IPAN miércoles, enero 18, 2023, techmatiltijkej ipan jw.org, toikniuaj Gage Fleegle uan Jeffrey Winder, nama nojkia kinyakanakaj Jehová itlajtoltemakauaj. Inijuantij kuali kitekipanojtokej Jehová miak xiuitl.

Toikni Fleegle moskaltik ipan oeste tlen Pennsylvania (Estados Unidos). Itatauaj kimachtijkej tlen Jehová. Kema eliyaya se piltelpokatsi ya uan itatauaj yajkej tlapaleuitoj ipan se altepetl kampa amo itstoyaj miakej tlajtolmoyauanij. Teipa, ipan noviembre 20, 1988, moatsonpoliuiltik.

Itatauaj nochipa kiiljuiyayaj senkistok ma kitekipano Jehová. Kintlaneuiyayaj ininchaj toikniuaj katli tepaxaloua chijchikuasej metstli uan katli tlatekipanouayayaj ipan Betel, kiampa ya kiitak kenijkatsa inijuantij tlauel yolpakiyayaj pampa kitekipanouayayaj Jehová. Ipan septiembre 1, 1989 pejki tlatekipanoua kej precursor regular. Uan ome xiuitl teipa kiaxitik tlen mosentlalijtoya kichiuas kema kipixtoya 12 xiuitl, pejki tlatekipanoua ipan Betel. Pejki tlatekipanoua ipan Brooklyn ipan octubre 1991.

Nopaya tlatekipanok kampa kichiuaj amatlajkuiloli chikueyi xiuitl, teipa kitekimakakej Kampa kiitaj tlen mochiua ipan tlajtolmoyaualistli. Ipan nopa tonali tlapaleuik se keski xiuitl ipan se tlanechikoli tlen ruso. Ipan 2006 mosiuajtik iuaya Nadia, uan nojua tlatekipanojtokej ipan Betel. Inijuantij tlatekipanojkej kampa kamanaltiyayaj portugués uan kipiaj 10 xiuitl ipan español. Miak xiuitl teipa kitekimakakej Kampa tekitij Katli kiitaj kenijkatsa techmachtisej uan teipa Kampa tekitij Katli kiyakanaj tlajtolmoyaualistli. Uan ipan marzo 2022, pejki Tlapaleuia kampa kiyakanaj tlajtolmoyaualistli tlen Katli kinyakanaj Jehová itlajtoltemakauaj.

Toikni Winder moskaltik ipan Murrieta (California). Itatauaj, katli nojkia kitekipanouaj Jehová, kimachtijkej tlen melauak, ya moatsonpoliuiltik  ipan marzo 29, 1986. Uan kema panok se metstli, mochijki precursor auxiliar. Tlauel kipaktik, yeka nojua kiampa tlatekipanok. Kentsi teipa ipan octubre 1, 1986, mochijki precursor regular.

Kema eliyaya se piltelpokatsi toikni Winder yajki kinpaxaloto ome iikniuaj katli tlatekipanouayayaj ipan Betel. Nopa kichijki ma mosentlali kititlanis se solicitud pampa kinekiyaya tlatekipanos ipan Betel kema ueliskia kiampa kichiuas. Uan ipan mayo 1990, pejki tlatekipanoua ipan kali Betel tlen Wallkill.

Nopaya toikni Winder tlatekipanok ipan miak tlamantli, kej kampa tlachpanaj uan tlapojpouaj, kampa kiniskaltiyayaj tlapialmej uan Kampa kiitaj tlen mochiua ipan Betel. Ipan 1997, mosiuajtik iuaya Angela, uan nojua tlatekipanojtokej ipan Betel. Ipan 2014 kintitlankej Warwick, kampa toikni Winder tlapaleuik kema mochijchijki ueyi Kali Betel. Ipan 2016 kintitlankej Kampa tlamachtiaj ipan Watchtower ipan Patterson, nopaya tlatekipanok kampa kichijchiuaj audios uan videos. Kema panok naui xiuitl, sampa kintitlankej Warwick, uan toikni Winder kitekimakakej Kampa tekitij katli kintlapejpeniaj ajkia tlapaleuisej. Ipan marzo, 2022 pejki Tlapaleuia kampa kintlapejpeniaj ajkia tlapaleuisej tlen Katli kinyakanaj Jehová itlajtoltemakauaj.

Jehová techmakatok ni toikniuaj keja eliskiaj “regalos” (Efes. 4:8). Tijtlajtlaniaj toTeotsij nojua ma kinteochijto, kiampa nojua kuali kichijtosej ininteki.