TXITHATHU, 18 a Janeiro a 2023, ovuhuwihiwa muselu wavayeka mu jw.org wawoga wi ddibila Gage Fleegle ni Jeffrey Winder ehithomiwa wihiha ekale epaddi ya Nikuru Nolamulela na Anamoona a Yehova. Addibila ala abiili enna omulabela Yehova muwari mwa yaka dhowinjhivadhene nuroromeleya.

Ddibila Fleegle aleliwe epaddi yomayelo nduwa ya elabo yo Pensilvaniya, Wistadu Unidu ni makolo aye yaali Anamoona a Yehova. Mudhidhi agaali muzombwe, amudhaaye otamela luwani eng’ono yotheba wahoweleya anamalaleya. Nuuvira mudhidhi vang’ono oliye obaddiziwa nlabo na 20 a Novembro a 1988.

Makolo a ddibila Fleegle yomukongomedha wavolowela mabasa a mudhidhi wamutene. Malabo owinjhiva aliwa yowawakela vaade vewa anameeddela mulogo ni a betelita. Ddibila Fleegle owanda woona makalelo addibila ni arogola ala yaaliwa oohagalalene. Mudhidhi vang’ono numala obaddiziwa, oliye obajha olaba ninga piyonero a mudhidhi wamutene, nlabo noobajha na mweri wa Setembro a 1989. Nuuvira yaka biili oliye wakwanihedha yoluba anniyena aganna yaka 12, yolaba oBeteli. Vano mweri wa Outubro yaka ya 1991 oliye obajha olaba Beteli yoBrooklyn.

Nufiya oBeteli, ddibila Fleegle olaba epaddi ya Encadernação muwari mwa yaka 8, numala othomiwa wihina alabe Departamentu ya Mabasa. Mudhidhi yole ookavihera mulogo wa ewogelo yoRusiya. Yaka ya 2006, otelana ni Nadia. Nadia orumedhiwa wihina alabege oBeteli. Vano aabiilene ehikavihera mulogo dha ewogelo yEzugu ni ehikaviheraga mulogo dha ewogelo ya Espanyoli okwaranya yaka 10. Numala olaba muwari mwa yaka dhowinjhiva Departamentu ya Mabasa, ddibila Fleegle othomiwa wihina alabege Kambilinya ya Komisawu Yohudhiha. Vasogolova othomiwa wihina alabege Kambilinya ya Komisawu ya Mabasa. Vano mweri wa Março yaka ya 2022, oliye  othomiwa ninga namakavihera a Komisawu ya Mabasa ya Nikuru Nolamulela.

Ddibila Winder aleliwe oMurrieta, elabo yo Kaliforniya, Wistadu Unidu wa Amerika. Oliye ahudhenre ebaribari ni makolo aye ni abaddiziwe nlabo na 29 a Março a 1936. Mweri woharela oliye okala piyonero ookavihera. Oliye odhiveliwa vanlubale ofiyedha ofunaga wapara mabasa ala. Nuuvira mweri dhowinjhivadhene alabaga ninga piyonero ookavihera, oliye obajha olaba ninga piyonero a mudhidhi wamutene mweri wa Outubro a 1986.

Agaali muzombwe, ddibila Winder ahawaredhela addibile abiili apogoya yalaba oBeteli. Vano mudhidhi yoole numala wawaredhela addibile, ddibila Winder okanna efunelo yolaba oBeteli. Mweri wa Maio yaka ya 1990, oliye withaniwa wihina alabege Beteli ya Wallkill.

Nuufiya oBeteli, ddibila Winder ohulaba departamentu dhohiyanahiyana ninga motajhiha Departamentu ya mabasa ooxela, Departamentu enasamalela mabasa oomundda ni okambilinya yoBeteli. Yaka ya 1997, oliye otelana ni Angela, abiileene enalaba oBeteli ofiyedha peeno. Yaka ya 2014, aliwa otamihedhiwa oWarwick, nuufiya wewule ddibila Winder akavihera mabasa oomaga sede enlubale. Yaka ya 2016, aliwa otamela Centro Educacional da Torre de Vigia oPaterson, wego ddibila Winder aalabiliye departamentu ya Awudiyu ni Vidiyu. Nuuvira yaka nayi aliwa ohogolowela oWarwick, vano ddibila Winder othomiwa wihina alabege kambilinya ya Komisawu Yokabelela. Mweri wa Março a 2022, oliye othomiwa wihina akale namakavihera a Komisawu Yokabelela a Nikuru Nolamulela.

Iyo nnolobela wihina Yehova adhowegeve aareelihaga addibila ala eli ‘alobwana ninga gari’ ni wihina edhowegeve elabaga nuuviheya wi ekavihere Omwene. — Efe. 4:8.