да нуно пырля Вефильыште служитлаш тӱҥалыныт. Нуно португал погынымаште служитленыт, а варажым — 10 ий утла испан погынымаште. Шуко ий служебный пӧлкаште служитлымеке, Флигл иза у назначенийым налын — Туныктымаш комитетын бюрошто служитлаш. А варажым тудо Служебный комитетын бюрошто служитлен. 2022 ийын мартыште тудым Вуйлатыше советын Служебный комитетын полышкалышыжлан шогалтеныт.

 Уиндер иза Маррие́та олаште кушкын (Калифорний штат, США). Ача-аваже Иегован Таныкше лийыныт. Джеффри 1986 ийын 29 мартыште тынеш пурен. Тынеш пурымо деч вара вес тылзын тудо полышкалыше пионер семын служитлаш тӱҥалын. Тиде служитлымаш тудлан чотак келшен, сандене тудо тыге умбакыжат служитлынеже ыле. Икмыняр тылзе эртымеке, 1986 ийын 1 октябрьыште тудо эрелык пионерлан служитлаш тӱҥалын.

Подросток лиймыж годым Джеффри Вефильыште служышо кок изаж дек унала миен. Тидын деч вара тудын Вефильыште служитлаш кумылжо лектын. Сандене тудо шонен пыштен: кугурак лиймеке, заявленийым воза. 1990 ийын майыште тудым Уолкиллысе Вефильыш ӱжыныт.

Тушто Уиндер иза эрыктымаш пӧлкаште, фермыште да Вефильын бюроштыжо пашам ыштен. 1997 ийыште тудо А́нджела лӱман акам марлан налын, да нуно пырля Вефильыште служитлаш тӱҥалыныт. 2014 ийыште нуным Уорвикыш кусареныт, кушто Уиндер иза тӱнямбалысе тӱҥ виктемын зданийжым чоҥымаште полшен. 2016 ийыште нуным Паттерсоныш Орол башньын Тунемме центрыш колтеныт, кушто Уиндер иза аудио ден видеом возышо пӧлкаште тыршен. Ныл ий эртымеке, нуно Уорвикыш пӧртылыныт, да Уиндер иза Кадровый комитетын бюроштыжо служитлаш тӱҥалын. 2022 ийын мартыште тудым Вуйлатыше советын Кадровый комитетын полышкалышыжлан шогалтеныт.

Ме Иеговалан кугу таум ойлена, вет нуно тудын деч пӧлек семын улыт да тудын Кугыжанышыже верч чот тыршат (Еф. 4:8). Юмо нуным чот суапландарыже манын, ме кумалына!