MIÉRCOLES 18 de enero xiuit 2023, motematiltij se taman itech jw.org: tokniuan Gage Fleegle uan Jeffrey Winder no peuak pouij iuan Oloch Taojtokaltianij akin kinixyekanaj itaixpantijkauan Jehová. Nochin omen kuali kitekitilianij Jehová miak xiujmejya.

Tokniuj Fleegle moskaltij oeste de Pensilvania (Estados Unidos). Itatuan kimachtijkej maj kiixmati Jehová. Keman katka telpoch nemitoj itech se xolaltsin kampa monekiaj tanojnotsanij. Uan moauij tepitsin satepan itech 20 de noviembre xiuit 1988.

Itatuan nochipa kiyolchikaujkej maj kitekitili Jehová miak tonalmej. Yejuan kinyoleuayaj ininchan tokniuan akin takalpanouayaj itech circuito uan betelitas, ijkon kiitak ke tokniuan semi yolpakiaj. Itech 1 de septiembre xiuit 1989, tepitsin satepan ke moauij, mochiuak precursor regular. Uan ome xiuit satepan peuak tapaleuia Betel, ijkon kemej kiixtalijka keman kipiaya 12 xiujmej. Itech metsti octubre xiuit 1991, peuak tapaleuia Betel ompa Brooklyn.

Chikueyi xiuit tapaleuij kampa kinchijchiuaj amaixmej, uan satepan tapaleuij itech Departamento de Servicio. Keman ompa yetoya, tapaleuijtoya itech se nechikol kampa tajtouaj ruso. Itech xiuit 2006 monamiktij iuan Nadia, uan nochin omen kisentokaj tapaleuiaj Betel hasta axkan. Nochin omen tapaleuijkej itech se nechikol kampa tajtouaj portugués uan panoua majtakti xiujmej tapaleuijkej kampa tajtouaj español. Satepan ke miak xiuit yetoya itech Departamento de Servicio, tokniuj Fleegle kiluijkej maj kinpaleui Tokniuan akin kiixyekanaj tein motamachtia uan satepan tekitik iniuan Tokniuan akin kiixyekanaj tanojnotsalis. Itech metsti marzo xiuit 2022 kiixtalijkej maj kinpaleui Tokniuan akin kiixyekanaj tanojnotsalis tein kiixyekana Oloch Taojtokaltianij.

 Tokniuj Winder moskaltij ompa Murrieta (California). Itatuan akin no itaixpantijkauan Jehová kimachtijkej, uan yejua moauij itech tonal 29 de marzo xiuit 1986. Se metsti satepan mochiuak precursor auxiliar, uan kemej semi kiuelitak kisentokak ijkon tapaleuij. Seki metsti satepan itech 1 de octubre xiuit 1986, mochiuak precursor regular.

Keman katka telpoch, tokniuj Winder kinkalpanoto ome iikniuan akin kiyekanaj, yejuan tapaleuijtoyaj Betel. Nejon kiyolchikauak maj kipexonti amat para no ompa tapaleuis keman kiajxitiskia xiuit tein monekia. Itech metsti mayo xiuit 1990 kiyoleujkej Betel ompa Wallkill.

Ompa kichiuak miak tataman tekimej, tapaleuij itech Departamento de Limpieza, Departamento de la Hacienda uan kampa kinixyekanaj akin tekitij Betel. Itech xiuit 1997 monamiktij iuan Angela, uan kisentokaj tapaleuiaj Betel hasta axkan. Itech xiuit 2014 kintitankej Warwick, kampa tokniuj Winder tapaleuij maj mochijchiua ueyi kali kampa techixyekanaj. Itech xiuit 2016 yajkej Patterson, itech Kalmej kampa iTaixpantijkauan Jehová Kitemakaj Tataman Tamachtilis, ompa kinpaleuij Tokniuan akin tekitij itech Audio uan Video. Naui xiuit satepan mokepkej Warwick, uan tokniuj Winder kiixtalijkej maj tapaleui itech Oficina kampa kinitaj akin tapaleuiaj Betel. Itech marzo xiuit 2022 kiixtalijkej maj kinpaleui tokniuan Oloch Taojtokaltianij akin kinitaj akin tapaleuiaj Betel.

Tiktataujtiaj Jehová maj kintatiochiui nejin takamej akin techinmakak “kemej tatiochiualismej” porin motemakaj tapaleuiskej itech iTaixyekanalis Dios (Efes. 4:8).