LIA MU CITATU, 18 ya Janeiro ya 2023, mu saiti yetu jw.org mua tuhukile muzimbu ua ku lifuila, ngecize muanetu Gage Fleegle na Jeffrey Winder va na pu Vakua Civunga ca Vantuamena ca Vakaleho va Yehova. Vose vavali laza va sua ku pangela Yehova.

Muanetu Fleegle ua semukila ku Pennsylvania, Estados Unidos, kaha ua kolela mu vusunga muomu visemi veni tele va pua laza Vakaleho. Mua puile kankavala, vusoko vuavo vua nungulukilile ku imo mbonge ya indende mu ku ka pangela kuze ku tondeka vukuasi. Kaha va mu mbatizile lia 20 ya Novembro ya 1988.

Ku sua kumo, visemi veni va mu kaniamesele ku kovela mu cipanga ca ntsimbu yose. Kaha vintsimbu via vingi va kele na ku tambula tuniungi va ku zinguluka na vakua Mbetele ku ndzivo yavo. Ngeci muanetu Fleegle ua hasele ku limuena ndzolela ya va vamuanetu na vandumbuetu. Kaha lia 1 ya Setembro ya 1989 muanetu Fleegle ua putukile vupioneiro vua ntsimbu yose. Mu nima ya miaka ivali, ua puisilemo cizango ca lihakelele tele ali na miaka 12, ca ku ka pangela ha Mbetele. Ua ka pangelele ha Mbetele ya ku Brooklyn mu Outubro ya 1991.

Kaha ua ka pangelele ku ku tunga mikanda miaka 8, mu nima yaco va mu nunguluila ku Seketa ya Vipanga. Mu ntsimbu yaco, ua kele imo miaka mu cikungulukilo ca ciRusso. Mu 2006 ua ambatele ndumbuetu Nadia, kaha ndumbuetu uaco neni ua kovela ha Mbetele. Kaha va kele mu cikungulukilo ca Putu, mu nima yaco va kala naua mu cikungulukilo ca Espanhol miaka i tuvakana 10. Mu nima ya ku kala miaka ya yingi ku Seketa ya Vipanga, muanetu Fleegle va mu nunguluilile mu seketa ya Ndzango ya Vilongesa, ku tundoho ua ya mu Seketa ya Ndzango ya Vipanga. Mu Março ya 2022 va mu hanguile ku pua mukuasi ua ku Ndzango ya Vipanga.

 Muanetu Winder co ua kolela ku Murrieta, California, Estados Unidos. Neni ua kolela mu vusunga kaha va mu Mbatizile lia 29 ya Março ya 1986. Mu ngonde ya hateleko vene ua putukile vupioneiro vua ku kuasa. Cipanga caco ca mu tovalele mua kama ngeci ua tondele ku tualelelaho. Kaha mu nima ya vimo vingonde, ua putuka vupioneiro vua ntsimbu yose lia 1 ya Outubro ya 1986.

Ha vunkavala, Muanetu Winder ua ile mu ku mona vayayeni vavali va kele na ku pangela ha Mbetele. Vungendzi vuaco, vua suamekele cizango ceni ca ku pangela ha Mbetele. Ngeci mu Maio ya 1990 va mu laniene ku ka pangela ha Mbetele ya ku Wallkill.

Ha Mbetele, muanetu Winder ua pangelele ku viseketa via ku liseza-seza, ngeci mua Seketa ya ku Komba, Seketa ya Ku Lima na Seketa ya Tala via Vantu ha Mbetele. Ua ambatele ndumbuetu Angela mu 1997 kaha ve ku pangela hamo lika ha Mbetele. Mu 2014 va va nunguluilile ku Mbetele ya ku Warwick, kaha muanetu Winder ua ka pangelele ku seketa ya ku tunga cikota ca kama. Mu 2016 va va nunguluilile ha Cikota ca Vilongesa ku Patterson, kaha muanetu Winder ua pangelele ku Seketa ya Audio/Video. Mu nima ya miaka 4, va va hiluisile naua ku Warwick kaha muanetu Winder ua ka pangelele mu seketa ya Ndzango ya Tala via Vantu. Kaha mu Março ya 2022 va mu hanguile ku pua mukuasi ua ku Ndzango ya Tala via Vantu.

Tua vundila ngecize Yehova a vezikise cikuma-kuma ava vamuanetu va pua “vuana kuli vantu” omo va tualelelaho ku fuitangana mu vipanga via vuangana.—Efe. 4:8.