KI̱VI̱ miércoles 18 tí enero ña̱ ku̱i̱ya̱ 2023, ka̱na iin anuncio ña̱ ndáyáʼviní nu̱ú jw.org ña̱ anuncio yóʼo ni̱ka̱ʼa̱nña ña̱ ta̱ hermano Gage Fleegle xíʼin ta̱ Jeffrey Winder ki̱xáʼána kúúna Cuerpo Gobernante. U̱vi̱ saá ta̱ hermano yóʼo xa̱a̱ ku̱a̱ʼání ku̱i̱ya̱ káchíñuna nu̱ú Jehová ta nda̱kúní íyo inina xíʼinra.

Ta̱ hermano Fleegle xa̱ʼnura chí oeste ña̱ Pensilvania (Estados Unidos). Na̱ yivára sa̱náʼa̱nara xa̱ʼa̱ Jehová. Tá ni̱xi̱yo loʼora nda̱kiʼinra ku̱a̱ʼa̱nra xíʼin na̱ yivára iin ñuu loʼo nu̱ú xi̱xiniñúʼukana na̱ natúʼun xa̱ʼa̱ Ndióxi̱. Tá ni̱ya̱ʼa loʼo tiempo saá nda̱kuchira 20 tí noviembre ña̱ ku̱i̱ya̱ 1988.

Na̱ yivára ni̱ka̱ʼa̱nna xíʼinra ña̱ kivi kachíñura nu̱ú Jehová ndiʼi tiempo. Xi̱kaʼa̱nna xíʼin na̱ superintendente ña̱ circuito xíʼin na̱ betelita ña̱ ku̱ʼu̱nna veʼena tasaá ki̱ʼinra kuenta ña̱ si̱íní ni̱xi̱yo-ini na̱ hermano yóʼo. Ki̱xáʼara kúúra precursor regular ku̱i̱ya̱ 1989. Tá xa̱a̱ ni̱ya̱ʼa u̱vi̱ ku̱i̱ya̱ ña̱ kúúra precursor saá ki̱xáʼara kéʼéra iin chiñu ña̱ xi̱kutóoníra keʼéra tá xi̱kuumiíra 12 ku̱i̱ya̱. Ki̱xáʼara káchíñura Betel ña̱ Brooklyn octubre ña̱ ku̱i̱ya̱ 1991.

Ki̱ʼva 8 ku̱i̱ya̱ ka̱chíñura taller ña̱ encuadernación, tándi̱ʼi ni̱ka̱ʼa̱nna xíʼinra ña̱ ku̱ʼu̱nra Departamento ña̱ Servicio. Tiempo kán congregación nu̱ú xi̱kaʼa̱nna tu̱ʼun Ruso xi̱ndikaa̱ra. Ku̱i̱ya̱ 2006 ti̱ndaʼa̱ra xíʼin ñá Nadia ta nani tiempo kán ñúʼuna Betel. U̱vi̱ saána xi̱ñuʼuna congregación nu̱ú káʼa̱nna portugués ta saátu yáʼaka u̱xu̱ ku̱i̱ya̱ xi̱ñuʼuna nu̱ú káʼa̱nna tu̱ʼun sáʼán. Ku̱a̱ʼání ku̱i̱ya̱ xi̱ndikaa̱ ta̱ hermano Fleegle Departamento ña̱ Servicio, soo saá ni̱ka̱ʼa̱nna xíʼinra ña̱ kundikaa̱ra Oficina na̱ Comité ña̱ Enseñanza ta tándi̱ʼi ni̱ka̱ʼa̱nna xíʼinra ña̱ kundikaa̱ra Oficina na̱ Comité ña̱ Servicio. Yo̱o̱ marzo ña̱ ku̱i̱ya̱ 2022 ni̱ka̱ʼa̱nna xíʼinra ña̱ chindeétáʼanra xíʼin na̱ Comité ña̱ Servicio na̱ Cuerpo Gobernante.

 Ta̱ hermano Winder xa̱ʼnura ñuu Murrieta, California. Testigo Jehová kúú na̱ yivára ta na̱yóʼo kúú na̱ sa̱náʼa̱ miíra xa̱ʼa̱ Jehová ta nda̱kuchira 29 tí marzo ña̱ ku̱i̱ya̱ 1986. Tá ni̱ya̱ʼa iin yo̱o̱ ña̱ nda̱kuchira ki̱xáʼara kúúra precursor auxiliar, ta ni̱kutóoníra ña̱yóʼo ña̱kán kǒo níxiinkara sandákooraña. Tá xa̱a̱ ni̱ya̱ʼa loʼo yo̱o̱ ki̱xáʼara kúúra precursor regular 1 tí octubre ña̱ ku̱i̱ya̱ 1986.

Tiempo kán u̱vi̱ na̱ ñanira na̱ chéeka nu̱úna xi̱kachíñuna Betel xa̱ʼa̱ ña̱kán ni̱xa̱ʼa̱nra xi̱torana. Xa̱ʼa̱ ña̱yóʼo chi̱kaa̱-inira ña̱ sandákutúra solicitud ña̱ va̱ʼa ku̱ʼu̱nra Betel. Yo̱o̱ mayo ña̱ ku̱i̱ya̱ 1990 ni̱ka̱ʼa̱nna xíʼinra ña̱ kachíñura Betel ña̱ Wallkill.

Tá xa̱a̱ ni̱xa̱a̱ra Betel ku̱a̱ʼání chiñu ke̱ʼéra, tá kúú xi̱ndikaa̱ra Departamento ña̱ Limpieza, Departamento ña̱ Hacienda xíʼin Oficina ña̱ Betel. Ku̱i̱ya̱ 1997 ti̱ndaʼa̱ra xíʼin ñá Angela, ta u̱vi̱ saána ñúʼuna Betel. Ku̱i̱ya̱ 2014 ni̱ka̱ʼa̱nna xíʼinra ña̱ ku̱ʼu̱nra Warwick, ta kán chi̱ndeétáʼanra xíʼinna ña̱ ixava̱ʼana ña̱ sede mundial. Ku̱i̱ya̱ 2016 ni̱ka̱ʼa̱nna xíʼinra ña̱ ku̱ʼu̱nra Patterson, nu̱ú ndíkaa̱ Centro Educativo ña̱ Watchtower, ta kán ka̱chíñura xíʼin Servicios ña̱ Audio xíʼin Video. Tá ni̱ya̱ʼa ku̱mí ku̱i̱ya̱ ndi̱kó tukuna Warwick, ta ni̱ka̱ʼa̱nna xíʼinra ña̱ kachíñura xíʼin na̱ Oficina na̱ Comité ña̱ Personal. Yo̱o̱ marzo ña̱ ku̱i̱ya̱ 2022 ni̱ka̱ʼa̱nna xíʼinra ña̱ chindeétáʼanra xíʼin na̱ Comité ña̱ Personal na̱ Cuerpo Gobernante.

U̱vi̱ saá na̱ hermano yóʼo nda̱a̱ táki̱ʼva íyo regalo ña̱ ta̱xi Jehová ndaʼa̱yó saá íyona ta kúsi̱íní-iniyó xíʼin chiñu ña̱ kéʼéna (Efes. 4:8). Xa̱ʼa̱ ña̱kán káʼa̱nníyó xíʼin Jehová ña̱ chindeétáʼanra xíʼin na̱ hermano yóʼo ña̱ va̱ʼa kachíñukana nu̱úra.